శ్రీకాకుళం జిల్లాలో మత్స్య సామగ్రి కొనుగోలుకు టెండర్లు పిలుస్తున్నట్లు జాయింట్ కలెక్టర్ సుమిత్ కుమార్ తెలిపారు. ఈ మేరకు జెసి ఒక ప్రకటన విడుదల చేస్తూ మత్స్య శాఖ ద్వారా  ప్రధాన మంత్రి మత్స్య సంపద యోజన(PMMSY) క్రింద 2020-21 సంవత్సరానికి వివిధ పధకములు అమలు చేయడం జరుగుతుందన్నారు. ఇందులో భాగంగా చేప పిల్లల సరఫరా, రిజర్వాయరు, సముద్రంలో పంజరాలు (కేజ్) నిర్మాణం, ఇన్సులేటెడ్ వాహనములు సరఫరా, చేపల రవాణాకు ఐస్ బాక్సులతో  సహా మోటారు సైకిల్, సముద్రములో చేపల వేట చేయు ఫైబర్ బోటులు, ఇంజెన్లు, వలల కొనుగోలుకు రూ.11.45 కోట్లను ఖర్చు చేస్తున్నట్లు ఆయన వివరించారు. ఈ పరికరాల సరఫరాకు ఈ – పొక్యూర్మెంట్ ద్వారా టెండర్లు పిలవడం జరుగుతుందని అన్నారు. టెండర్లు ఈ నెల 25వ తేదీ వరకు సమర్పించుటకు గడువు ఉందని జెసి తెలిపారు.