చంద్రయాన్-3 వ్యోమనౌకలోని అన్ని వ్యవస్థలూ సక్రమంగా పనిచేస్తున్నాయని ఇస్రో చైర్మన్ ఎస్. సోమ్నాథ్ మీడియాకు తెలిపారు. ఈ సందర్భంగా ఆయన మీడియాతో మాట్లాడుతూ, వ్యోమనౌక చంద్రుడికి 100 కిలోమీటర్ల సమీపానికి చేరుకున్నాకే కీలక దశ మొదలవుతుందని అన్నారు. ఆ తరువాత చంద్రయాన్- 3 చంద్రుడికి ఎంత ఎత్తులో ఉందనేది భూమ్మీద నుంచి కచ్చితంగా నిర్ధారించడం..అత్యంత కీలక ఘట్టమని పేర్కొన్నారు. ఈ దశను ఆర్బిట్ డిటర్మినేషన్ ప్రాసెస్ అంటారని
వివరించారు. ఇప్పటివరకూ అంతా అనుకున్నట్టు జరిగిందని, చంద్రయాన్-2 అనుభవం.. ఉపయోగపడిందని ఇస్రో చైర్మన్ తెలిపారు. 'చంద్రుడికి 100 కిలోమీటర్ల
ఎత్తువరకూ ఎటువంటి ఇబ్బందీ ఉండదని భావిస్తున్నాం. ఆ తరువాత చంద్రయాన్-3 చంద్రుడి..ఉపరితలం నుంచి ఎంత దూరంలో ఉందనేది కచ్చితంగా నిర్ధారించాల్సి ఉంటుంది. ఇది సరిగ్గా జరిగితే మిగిలిన వ్యవహారమంతా సులువుగా పూర్తవుతుంది. ఈసారి అంతా సక్రమంగా జరుగుతుందని భావిస్తున్నామని అన్నారు. ఇప్పటివరకూ కక్ష్య మార్పులన్నీ ముందస్తు ప్రణాళిక ప్రకారం జరిగాయని...ఈ క్రమంలో చంద్రయాన్-1 అనుభవం మాకు బాగా లాభించిందని చెప్పారు. అప్పట్లో తప్పు ఎక్కడ జరిగిందనే దానిపై నిశితంగా అధ్యయనం చేశాం. ఈ అనుభవంతో చంద్రయాన్-3లో పలు మార్పులు చేశాం" అని ఇస్రో చైర్మన్ పేర్కొన్నారు. ప్రస్తుతం ఈ వ్యోమనౌక చంద్రుడి చుట్టూ 170/313 దీర్ఘ వృత్తాకార కక్ష్యలో పరిభ్రమిస్తోంది. చంద్రయాన్ వ్యోమనౌకను జాబిల్లికి మరింత చేరువగా తీసుకెళ్లేందుకు ఇస్రో ఆగస్టు 9, 17న, కక్ష్య కుదింపు చర్యలు చేపట్టనుంది. అంతా సక్రమంగా సాగితే ఆగస్టు 23న చంద్రుడి ఉపరితలంపై దిగుతుందని చెప్పారు. కాగా జూన్ 14న ఆర్బిటర్, ల్యాండర్, రోవర్తో కూడిన చంద్రయాన్-3 శ్రీహరి కోట నుంచి నింగిలోకి ఎగసిన విషయం తెలిసిందే.
