అంతర్జాతీయ స్ధాయిలో వెయిట్ లిఫ్టర్, ఆమదాలవలసకు చెందిన బుడుమూరు రాజేశ్వరికి సమాచార పౌరసంబంధాల శాఖలో అవుట్ సోర్సింగ్ లో ఏపీఆర్వోగా విధులు నిర్వహిస్తున్న ఆర్.రామ మూర్తి డిపీఆర్వో కార్యాలయంలో శుక్ర వారం 25 వేల రూపాయల చెక్కును అందజేసారు. అంతర్జాతీయ స్ధాయికి చేరుకున్న రాజేశ్వరి ఆర్ధిక పరిస్ధితి రీత్యా వివిధ పోటీల్లో పాల్గొనే అవకాశాన్ని వదులుకుంటున్నారు. ఈ విషయం తెలిసిన ఆర్.ఆర్. మూర్తి తన ఒక నెల వేతనం రూ.25 వేలును ఆర్ధిక సహాయంగా అందజేసి ఉదారతను చాటారు. అంతర్జాతీయ పోటీల్లో రాజేశ్వరి పాల్గొనాలని, విశ్వ విజేతగా నిలిచి శ్రీకాకుళం జిల్లాకు ఖ్యాతి తేవాలనే ఆకాంక్షతో సహాయం అందించినట్లు ఆర్ఆర్. మూర్తి తెలిపారు. క్రీడలు అంటే అమితమైన ఆసక్తి అని స్వయంగా పాల్గొనలేక పోయినప్పటికి జిల్లా నుండి క్రీడా దిగ్గజాలు పాల్గొంటున్నారనే ఆనందం కలుగుతుందని ఆయన అన్నారు. ఆర్థిక పరిస్ధితులు క్రీడా కారుల భవితకు అడ్డుకారాదని ఆయన పేర్కొంటూ ఎంతో మంది ఉదారత కలిగిన వ్యక్తులు జిల్లాలో ఉన్నారని వారు ముందుకు వచ్చి రాజేశ్వరి వంటి వారిని ప్రోత్సహించాలని కోరారు. వెయిట్ లిఫ్టింగు క్రీడాకారిణిగా రాజేశ్వరి అంతర్జాతీయ స్ధాయిలో 2 బంగారు పతకాలు సాధించారు. తాష్కెంటులో జరిగిన జూనియర్ ఇంటర్నేషనల్ వెయిట్ లిఫ్టింగు, జర్మనీలో జరిగిన సీనియర్ ఉమెన్ గ్రాండ్ ఫిక్స్ టోర్నిలో బంగారు పతకాలు సాధించగా, జాతీయ స్ధాయిలో 10 బంగారు పతకాలు, రాష్ట్ర స్ధాయిలో 15 బంగారు పతకాలు, జిల్లా స్ధాయిలో 30 వరకు బంగారు పతకాలు సాధించారు. తండ్రి చనిపోగా తల్లి కూలీ పనులను చేస్తూ ఇంటిని పోషిస్తుంది. రాజేశ్వరితో పాటు ప్రతిభాసామర్ధ్యాలు కలిగిన క్రీడాకారులు, విద్యార్ధులను ప్రోత్సహించుటకు కొంత మంది ముందుకు రావాలని కోరుకుందాం.