అక్కినేని నాగేశ్వరరావు, సావిత్రి జంటగా నటించిన చిత్రం అర్ధాంగి. కుటుంబ కధా చిత్రానికి ఈ సినిమా నిలువెత్తు నిదర్శనం, ఈ సినిమా నాటికి హీరో, హీరోయిన్లు ఇద్దరూ లేతవయసులో ఉన్నవారే కావడం విశేషం. ఒక్క ముక్కలో చెప్పాలంటే భార్య అంటే అర్ధాంగి చిత్రంలో సావిత్రలా ఉండాలి అనేవారు చాలా మంది ఈ సినిమా చూసిన తరువాత. అంతలా ఈ అర్ధాంగి చిత్రం ప్రేక్షకాదరణ పొందింది.  బెంగాలీ నవల ఆధారంగా "అర్ధాంగి" చిత్రాన్ని రాగిణి పిక్చర్స్ నిర్మించింది.ఈ బెంగాలీ నవలను మణిలాల్ రచించారు. ఈ చిత్రానికి మాటలు పాటలు ఆచార్య ఆత్రేయ .సంగీతం బి.నర్సింహారావు. దర్శకనిర్మాత పి పుల్లయ్య. అక్కినేనికి ఇది నలభై రెండవ చిత్రం. 26-01-1955 తేదీ నాడు ఈ చిత్రం విడుదలైంది. ఈ చిత్రంలో అక్కినేని , సావిత్రిల తోపాటు జగ్గయ్య , గుమ్మడి, శాంతకుమారి ,చదలవాడ, సురభి ,బాల సరస్వతి మొదలగు వారు నటించారు .