ఆంధ్రప్రదేశ్ ఫిల్మ్ ఇండస్ట్రీ ఎంప్లాయిస్ ఫెడరేషన్(హెచ్-228) సభ్యుల అభ్యున్నతి, అభివృద్ది లక్ష్యంగా కార్యాచరణ రూపొందిస్తామని నూతన చైర్మన్ డా.కంచర్ల అచ్యుతరావు స్పష్టం చేశారు. శుక్రవారం హైదరాబాద్ లో ఫెడరేషన్ చైర్మన్ భాద్యలు స్వీకరించిన అనంతరం ఆయన మీడియాతో మాట్లాడుతూ రెండు తెలుగు రాష్ట్రాల్లో సినిమా పరిశ్రమను నమ్ముకొని పనిచేస్తున్న 24 క్రాప్స్ లోని ఏ ఒక్క ఉద్యోగి అన్యా యం జరగకూడదని, కళామతల్లిని నమ్ముకుని పనిచేస్తున్నవారి అభివృద్ధి, సంక్షేమం అందించే విధంగా తనవంతు కృషి చేస్తానని అన్నారు. సినిమాలకు ప్రభుత్వం నుంచి రావాల్సి అనుమతులు ఇకపై సింగిల్ విండో విధానం ద్వారా వచ్చేవిధంగా కృషి చేస్తానని అన్నారు. ప్రభు త్వం సినీ పరిశ్రమలకు అనుమతులతోపాటు, సినీ కార్మికులకు హౌసింగ్ కూడా మంజూరుచేయాలని.. ఈ సమస్యను తాను స్వయంగా ప్రభు త్వం దృష్టికి తీసుకు వెళతానని అన్నారు. ఎన్ని సినిమాలు నిర్మాణం జరిగితే అన్ని రోజులు సినీ కార్మికులకు ఉద్యోగ, ఉపాది అవకాశాలు ఉంటాయన్నారు. ఉద్యోగులందరికీ ఈపిఎఫ్, ఈఎస్ఐ సక్రమంగా సంస్థలు చెల్లించే విధంగా కృషి చేస్తామన్నారు.
