ఆంధ్రప్రదేశ్ ప్రభుత్వం ముఖ్యమంత్రి అధ్యక్షన జరిగిన కేబినెట్ భేటీలో గ్రామ, వార్డు సచివాలయాల కోసం చర్చించి మార్పుల దిశగా చర్యలు తీసుకుంటారని రాష్ట్రప్రభుత్వంలోని అతిపెద్ద మూడవ ప్రభుత్వశాఖగా ఉన్న సచివాలయ ఉద్యోగులు భావించారు. ఇపుడు ఈ శాఖను టచ్ చేస్తే ప్రభుత్వంపై ఆర్ధిక భారం అనుకున్నారో ఏమో తెలీదు గానీ. కనీసం ఒక్క అంశాన్ని కూడా చర్చించలేదు సరిగదా భవిష్యత్తులోనైనా చర్చించాలనే నిర్ణయం కూడా తీసుకోలేదు. వాస్తవానికి గ్రామ, వార్డు సచివాలయశాఖకు ఒక దిశ, నిర్ధేశం లేదు. వైఎస్సార్సీపీ ప్రభుత్వంలో జరిగిన అన్యాయం కూటమి ప్రభుత్వంలోనైనా తీరుతుందని భావించిన ఉద్యోగులకు తీవ్ర నిరాశ మిగిలింది. కేబినెట్ భేటీలో కనీసం ఈశాఖకు చట్టబద్ధత తీసుకువచ్చే విషయమైనా చర్చిస్తారనుకుంటే.. కేవలం ఆదాయం వచ్చే ప్రభుత్వశాఖలైన సెబ్, రెవిన్యూ, సివిల్ సప్లైస్ వంటి శాఖల్లో కొన్ని నిర్ణయాలు మాత్రమే తీసుకొని మమ అనిపించేశారని ఉద్యోగ వర్గాలు పెదవి విరిచాయి. సీఎం చంద్రబాబు ఎన్నికల సమయంలో ఉద్యోగులకు ఇచ్చిన హామీల అమల కోసమైనా కనీసం ఏ ఒక్కప్రభుత్వశాఖ కోసం చర్చించకపోవడం 75 ప్రభుత్వశాఖల ఉద్యోగులను తీవ్ర నిరాశకు గురిచేసింది. ఇక క్యాబినెట్ భేటీలో చర్చించిన అంశాలు, నిర్ణయాలు ఒక్కసారి తెలుసుకుంటే..
సీఎం పేషీ, సీఎంవో అధికారుల పేషీల్లో 71 పోస్టుల భర్తీకి మంత్రి వర్గం ఆమోదం.. మంత్రుల పేషీల బలోపేతం కోసం 96 పోస్టులను భర్తీచేయడానికి నిర్ణయం.. కొత్తగా ఏర్పాటు చేయబోయే రేషన్ దుకాణాల్లో ఈ- పాస్ మిషన్ల కొనుగోలుకు రూ.11.51 కోట్ల నిధుల విడుదలకు ఆమోదం.. సాగునీటి సంఘాల ఎన్నికల నిర్వహణకు మంత్రివర్గం ఆమోదం.. రివర్స్ టెండరింగ్ విధానాన్ని రద్దు చేసిన మంత్రివర్గం.. పాత విధానంలోనే టెండర్లు పిలిచే ప్రతిపాదనకు ఆమోదం. పోలవరం ఎడమ కాల్వ పనుల పునరుద్ధరణకు కేబినెట్ ఆమోదం.. గతంలోని గుత్తేదారుకే మళ్లీ పనులు చేసేలా నిర్ణయం, ఎక్సైజ్ శాఖను
స్పెషల్ ఎన్ఫోర్స్మెంట్ బ్యూరో గా మార్చిన గత ప్రభుత్వ నిర్ణయాన్ని రద్దు చేస్తూ.. మళ్లీ సదరు శాఖకు ఎక్సైజ్ శాఖగానే ఉంచాలని కేబినెట్ తీర్మానం.. పట్టాదారు పాస్ పుస్తకాలపై జగన్ ఫొటో, రాజకీయ పార్టీల లోగో తొలగించేందుకు ఆమోదం.. తద్వారా 21.86లక్షల పట్టాదారు పాస్పుస్తకాలపై కొత్తగా ప్రభుత్వ అధికారిక చిహ్నాన్ని ముద్రించి ఇవ్వాలని కూడా కేబినెట్ లో నిర్ణయించారు. తొలిసారిగా ఈ-కేబినెట్ నిర్వహించడంతో కొన్ని అంశాలకే ఈ భేటీని పరిమితం చేశారు.
