డ్రైఫ్ల‌వ‌ర్ టెక్నాల‌జి ద్వారా టిటిడి అవ‌స‌రాల‌కు త‌గిన ఉత్ప‌త్తులు త‌యారు చేసి ఇవ్వ‌డానికి ముందుకు రావాల‌ని  టిటిడి ఈవో డాక్ట‌ర్ కె.ఎస్‌.జ‌వ‌హ‌ర్‌రెడ్డి అధికారుల‌ను కోరారు. టిటిడి ప‌రిపాల‌న భ‌వ‌నంలోని త‌న ఛాంబ‌ర్‌లో బుధ‌వారం ఈవో డాక్ట‌ర్ వై.ఎస్‌.ఆర్ ఉద్యాన విశ్వ‌విద్యాల‌యం ఉప కుల‌ప‌తి డాక్ట‌ర్ జాన‌కిరామ్, ప‌శువైద్య విశ్వ‌విద్యాల‌యం ఉప కుల‌ప‌తి డాక్ట‌ర్ ప‌ద్మానాభ‌రెడ్డి,  ఉద్యాన విశ్వ‌విద్యాల‌యం డైరెక్ట‌ర్ అఫ్ ఎక్స్‌టెన్ష‌న్ డాక్ట‌ర్ శ్రీ‌నివాస్‌తో స‌మావేశమ‌య్యారు. ఈ సంద‌ర్భంగా ఈవో మాట్లాడుతూ డ్రైఫ్ల‌వ‌ర్ టెక్నాల‌జి ద్వారా బొకేలు, ల్యామినేటెడ్ ఫోటోలు, పేప‌ర్ వెయిట్స్ త‌దిత‌ర ఉత్ప‌త్తుల త‌యారీలో నైపుణ్యం ఉన్నడాక్ట‌ర్ వై.ఎస్‌.ఆర్ ఉద్యాన విశ్వ‌విద్యాల‌యం ముందుకు వ‌స్తే తిరుప‌తిలో స్థ‌లం కేటాయిస్తామ‌ని చెప్పారు. ఇందులో ఉత్ప‌త్తుల‌కు అవ‌స‌ర‌మ‌య్యే యంత్రాలు, సౌక‌ర్యాలతో పాటు, ప‌రిశోధ‌న కేంద్రం ఏర్పాటు చేసుకోవ‌చ్చున‌ని సూచించారు. ఐదు సంవ‌త్స‌రాల వ‌ర‌కు ఈ కేంద్రాన్ని నిర్వ‌హించుకుని త‌రువాత టిటిడికి అప్ప‌గించే ప్ర‌తిపాద‌న ప‌రిశీలించాల‌న్నారు. డాక్ట‌ర్ వై.ఎస్‌.ఆర్ ఉద్యాన విశ్వ‌విద్యాల‌యం ఉప కుల‌ప‌తి డాక్ట‌ర్ జాన‌కిరామ్ మాట్లాడుతూ త‌మ విశ్వ‌విద్యాల‌యం డ్రైఫ్ల‌వ‌ర్ టెక్నాల‌జి ద్వారా ఇప్ప‌టికే రోజ్‌టీ, లిల్లీ టీ, లెమ‌న్ గ్రాస్‌ మ్యారిగోల్డ్ టీ, హైబిస్క‌స్ టీ, సోపులు, బాడీ కెర్ ఉత్ప‌త్తులు, ఫేషియ‌ల్ క్రీములు, మాస్క్‌లు, స్ప్రే లాంటి అనేక ఉత్ప‌త్తులు స్థానికంగానే త‌యారు చేస్తున్నామ‌ని చెప్పారు. ఇందుకోసం సిబ్బందికి ప్ర‌త్యేక శిక్ష‌ణ ఇస్తున్నామ‌న్నారు. ఈ స‌మావేశంలో జెఈవో స‌దా భార్గ‌వి, సిఇ  నాగేశ్వ‌ర‌రావు, గార్డెన్ సూప‌రింటెండెంట్  శ్రీ‌నివాస్‌, డిఎఫ్‌వో  చంద్ర‌శేఖ‌ర్ పాల్గొన్నారు.          

దేశీయ గోవుల ద్వారా సేక‌రించే పంచ‌గ‌వ్యాల‌తో హెర్బల్ ప్రొడక్ట్స్ త‌యారీని వేగ వంతం చేయాల‌ని టిటిడి ఈవో డాక్టర్ కెఎస్.జవహర్ రెడ్డి అధికారుల‌ను ఆదేశించారు. తిరుపతిలోని శ్రీ ప‌ద్మావ‌తి విశ్రాంతి గృహంలో శుక్ర‌వారం ఈవో ఎస్వీ గోశాల అధికారుల‌తో సమీక్ష నిర్వహించారు. ఈ సందర్భంగా ఈవో మాట్లాడుతూ పంచ‌గ‌వ్యాలలో ధూపం, స‌బ్బులు, అగ‌ర‌బ‌త్తీలు, ప‌రిశుభ్ర‌తా సామ‌గ్రి లాంటి ఉత్ప‌త్తుల్లో వీలైన‌న్ని టిటిడి గోశాల‌లో త్వ‌రిత గ‌తిన త‌యారీకి చ‌ర్య‌లు తీసుకోవాల‌ని ఎస్వీ గోశాల అధికారుల‌ను ఆదేశించారు. కోయంబత్తూర్‌లోని ఆశీర్వాద్‌ ఆయుర్వేద ఫార్మసీ ఇండియా ప్రైవేట్ లిమిటెడ్ వారు వివిధ పంచగవ్య ఆధారిత మూలికా ఉత్పత్తుల తయారీకి అర్హత క‌లిగి ఉన్న‌ట్లు తెలిపారు.  పూజ‌లో వినియోగించే పంచ‌గ‌వ్య ఉత్ప‌త్తులైన ధూప్‌చూర్ణం, అగరబత్తీలు, సాంబ్రాణి కప్‌లు, ధూప్ స్టిక్స్‌, ధూప్ కోన్‌లు టిటిడి, గృహ,  శైవ దేవాలయాలలో వినియోగం కోసం విబూదిని త‌యారుచేసి త్వ‌ర‌లో విక్ర‌యాలు ప్రారంభించాల‌న్నారు. అదేవిధంగా పంచగవ్య టూత్ పౌడర్, ఫేస్‌ప్యాక్‌, సోప్, మూలికా షాంపూలు, నాజల్ డ్రాప్స్‌, గో ఆర్క్ అందుబాటులో ఉంచాల‌న్నారు. టిటిడి వసతి స‌ముదాయాలు, కార్యాలయాలు, బహిరంగ ప్రదేశాలలో పంచగవ్య హెర్బల్ ఫ్లోర్ క్లీనర్‌ను ఉపయోగించాల‌న్నారు. హోమ కార్య‌క్ర‌మాల్లో వినియోగించే ఆవు పేడ‌తో చేసిన పిడ‌క‌లు త‌దిత‌ర వాటిని సిద్ధంచేయాల‌న్నారు. వీటి స్టోరెజ్ కొర‌కు తిరుప‌తిలోని డిపిడబ్ల్యు స్టోర్‌ను ఉప‌యోగించుకోవాల‌ని సూచించారు. పంచ‌గ‌వ్య ఉత్ప‌త్తులను మొద‌ట  తిరుమల, తిరుపతిల‌లో, తరువాత బ‌య‌ట ప్రాంతాల్లో విక్రయించాల‌ని ఈవో సూచించారు.

          ఈ స‌మీక్ష‌లో సిఇ  నాగేశ్వ‌ర‌రావు, ఎఫ్ఎ అండ్ సిఏవో  బాలాజి, ఎస్వీ గోశాల డైరెక్ట‌ర్ డాక్ట‌ర్ హ‌ర‌నాథ‌రెడ్డి, గోశాల అధికారులు పాల్గొన్నారు.   అంతకుముందు ఈవో గోసంరక్షణ శాల కార్యకలాపాలపై అధికారులతో సమీక్షించారు.

తిరుమల తిరుపతి దేవస్థానం ఆలయాల్లో స్వామి వార్లకు ఉపయోగించిన పూలమాలలతో తయారు చేసే అగర బత్తుల అమ్మకాలు ఆగస్టు 15 వ తేదీ ప్రారంభించడానికి ఏర్పాట్లు చేయాలని టీటీడీ ఈవో డాక్టర్ కెఎస్ జవహర్ రెడ్డి అధికారులను ఆదేశించారు. టీటీడీ పరిపాలన భవనంలోని తన చాంబర్లో బుధవారం ఆయన అధికారులతో సమీక్ష నిర్వహించారు. దర్శన్ ఇంటర్నేషనల్ సంస్థ ముడి సరుకు ఖర్చు మాత్రమే తీసుకుని,   అగర బత్తులు తయారుచేసి టీటీడీకి ఇస్తుందన్నారు. వీటికి ఎంఆర్ పి నిర్ణయించి అమ్మకాలు జరిపేలా చర్యలు తీసుకోవాలని చెప్పారు. మొదటి విడతగా తిరుమల లడ్డూ కౌంటర్ల వద్ద ఆగస్టు 15న అమ్మకాలు ప్రారంభించి, తరువాత ఇతర ప్రాంతాల్లో విక్రయాలకు ఏర్పాట్లు చేయాలన్నారు. పంచ గవ్య తోటి తయారు చేయాలని నిర్ణయించిన 15 రకాల ఉత్పత్తుల గురించి ఈవో అధికారులతో చర్చించారు. వీటిని త్వరలోనే విడుదల చేయడానికి చర్యలు తీసుకోవాలని అధికారులకు సూచించారు. టీటీడీ ఆయుర్వేద ఫార్మసీని బలోపేతం చేసి మరిన్ని ఉత్పత్తులు తయారు చేయడంపై అధికారులతో చర్చించారు. ఇప్పటికే 115 రకాల ఉత్పత్తులకు ఆయుష్ మంత్రిత్వశాఖ నుంచి లైసెన్స్ తీసుకున్నామని అధికారులు తెలిపారు.  మరో 70 ఉత్పత్తుల తయారీకి లైసెన్స్ తీసుకునే ఏర్పాట్లు చేస్తున్నట్లు చెప్పారు. ఈ ప్రక్రియ త్వరగా పూర్తి చేయాలని ఈవో ఆదేశించారు. ఫార్మసీ ఆధునీకరణ పనులు త్వరగా పూర్తి చేసి, అవసరమైన కొత్త యంత్రాలు సమీకరించుకోవడానికి ఈ నెలాఖరుకు టెండర్లు పూర్తి చేయాలని ఈవో ఇంజినీరింగ్ అధికారులను ఆదేశించారు. ఎఫ్ఏ అండ్ సిఏవో  బాలాజి, చీఫ్ ఇంజినీర్  నాగేశ్వరరావు, ఎస్ఈ  జగదీశ్వర రెడ్డి, ఎస్వీ డైరీఫామ్ డైరెక్టర్ డాక్టర్ హరనాథరెడ్డి, ఆయుర్వేద కళాశాల ప్రిన్సిపల్ డాక్టర్ మురళీకృష్ణ సమావేశంలో పాల్గొన్నారు.

ఖరీఫ్ సీజన్ లో రైతులకు నాణ్యతా ప్రమాణాలతో కూడిన విత్తనాలు, ఎరువులు, పురుగు మందులు అందుబాటులో ఉండే విధంగా వ్యవసాయ ఉత్పాదక డీలర్లు సిధ్ధంగా ఉండాలని జిల్లా కలెక్టర్ డి.మురళీధర్ రెడ్డి పేర్కొన్నారు.  బుధవారం జిల్లా పరిషత్ సమావేశ మందిరంలో కలెక్టర్ అధ్యక్షతన జిల్లాలోని విత్తనాలు, పురుగు మందులు, ఎరువుల డీలర్లు, వ్యవసాయాధికారులతో వ్యవసాయ ఉత్పాదకత, నాణ్యతాప్రమాణాలపై అవగాహన సదస్సు నిర్వహించారు. ఈ సందర్భంగా కలెక్టర్ మాట్లాడుతూ వ్యవసాయ ఉత్పాదకత డీలర్లు నిజాయతీతో క్రయ విక్రయాలు చేస్తే ఎలాంటి సమస్యలు ఉండవన్నారు. రైతులతో అన్యాయంగా వ్యవహరిస్తే చట్టపరంగా చర్యలు ఉంటాయన్నారు. గతంలో రైతులు బ్యాంక్ లోన్ లతో పాటు, వ్యవసాయ ఉత్పాదకతల కోసం తిరిగే పరిస్ధితి ఉండేదన్నారు. ముఖ్యమంత్రి ఈ పరిస్ధితులను అధిగమించే విధంగా ఒన్  స్టాప్ విధానంలో రైతు భరోసా కేంద్రాలు ప్రవేశపెట్టారన్నారు. డిలర్లు తమ పరిధిలోని ఆర్.బి.కె.ల ద్వారా తమ ఉత్పాకతలను విక్రయించుకునే సౌలభ్యం ప్రభుత్వం కల్పించిందన్నారు. రైతు కొనుగోలు చేసే ప్రతి వ్యవసాయ ఉత్పాదకతకు తప్పనిసరిగా రసీదు జారీ చేయాలన్నారు. రసీదు జారీ వలన రైతు తో పాటు డీలర్ కు లాభం చేకూరుతుందని కలెక్టర్ తెలిపారు. వ్యవసాయ ఉత్పాదకతలు నిర్వహించే ప్రతీ డీలరు తప్పని సరిగా రికార్డు నిర్వహించడంతో పాటు లైసెన్సు ఆయా షాపుల్లో ప్రదర్శించాలన్నారు. నాణ్యమైన విత్తనాలు, ఎరువులు, పరుగు మందుల జారీలో ముఖ్యమంత్రి ప్రత్యేక దృష్టి సారించాలని, తదనుగుణంగా డీలర్లు తమ ఉత్పదకతల పట్ల అప్రమత్తంగా ఉండాలన్నారు. అదే విధంగా గతంలో కన్నా భిన్నంగా ప్రతి గ్రామంలో అర్హత కలిగిన వ్యవసాయ సెక్రటరీలు పని చేస్తున్నారని, వీరి సేవలు సద్వినియోగం చేసుకోవాలని కలెక్టర్ డి.మురళీధర్ రెడ్డి ఈ సందర్భంగా పలు సూచనలు చేశారు. 

జాయింట్ కలెక్టర్ ( రెవెన్యూ) జి.లక్ష్మిశ మాట్లాడుతూ ప్రభుత్వం రైతు సంక్షేమం కోసం విత్తనం నాటిన నాటి నుండి పంట చేతికి వచ్చే వరకు పూర్తి భరోసా ఇస్తుందని, తదనుగుణంగా డీలర్లు వ్యవహరించాలన్నారు. నాణ్యతా ప్రమాణాలు లేని విత్తనాలు, ఎరువులు, పురుగు మందుల వలన రైతులు ఆర్ధికంగా నష్టపోతారని, తప్పనిసరిగా నాణ్యతా ప్రమాణాలు పాటించాలన్నారు. డీలర్లు లైసెన్సుల నిబంధనల పట్ల తక్కువ అవగాహన తో ఉన్నారని, ఇది సరైన చర్య కాదన్నారు. కంపెనీల నుండి వచ్చే వ్యవసాయ ఉత్పాదకతల పట్ల ఏమైన సేందేహాలు ఉంటే వ్యవసాయాధికారుల ద్వారా నివృత్తి చేసుకోవాలన్నారు. సందేహాల నివృత్తి కోసం ఆర్.బి.కె.ల సేవలు వినియోగించుకోవాలన్నారు. జిల్లాలో పురుగు మందుల షాపుల లైసెన్సూలు-1136 , విత్తనాల డీలర్ల లైసెన్సులు – 515, ఎరువుల షాపుల లైసెన్సులు – 1181 గా ఉన్నాయని జేసి లక్ష్మిశ వివరించారు. 

జిల్లా ఎస్.పి. నయీమ్ అద్నాన్ అశ్మీ మాట్లాడుతూ వ్యవసాయ ఉత్పదకతల పంపిణీ వ్యవహారంలో ఏమైన అవక తవకలు జరిగితే రెవెన్యూ, పోలీస్, ఎన్ ఫోర్స్ మెంట్ విభాగాలు కఠినంగా వ్యవహరిస్తాయన్నారు. 

వ్యవసాయ శాఖ జేడి విజయ్ కుమార్ మాట్లాడుతూ ఖరీఫ్ సీజన్ ప్రారంభమవుతున్న తరుణంలో విత్తనాలు, ఎరువులు, పురుగు మందుల కోసం రైతులు వ్యవసాయ ఉత్పాదకత డీలర్ల వద్ద వస్తారన్నారు. అలాంటి సమయంలో వారికి నాణ్యతతో కూడిన వాటిని అందించాలన్నారు. సీజనల్ లో మధ్యస్ధ వర్గాల ద్వారా వ్యవసాయ ఉత్పాదకాలు పంపిణీ జరుగుతుందని, వీటి వలన అనర్ధాలు జరిగే అవకాశాలు ఉన్నాయన్నారు. అలాంటి వాటిని ప్రోత్సహించ కూడదన్నారు. డీలర్ల వద్దకు వచ్చే ఉత్పాదకాలను వెంటనే స్ధానిక వ్యవసాయ అధికారుల దృష్టికి తీసుకువెళ్ళి నాణ్యతా ప్రమాణాలు తెల్సుకోవాలని జేడి పలు సూచనలు చేశారు. ప్రతీ డీలర్ తమ షాపు వద్ద స్టాకు బోర్డుతో పాటు ధరల పట్టీ ప్రదర్శించాలన్నారు. 

విజిలెన్స్ అండ్ ఎన్ ఫోర్స్ మెంట్ ఎస్.పి. రవి కుమార్ మాట్లాడుతూ రైతులు, విభిన్న వర్గాల ద్వారా వ్యవసాయ ఉత్పాదకతాల నాణ్యతా లోపాలపై తగు సమాచారం తమ దృష్టికి వస్తుందన్నారు. వీటిని బేరీజు చేసుకుని, తనిఖీలుచేపట్టడం జరుగుతుందన్నారు. తనిఖీ సమయంలో ఖచ్చితంగా ప్రభుత్వ మార్గదర్శకాలు, లైసెన్సు నియమ నిబంధనలు పాటిస్తున్నదీ లేనిది పరిశీలించడం జరుగుతుందన్నారు. కాలం చెల్లిన ఉత్పాదకతల పట్ల అప్రమత్తంగా ఉండాలని, రైతుకు ఎలాంటి ఇబ్బంది లేకుండా డీలర్లు వ్యవహరించాలని ఎన్ ఫోర్స్ మెంట్ ఎస్.పి. రవికుమార్ డీలర్లకు పలు సూచనలు చేశారు. ఈ సమావేశంలో వ్యవసాయ అధికారులు బి.రామారావు, జి.వి.పద్మశ్రీ, వ్యవసాయ ఉత్పాదకతల డీలర్లు, వ్యవసాయాధికారులు తదితరులు పాల్గొన్నారు.