మహాసేన రాజేష్ ఇక అధికారికంగా టిడిపి నాయకుడయ్యాడు. తూర్పుగోదావరి జిల్లా పర్యటనలో టిడిపి అధినేత చంద్రబాబు సామర్లకోటలో దళిత సామాజికవర్గంతో నిర్వహించిన సమావేశంలో వరుపుల రాజా తదితరుల ఆధ్వర్యంలో ఆయనకు కండువా వేసి పార్టీలోకి ఆహ్వానించారు. ఈ సందర్భంగా రాజేశ్‌ మాట్లాడుతూ, 2019 ఎన్నికలకు ముందు చంద్రబాబును దళిత ద్రోహిగా సీఎం జగన్‌ చిత్రీకరించారు. జగన్‌ మాటలు విని చంద్రబాబును అపార్థం చేసుకున్నాం. అయితే నిజమైన దళిత ద్రోహి ఎవరో త్వరగానే గ్రహించామని.. ఎస్సీలకు చంద్రబాబు 27 సంక్షేమ పథకాలను అమలు చేస్తే.. వైఎస్సార్సీపీ రాగానే జగన్‌ వాటిని రద్దు చేసిందన్నారు. 2019లో తప్పు చేయకుండా ఉండుంటే అమరావతి నిర్మాణం పూర్తయ్యేదన్న ఆయన దళితులు ఎవరి కాళ్లమీద వారు నిలబడేలా చంద్రబాబు చేశారని అన్నారు. జగన్‌ తుగ్లక్‌ పాలన చూశాక చంద్రబాబు పాలన రామరాజ్యం అని అర్థమవుతోందని రాజేష్ వ్యాఖ్యానించడం చర్చనీయాంశం అవుతోంది.