ఆంధ్రప్రదేశ్ లోని అన్ని దేవాల‌యాల్లో ర‌థాల ప‌రిర‌క్ష‌ణ‌కు పటిష్ట చ‌ర్య‌లు తీసుకుంటున్నామ‌ని దేవదాయ‌శాఖ మంత్రి వెలంప‌ల్లి శ్రీ‌నివాస్ రావు స్పష్టం చేశారు. బుధవారం ఇంద్రకీలాద్రిపై వేంచేసియున్న క‌న‌క‌దుర్గ‌మ్మ ఆల‌యంలోని అమ్మ‌వారి వెండి ర‌థాన్ని  దేవ‌దాయ శాఖ క‌మిష‌న‌ర్ పి.అర్జ‌న‌రావుతో క‌లిసి మంత్రి  వెలంప‌ల్లి ప‌రిశీలించారు. ఈ తనిఖీలో అమ్మ‌వారి వెండిర‌ధంపై మూడు సింహాలు క‌నిపించ‌డం లేద‌ని తేలింద‌న్నారు. వైసీపీ ప్రభుత్వం వచ్చినప్పటి నుండి రథాన్ని ఉపయోగించడంలేదని,  గత ప్రభుత్వం హయాంలో జరిగిందో ఇప్పుడు జరిగిందో విచారణలో తేలుతుందన్నారు.ఈ  ఘటనపై దేవదాయ శాఖ ఆధ్వర్యంలో కమిటీ వేస్తున్నామని, ఆక‌మిటీ విచార‌ణ చేసి నిజాలు నిగ్గు తేలుస్తుందన్నారు. రాష్ట్రంలోని చాలా ఆల‌యాల్లో భ‌ద్ర‌త‌ను ప్రైవేట్ ఏజెన్సీలు చూస్తున్నాయ‌ని మంత్రి తెలిపారు. సెక్యూరిటీ ఏజెన్సీ భద్రతా లోపం అని తేలితే దానిపై చర్యలు తీసుకుంటామని వివరించారు. ఈ విషయంలో ప్రతిపక్షాలు అనవసరంగా రాద్దాంతం చేస్తున్నాయని కానీ అంతర్వేది ఘటన తరువాత అన్ని దేవాలయాల్లో భద్రతను కట్టుదిట్టం చేసినట్టు మంత్రి పేర్కొన్నారు.