ఆంధ్రప్రదేశ్ ప్రభుత్వం మహిళలు, విద్యార్ధినిలు, గ్రుహిణిలు సంరక్షణార్ధం అత్యంత ప్రతి ష్టాత్మకంగా ప్రవేశపెట్టిన దిశ యాప్ కి రాష్ట్ర వ్యాప్తంగా ఖాకీ యూనిఫారం మోకాల డ్డుతోంది. ఏంటి దిశయాప్ ఇనిస్టాల్ చేసుకోవడానికి ఖాకీ యూనిఫారంకి సంబంధం ఏంటని అమరా వతిలోని ఏపీ పోలీస్ బాస్ డీజీపీ నుంచి అనకాపల్లిలోని పోలీస్ స్టేషన్ కానిస్టేబుల్ వరకూ అనుమానం కలుగక మానదు. దిశయాప్ ఇనిస్టాల్ కి సంబంధించిన వాస్తవ పరిస్థితి తెలుసుకుంటే అదే డీజీపి నుంచి కానిస్టేబుల్ వరకూ అన్నన్నా.. ఇంత జరుగుతోందా అంటూ ముక్కున వేలేసుకుంటారు. అప్పుడు పూర్తిస్థాయిలో ఖాకీలే రంగంలోకి దిగి.. దిశ దశను మార్చి రాష్ట్రంలోని నలు దిశలు వ్యాపించేలా చేసి ఆండ్రాయిడ్ ఫోను వాడే ప్రజలందరూ ఈ యాప్ ని వినియోగించేలా చేస్తారనడంలో ఎలాంటి సందేహం లేదు. వైఎస్సార్సీపీ ప్రభుత్వం అధికారంలోకి వచ్చిన తరువాత దిశయాప్ ని ప్రత్యేకంగా  మహిళల రక్షణకోసం ప్రవేశపెట్టింది. యాప్ ని ప్రవేశ పెట్టిన దగ్గర నుంచి సాధారణ పోలీసులతోపాటు, రాష్ట్రవ్యాప్తంగా వున్న 15వేల 5 గ్రామ, వార్డు సచివాలయాల పరిధిలోని 14వేల పైచిలకు వున్న సచివాలయ మహిళా పోలీసులకు ఆ బాధ్యతను అప్పగించారు. సచివాలయ ఉద్యోగుల పేరులో పోలీస్ ఉంది తప్పితే.. ఆ పోలీసుల ఒంటిపై ఖాకీ యూనిఫారం లేదు. ఖాకీ యూనిఫారం వున్న పోలీసులంతా ఎస్పీ నుంచి కానిస్టేబుళ్ల వరకూ కార్యాలయాలకే పరిమితం అవుతూ(కొన్నిచోట్ల), సచివాలయ మహిళా పోలీసులు, ఇతర సిబ్బంది క్షేత్రస్థాయిలో ఇనిస్టాల్ చేయించే దిశ యాప్ సంఖ్యను మానటరింగ్ చేస్తున్నారు. 

సాధారణంగా పోలీస్ యూనిఫారం వేసుకున్న వ్యక్తిని చూస్తే ఎలాంటి వ్యక్తికైనా చిన్న ఆందోళన, భయం, భక్తి, మరికొందరికి చిరాకు కూడా కలుగుతుంది. పోలీసోడు కనపబడితే నాకెందుకు వచ్చిన తలొనొప్పి అనుకొని ఏం చెబితే అది చేసే పరిస్థితికూడా వుంటుంది. సరిగ్గా ఇక్కడే ప్రభుత్వంలోని పోలీస్ శాఖ కూడా పెద్ద తప్పు చేసింది. గ్రామస్థాయిలోని సచివాలయ మహిళాపోలీలకు అప్పగించిన దిశయాప్ ఇనిస్టాల్స్ విషయంలో ఖాకీ యూనిఫారం వేసుకున్న పోలీసులు కూడా పూర్తిస్థాయిలో భాగస్వామ్యం అయితే ప్రజల్లో కూడా మార్పు వచ్చేది. కానీ యూనిఫారం లేని మహిళా పోలీసులు వెళ్లి దిశయాప్ పై అవగాహన కార్యక్రమాలు పెడితే అవి ప్రజల్లోకి చేరడం లేదు. అడపా దడపా అప్పుడప్పుడు స్పెషల్ డ్రైవ్ పేరుతో చేసే కార్యక్రమాల్లో జిల్లా ఎస్పీలు, డివిజన్ స్థాయిలో డిఎస్పీలు, స్టేషన్ పరిధిలో ఎస్ఐలు చేసే కార్యక్రమాల్లో పాల్గొనడం తప్పితే మిగిలిన సమయంలో ఆ బాధ్యత అంతా సచివాలయ మహిళా పోలీసులే చక్కబెడున్నారు. అలాగని నిత్యం పోలీసులకు దిశయాప్ పైనే ద్రుష్టిమొత్తం కేంద్రీకరించాలంటే అదికూడా జరగని పరిస్థితి.. అలాగని ఖాకీ రోడ్డుపైకి వెళ్లకపోతే సాధారణ ప్రజలు దిశ యాప్ ఇనిస్టాల్ చేయని దుస్థితే ఇప్పటి వరకూ కనిపిస్తూ వచ్చింది. దిశ యాప్ కోసం తెలిసినవారు సచివాలయ మహిళా పోలీసులు అవగాహన కల్పిస్తే అప్పటికి ఇనిస్టాల్ చేసుకుంటున్నారు. లేదంటే తరువాత చూద్దామని లైట్ తీసుకుంటున్నారు.

ప్రస్తుతం యువత ఆండ్రాయిడ్ ఫోన్లలో టిక్ టాక్, షేర్ చాట్, ఇనిస్టా గ్రామ్, ఫేస్ బుక్ వంటి వాటితోనే కాలం గడుపుతున్నారు తప్పితే రక్షణగా ఉండే దిశ యాప్ ని ఇనిస్టాల్ చేసుకోవడానికి ఎవరూ ముందుకి రావడంలేదు. ఒక వేళ గ్రామాల్లో సచివాలయ మహిళా పోలీసుల ఒత్తిడి తట్టుకోలేక దిశ యాప్ ని అప్పటికి ఇనిస్టాల్ చేసుకున్నా.. ఆ తరువాత వెంటనే యాప్ ని డిలీట్ చేసేస్తున్నారు. కానీ ఇనిస్టాల్ చేసుకున్న సంఖ్య మాత్రం పోలీస్ శాఖ డాష్ బోర్డులో కనిపిస్తుంది. ముఖ్యంగా యువతలో దిశ యాప్ పైపా.. దాని వినియోగంపైనా పూర్తిస్థాయిలో అవగాహన లేదు. అలాగని సచివాలయ మహిళా పోలీసులతో నిర్వహించే కార్యక్రమాలు వారి విధుల వరకూ సరిపోతున్నాయి తప్పితే ప్రజల్లోనూ, యువతలోనూ, ముఖ్యంగా విద్యార్ధినిల్లోనూ మార్పు తీసుకు రాలేకపోతున్నాయి. ‘శంఖంలో పోస్తేనే తీర్ధం’ అన్నట్టుగా దిశ యాప్ కోసం ఖాకీ యూనిఫారం వేసుకున్న పోలీసోడు చెబితేనే ప్రజలు వినే పరిస్థితి వచ్చింది..ఖచితంగా వినితీరుతున్నారు అంతే.. అలాకాకుండా పేరులో పోలీసు ఉండి.. ఒంటిపై ఖాకీ యూనిఫారం లేని సచివాలయ మహిళా పోలీసులు దిశ కోసం ఎంత చెప్పినా అక్కడక్కడ కొంత మంది యువత తప్పితే మిగిలిన ఎక్కవ శాతం మంది దిశయాప్ ని ఇనిస్టాల్ చేసుకునే పరిస్థితి కనిపిండం లేదు.

ఈ తరుణంలో రాష్ట్రప్రభుత్వం జిల్లా కలెక్టర్లను దిశయాప్ విషయంలో రంగంలోకి దించిన తరువాత నెలకి ఒకసారి చేపట్టే స్పెషల్ డ్రైవ్ లో మాత్రం అత్యధిక సంఖ్యలో యాప్ ఇనిస్టాల్స్ వస్తున్నాయి. తప్పితే వాటి వినియోగం, యాప్ పై అవగాహన మాత్రం ప్రజల్లో రావడం లేదు. అది జరగాలంటే స్టేషన్ పరిధిలోని ఎస్ఐ, సిఐ, డివిజన్ స్థాయిలో డిఎస్పీ, జిల్లా స్థాయిలో ఎస్పీ, రాష్ట్రస్థాయిలో డిజీపీ రంగంలోకి దిగితే తప్పా ఫలితం వచ్చేటట్టు కనిపించడం లేదు. ప్రస్తుతం పోలీసుశాఖలో ఎస్ఐ నుంచి డీజీపి వరకూ దిశ యాప్ పర్యవేక్షణ, అప్పుడప్పుడూ ప్రత్యేక కార్యక్రమాలు చేపడుతున్నారు తప్పితే.. దిశయాప్ ఇనిస్టాల్స్ చేయించే విషయంలో కొంతమంది రోడ్లపైకి వచ్చినా.. అధికశాతం స్టేషన్ స్థాయిలోనే పోలీసు సిబ్బంది రోడ్డుపైకి సీరియస్ గా వచ్చిన ప్రజలకు యాప్ చేరువ చేస్తున్నది తక్కువగా కనిపిస్తున్నది. ఏదో ప్రత్యేక కార్యక్రమాలు పెట్టినపుడు, ఉత్సవాలు ఊరేగింపుల్లో తప్పితే. ఇలా పర్యవేక్షణ చేసేకన్నా స్టేషన్ స్థాయిలో ప్రతిరోజూ ఇద్దరు లేదా ముగ్గు కానిస్టేబుళ్లతో మహిళా పోలీసులు కలిసి ప్రజల ముందుకి వెళితే ఖాకీ యూనిఫారం చూసిన భయంతోనో, భక్తితోనో లేదంటే గౌరవం తోనో..అదీ కాదనుకుండే యాప్ ఇనిస్టాల్ చేసుకోకపోతే ప్రత్యేక తలనొప్పి వస్తుందనే భయంతోనైనా దిశయాప్ ఇనిస్టాల్ చేసుకోవడానికి ముఖ్యంగా యువత ముందుకి వచ్చే అవకాశాలున్నాయి. లేదంటే గ్రామ, వార్డు సచివాలయ మహిళా పోలీసులు ప్రతీరోజూ గుడులు, బడులు, బస్ స్టాండ్లు, రైల్వే స్టేషన్లలో మార్కెంటింగ్ చేసే సిబ్బందిలా బాబ్బాబు అంటూ తిరిగి తిరిగి దిశ యాప్ ఇనిస్టాల్ చేయిస్తా ఉంటే.. వీరు అటు తిరిగే లోపు ఆ యాప్ ని డిలీట్ చేస్తున్నారు యువత. ఆ వాస్తవ సాంకేతిక కారణాలు, ఇబ్బందులు పర్యవేక్షణ చేసే పోలీసులకు తెలియడం లేదు. అంతేకాదు ఇదే కారణంతో చాలా మందికి యాప్ వినియోగించే అవకాశం, అవసరం కూడా రావడం లేదు. 

ముఖ్యంగా ప్రతీ ప్రభుత్వ ఉద్యోగి దిశయాప్ ఇనిస్టాల్ చేసుకోవడం ద్వారా వారు మిగిలిన వారికి దాని యొక్క ప్రాముఖ్యతను చెప్పడానికి ఆస్కారం వుంటుంది. అదేవిధంగా రాష్ట్రంలోని పోలీస్ బాస్ డీజీపి దగ్గర నుంచి స్టేషన్ లోని హోం గార్డు వరకూ యాప్ వారి ఫోన్లలో ఇనిస్టాల్ చేసుకోవాలి. గ్రామస్థాయిలో సచివాలయ సిబ్బంది, మండల స్థాయిలో మండల అధికారులు, జిల్లా స్థాయిలో జిల్లా అధికారులు,  కళాశాలలు, యూనివర్శిటీలు, వివిధ రాజకీయపార్టీల నేతలు ఇలా ప్రతీ ఒక్కరూ యాప్ ఇనిస్టాల్ చేసుకునే విధంగా కార్యాచరణ రూపొందించాలి. ముఖ్యంగా ప్రతీనెలా రాష్ట్రవ్యాప్తంగా దిశ యాప్ ద్వారా ఎంత మందిని పోలీసులు రక్షించారు. ఎంతమంది నిందులకు శిక్ష పడిందనే విషయాలు ప్రసార మాద్యమాల ద్వారా  తెలియజేయడంతోపాటు, జిల్లాస్థాయిలోనూ ఆ సమాచారం గ్రామాల వరకూ తెలిసేలా అదే సోషల్ మీడియా వేదికగా ప్రచారం చేయాల్సి వుంది.  అన్ని రకాల ప్రసార మాద్యమాల ద్వారా దిశయాప్ వినియోగంపై చతన్యపూరిత కధనాలు, ప్రసారాలు చేయించాలి. ముఖ్యంగా వాహననం నడిపే ప్రతీ ఒక్కరిలోనూ దిశయాప్ ఇనిస్టాల్ చేయించగలిగితే రాష్ట్రప్రభుత్వం లక్ష్యం నెరవేరడంతోపాటు దిశ చట్టంగా మారే అవకాశాలు కూడా వెతుక్కుంటూ వస్తాయి. పోలీసులు స్టేషన్ లో నుంచే పర్యవేక్షణ చేస్తున్నంత కాలం గ్రామ, వార్డు సచివాలయ మహిళా పోలీసు యాప్ ఇనిస్టాల్ చేయిస్తుంటే.. అంతే స్పీడులో యువత ఆ యాప్ ని డిలీట్ చేస్తూ ఉంటారనడంలో ఎలాంటి సందేహం పెట్టుకోవాల్సిన పనిలేదు..!?