కోవిడ్ 19 వ్యాప్తి నివారణకు అనేక జాగ్రత్తలు తీసుకుంటూ టీటీడీ భక్తులకు దర్శనం చేయిస్తున్న విధానం చాలా బాగా ఉందని షిర్దీ సంస్థాన్ ప్రతినిధులు ప్రశంసించారు. ఈ ఏర్పాట్లు షిర్దీ లో సాయి బాబా దర్శనం పునఃప్రారంభించడానికి ఎంతో ఉపయోగపడతాయని వారు చెప్పారు.  శ‌నివారం తిరుమ‌ల అన్న‌మ‌య్య భ‌వ‌నంలో టిటిడి ఉన్న‌తాధికారులు, షిర్డీ సంస్థాన్ అధికారుల బృందంతో టిటిడి ఛైర్మ‌న్  వైవి సుబ్బారెడ్డి స‌మావేశమయ్యారు. కరోనా వ్యాప్తి క‌ట్ట‌డికి జాగ్ర‌త్త‌లు తీసుకుంటూ టిటిడి భక్తులకు దర్శనం కల్పించడానికి చేపట్టిన ఏర్పాట్లు, భ‌క్తుల‌కు స‌దుపాయాలు క‌ల్పిస్తున్న తీరును ప‌రిశీలించ‌డానికి శ‌నివారం షిర్డీ సంస్థాన్ అధికారులు తిరుమ‌ల‌కు వ‌చ్చారు. ఈ సంద‌ర్భంగా నిర్వ‌హించిన స‌మావేశంలో కోవిడ్‌-19 ప‌రిస్థితుల్లో తిరుమ‌ల‌లో భ‌క్తుల‌కు క‌ల్పిస్తున్న ద‌ర్శ‌నం, వ‌స‌తి, క్యూలైన్ల నిర్వ‌హ‌ణ‌, అన్న‌దానం, శ్రీ‌వారి సేవ, అకౌంట్స్‌, ల‌డ్డూ ప్ర‌సాదం పంపిణీ కౌంట‌ర్ల నిర్వ‌హ‌ణ‌పై  టీటీడీ అధికారులు ప‌వ‌ర్‌పాయింట్ ప్ర‌జంటేష‌న్ ఇచ్చారు. అలాగే టిటిడి నిర్వ‌హిస్తున్న‌ సామాజిక‌, ధార్మిక కార్య‌క్ర‌మాల‌ను తెలియ‌జేశారు. మ‌హారాష్ట్ర ప్ర‌భుత్వం అనుమ‌తించిన అనంత‌రం షిర్డీలో భ‌క్తుల‌కు ద‌ర్శ‌నం క‌ల్పించ‌డానికి ఎలాంటి చ‌ర్య‌లు తీసుకోవాల‌నే అంశంపై షిర్డీ శ్రీ సాయిబాబా సంస్థాన్ అధికారులు టిటిడి నుండి సూచనలు, సలహాలు స్వీకరించారు.             ఈ సంద‌ర్భంగా టిటిడి ధ‌ర్మ‌క‌ర్త‌ల మండ‌లి అధ్యక్షులు  వైవి.సుబ్బారెడ్డి మాట్లాడుతూ కేంద్ర‌, రాష్ట్ర ప్ర‌భుత్వాల నిబంధ‌న‌ల మేర‌కు తిరుమ‌ల శ్రీ‌వారి బ్ర‌హ్మోత్స‌వాలు ఏకాంతంగా, ఎలాంటి లోపాలు లేకుండా ఆచార సంప్ర‌దాయాల ప్ర‌కారం వైభ‌వంగా నిర్వ‌హిస్తున్న‌ట్టు తెలిపారు. షిర్డీ ఆల‌యానికి ఉన్న డిపాజిట్ల‌పై ప్ర‌స్తుత క‌రోనా ప‌రిస్థితుల్లో అధిక వ‌డ్డీ స‌మ‌కూర్చుకునే అవ‌కాశాల‌పై షిర్దీ సంస్థాన్ టిటిడి నుంచి స‌ల‌హాలు స్వీక‌రించింద‌న్నారు. టిటిడి ఆన్‌లైన్‌లో క‌ల్పిస్తున్న ద‌ర్శ‌న టికెట్లు, వ‌స‌తి, విరాళాలు అందించ‌డం లాంటి ఇత‌ర స‌దుపాయాల‌ను షిర్డీ అధికారులు తెలుసుకున్నార‌ని చెప్పారు. ముఖ్య‌మంత్రి  వైఎస్‌.జ‌గ‌న్‌మోహ‌న్‌రెడ్డి ఆదేశంతో టిటిడి ద‌క్షిణాది రాష్ట్రాల్లో గుడికో గోమాత కార్య‌క్ర‌మాన్ని ప్ర‌యోగాత్మ‌కంగా ప్రారంభించ‌నుంద‌ని ఛైర్మ‌న్  సుబ్బారెడ్డి షిర్డీ సంస్థాన్ అధికారుల‌కు వివ‌రించారు. త‌మిళ‌నాడులో త్వ‌ర‌లో ఈ కార్య‌క్ర‌మాన్ని ప్రారంభిస్తామ‌న్నారు.  షిర్డీ సంస్థాన్ సిఈవో  కె.హ‌రిశ్చంద్ర భ‌గాటే మాట్లాడుతూ తిరుమ‌ల‌లో క్యూలైన్లు, అన్న‌ప్ర‌సాదం, ల‌డ్డూ ప్ర‌సాదం, భ‌ద్ర‌త త‌దిత‌ర అంశాల‌ను త‌మ బృందం ప్ర‌త్య‌క్షంగా ప‌రిశీలించింద‌ని చెప్పారు. టిటిడి అధికారులు ప‌వ‌ర్ పాయింట్ ప్ర‌జంటేష‌న్ ద్వారా వివ‌రించిన అంశాలు షిర్డీ సంస్థాన్‌కు ఎంత‌గానో ఉప‌యోగ‌ప‌డ‌తాయ‌న్నారు. టిటిడి అమ‌లుచేయ‌బోతున్న గుడికో గోమాత కార్య‌క్ర‌మం షిర్డీ సంస్థాన్ ఆధ్వ‌ర్యంలో కూడా ప్రారంభించాల‌ని టిటిడి ఛైర్మ‌న్ శ్రీ వైవి.సుబ్బారెడ్డి షిర్డీ సంస్థాన్ సిఈవో కె.హ‌రిశ్చంద్ర భ‌గాటేను కోరారు. ఈ మేర‌కు ధ‌ర్మ‌క‌ర్త‌ల మండ‌లి స‌భ్యుడు శ్రీ శివ‌కుమార్ త‌ర‌ఫున ఆయ‌న విన‌తిప‌త్రం అందించారు. టిటిడి ప్రారంభించ‌నున్న గుడికో గోమాత కార్య‌క్ర‌మానికి షిర్డీ సంస్థాన్ ఒక గోమాత‌ను దానంగా ఇస్తుంద‌ని సిఈవో చెప్పారు. తాము కూడా ఈ కార్య‌క్ర‌మాన్ని అమ‌లు చేయ‌డానికి షిర్డీ సంస్థాన్ పాల‌కమండ‌లితో చ‌ర్చిస్తామ‌న్నారు. శ్రీ వేంక‌టేశ్వ‌ర‌స్వామి, శ్రీ సాయిబాబా ఆశీస్సుల‌తో గుడికో గోమాత కార్య‌క్ర‌మం విజ‌య‌వంతం కావాల‌ని, గోజాతి ర‌క్షింప‌బ‌డాల‌ని ఆయ‌న ఆకాంక్షించారు. టిటిడి ఛైర్మ‌న్ శ్రీ వైవి.సుబ్బారెడ్డి మాట్లాడుతూ తాను షిర్డీ సంస్థాన్‌కు ఒక గోవును దానంగా అందిస్తాన‌ని చెప్పారు.              ఈ స‌మావేశంలో టిటిడి ఈవో అనిల్‌కుమార్ సింఘాల్‌, బోర్డు స‌భ్యులు  శివ‌కుమార్‌,  శేఖ‌ర్‌రెడ్డి, అద‌న‌పు ఈవో ఎవి.ధ‌ర్మారెడ్డి, జెఈవో  పి.బ‌సంత్‌కుమార్‌, సివిఎస్వో  గోపినాథ్ జెట్టి, ఎఫ్ఏసిఏవో బాలాజి, షిర్డీ సంస్థాన్ డెప్యూటీ సిఈఓ  రవీంద్ర ఠాక‌రే, హెచ్‌డివోలు  సోమ‌నాథ్‌, గోవింద్ పాల్గొన్నారు.