అన్నవరం శ్రీశ్రీశ్రీ వీరవేంకట సత్యన్నారాయణ స్వామివారి దేవస్థానంలో అడ్డదారిలో వసతి గదులు వ్యాపారం చేసే అక్రమార్కులకు చెక్ పెట్టడానికి ఈఓ చంద్రశేఖర ఆజాద్ వినూత్న చర్యలు మొదలు పెట్టారు. ఒక భక్తుడు ఒకసారి తన ఆధార్ నెంబరుతో వసతి గది తీసుకుంటే మళ్లీ 90రోజుల వరకూ గది తీసుకునే అవకాశం ఉండదు. గదులు తీసుకున్నప్పుడు, ఖాళీ చేసినపుడు బయో మెట్రిక్ ద్వారా వేలిముద్రలు తీసుకుంటారు. తద్వారా అడ్డదారిలో ముందుగానే గదులు బుక్ చేసే విధానానికి ఈఓ చెక్ పెట్టారు. ఒక కుటుంబం ఆ 90రోజుల్లో మధ్యల్లో స్వామివారిని దర్శించడానికి వచ్చిన సమయంలో ఇతర సభ్యుల ఆధార్ తో గదులు బుక్ చేసుకోవాల్సి వుంటుంది. మరోపక్క అన్నవరం దేవస్థానంలో మొత్తం గదులు, కళ్యాణ మండపాలు, ఇలా ఎంత మేరకు వసతి ఉన్నదో తెలిపే బోర్డులను సిఆర్ఓ కార్యాలయం దగ్గర ఏర్పాటు చేయడం విశేషం.