ఆంధ్రప్రదేశ్ లో గ్రామస్థాయిలోనే ప్రాధమిక వైద్యం అందించేందుకు రాష్ట్రప్రభుత్వం చర్యలు చేపట్టింది. రాష్ట్రంలోని అన్ని గ్రామసచివాలయాల పరిధిలో పదివేల 30 విలేజ్ క్లినిక్ లను ఏర్పాటు చేయనుంది. అవి మార్చి నెల నుంచి పనిచేయడం ప్రారంభిస్తాయని సమాచారం. కొన్ని నెలల పాటు విలేజ్ క్లినిక్ లోనే వైద్యసేవలు అందించిన తరువాత ప్రత్యేకంగా విలేజ్ క్లినిక్ లను కూడా నిర్మించి శాస్వతంగా అందులోనే గ్రామ ప్రజలకు 12 రకాల వైద్యసేవలు అందిస్తారు. తద్వారా గ్రామంలో ఎప్పుడు ఎవరికి జ్వరమొచ్చినా, ఒళ్లు నొప్పులు వచ్చినా వెంటనే విలేజ్ క్లినిక్ లకు వెళ్లి మందులు తీసుకోవడానికి వీలుపడుతుంది. గ్రామసచివాలయాల పరిధిలోనే విలేజ్ క్లినిక్ లను కూడా నిర్మించాలని ప్రభుత్వం భావిస్తుంది. కొన్ని సచివాలయాల్లో స్థలాలు లేని చోట సచివాలయంలో ఏదో ఒక ప్రాంతంలో దీనిని ఏర్పాటు చేస్తారు. ఆ మేరకు భవనాలకు సంబంధించిన స్థలాల ఎంపిక, భవన నిర్మాణాలకు గ్రౌండింగ్ చేపట్టడానికి ఇప్పటికే అన్ని జిల్లా కలెక్టర్లకు ఆదేశాలొచ్చాయి. ఆ మేరకు అన్నిజిల్లాల్లో స్థల పరీశీలన దాదాపు పూర్తయింది. బహుసా మార్చి నుంచి విలేజ్ క్లినిక్ ల నిర్మాణాలు ప్రారంభమై మూడు నెలల్లో పూర్తిస్థాయిలో భవనాలు కూడా అందుబాటులోకి రానున్నాయి. భవనాలన్నీ అందుబాటులోకి వస్తే..ప్రస్తతుం గ్రామసచివాలయాల్లో పనిచేస్తున్న ఆరోగ్య సహాయకులను విలేజ్ క్లినిక్ లకు అనుసంధానం చేస్తారు. వీరితోపాటు, బిఎస్సీ నర్శింగ్ చదివిన వారిని కూడా ఇందులో నియమిస్తారు. అంటే మరో పదివేల 30 మందికి ఉద్యోగ కల్పన జరగబోతుంది. అన్నీ అనుకున్నట్టు జరిగితే మార్చినెల నుంచే విలేజ్ క్లినిక్ లను ఏర్పాటు ఖాయంగా కనిపిస్తుంది. అయితే ఇదే విలేజ్ క్లినిక్ లలో ల్యాబ్ టెక్నీషియన్లను కూడా ఏర్పాటు చేస్తే షుగర్, మలేరియా, టైఫాయిడ్, రక్తపరీక్షలకు అవకాశం వుంటుందనే వాదన వినిపిస్తుంది. ఇక్కడ పరీక్షలు చేయించుకున్నవారు ప్రాధమికంగా ఇక్కడైనా లేదంటే, దగ్గర్లోని పీహెచ్సీ దగ్గరైనా నేరుగా వెళ్లి మందులు తీసుకోవడానికి అవకాశం వుంటుందని చెబుతున్నారు. అదే సమయంలో పీహెచ్సీల్లో సమయం వ్రుధాకాకుండా ఇక్కడ చేసిన రక్త పరీక్షలతో వైద్యుని రోగం తెలియజేసేందుకు అవకాశం వుంటుందని  అంటున్నారు. అయితే ఈ విషయంలో ప్రభుత్వం ఎలాంటి నిర్ణయం తీసుకుంటుందో వేచి చూడాలి..