ఆంధ్రప్రదేశ్ లోని గ్రామ, వార్డు సచివాలయాల్లో మిగిలివున్న ఉద్యోగాలపై ప్రభుత్వం కీలక నిర్ణయం తీసుకుంది. సెప్టెంబరు 20 నుంచి సచివాలయ ఉద్యోగాల భర్తీకి పరీక్షలు జరపాలని నిర్ణయించుకున్నట్టు రాష్ట్ర పురపాలక శాఖ మంత్రి బొత్స సత్యనారాయణ చెప్పారు. ఈ మేరకు గ్రామ, వార్డు సచివాలయ ఉద్యోగాల భర్తీపై ఆయన మంత్రి పెద్దిరెడ్డి రామచంద్రారెడ్డి, అధికారులతో సమీక్షించారు. వారం రోజుల పాటు సచివాలయ పరీక్షలను నిర్వహించాలని నిర్ణయించినట్టు బొత్స సత్యనారాయణ తెలిపారు. దాదాపు 10 లక్షల మంది అభ్యర్థులు పరీక్షలకు హాజరవుతారని మంత్రి పెద్దిరెడ్డి రామచంద్రారెడ్డి  వెల్లడించారు. ఖాళీలు అధికంగా ఉన్న పశుసంవర్థక అసిస్టెంట్ పోస్టుల భర్తీపై దృష్టి సారించాలని మంత్రులు అధికారులకు సూచించారు. పరీక్షల అనంతరం మొత్తం రెండు నెలల్లో భర్తీ ప్రక్రియ పూర్తిచేసి రాష్ట్రవ్యాప్తంగా అన్ని గ్రామసచివాలయాల ద్వారా ప్రజలకు సేవలందించాలన్న సీఎం వైఎస్ జగన్ మోహనరెడ్డి ఆదేశాలు అమలు చేస్తున్నట్టు మంత్రులు చెప్పారు.