పర్యాటక రంగంలో పెట్టుబడులు పెట్టేందుకు ముందుకొచ్చేవారికి అనువుగా నూతన పాలసీ ఉండేలా చర్యలు తీసుకోవాలని సీఎం వైఎస్ జగన్మోహనరెడ్డి అధికారులను ఆదేశివంచారు. ఏపీ టూరిజం నూతన పాలసీలో ప్రతిపాదించిన అంశాలను సీఎంకు వివరించిన అధికారులు, పాలసీ రూపకల్పనపై పర్యాటకశాఖ మంత్రి ముత్తంశెట్టి శ్రీనివాసరావుతో కలిసి సమీక్ష నిర్వహించారు. అంతకుముందు ఆంధ్రప్రదేశ్‌ టూరిజం ఆన్‌లైన్‌ట్రేడ్‌ రిజిస్ట్రేషన్‌ పోర్టల్‌ను ప్రారంభించారు. ఈ సంద్భంగా సీఎం మాట్లాడుతూ,  ప్రపంచ పర్యాటక రంగంలో ఏపీకి తగిన స్థానం కల్పించాలన్నారు. రాజస్థాన్‌తో దీటుగా పర్యాటక ప్రాంతాలను అభివృద్ధి చేయాలన్న సీఎం పర్యాటక రంగానికి ఏపీ చిరునామాగా మార్చాలని అధికారులను సూచించారు. ఆతిథ్యరంగంలో సుప్రసిద్ధ కంపెనీల భాగస్వామ్యం తీసుకోవాలని, అరుకులో ప్రపంచస్థాయి మౌలిక సదుపాయాలకు సీఎం అధికారులను ఆదేశించారు. హస్పిటాలిటీ మేనేజ్‌మెంట్‌లో మంచి కాలేజీ పెట్టాలన్న సీఎం ఈ కాలేజీ నుంచి బయటకు వస్తే తప్పనిసరిగా ఉద్యోగం వస్తుందనే విశ్వాసం, నమ్మకం ఉండేలా రూపొందించి నిర్వహణ చేపట్టాలన్నారు. ఏపిటీడీసీ ప్రాపర్టీస్,లోన్స్‌ విషయంలో ప్రభుత్వ డబ్బు ఎక్కడా దుర్వినియోగం కాకుండా చూడాలన్నారు. సగం పూర్తయిన ప్రాజెక్ట్‌లు ముందు పూర్తిచేయాలని అధికారులను ఆదేశించారు. కార్యక్రమంలో  రజత్‌ భార్గవ, (స్పెషల్‌ సీఎస్, టూరిజం, కల్చర్‌), ప్రవీణ్‌ కుమార్, (ఎండీ, ఏపీటీడీసీ), ఆ శాఖ ఉన్నతాధికారులు పాల్గొన్నారు.