తూర్పుగోదావరి జిల్లాలో టిడిపి బలం కొద్ది కొద్దిగా వీగిపోతుంది. రాజమండ్రి రూరల్  మాజీ ఎమ్మెల్యే చందన రమేష్ శనివారం సీఎం వైఎస్ జగన్ మోహనరెడ్డి ఆధ్వర్యంలో వైఎస్సార్సీపీ తీర్ధం పుచ్చుకున్నారు. దీనితో రాజమండ్రి రూరల్ మొత్తం వైఎస్సార్సీపీలోకి క్యూ కట్టడం ఖాయమని చెబుతున్నారు.  ముఖ్య మంత్రి క్యాంపు కార్యాలయంలో చేరిన ఆయన తనతోపాటు  కుమారుడు చందన నాగేశ్వర్ ను కూడా పార్టీలో చేర్చారు. ఈయనకి రూరల్ ప్రాంతంలోని యువతలో మంచి పట్టువుండటంతో టిడిపికి గట్టి దెబ్బే తగిలినట్టు అయ్యింది. ఈ సందర్భంగా వారు మీడియాతో మాట్లాడుతూ, రాష్ట్రంలో వైఎస్సార్సీపీ పరిపాలన, నిరుపేదలకు అండగా నిలిచిన సంక్షేమ కార్యక్రమాలే మమ్మల్ని పార్టీలోకి చేరడానికి ప్రేరేపించాయని అన్నారు. రాజమండ్రితోపాటు, రూరల్ ప్రాంతంలోని పార్టీ అభివ్రుద్ధికి శక్తివంచన లేకుండా క్రుషి చేయడంతోపాటు, అన్ని వర్గాల ప్రజలను కలుపుకొని ముందుకి సాగుతామని చెప్పారు. కార్యక్రమంలో ఎంపీ మార్గాని భరత్ తదితరులు పాల్గొన్నారు.