ఆర్గానిక్ ఆహార ఉత్పత్తులకు ప్రపంచవ్యాప్తంగా డిమాండ్ ఉందని, ఆర్గానిక్ ఉత్పత్తులపై ప్రజల్లో అవగాహన కల్పించాలని మిజోరం రాష్ట్ర గవర్నర్ కంభంపాటి హరిబాబు అన్నారు. విశాఖలోని గాదిరాజు ప్యాలెస్ లో గో-ఆధారిత ప్రకృతి వ్యవసాయదారుల సంఘం ఆధ్వర్యంలో4 రోజులపాటు జరిగే ఆర్గానిక్ మేళాకు ముఖ్యఅతిథిగా హాజరై మాట్లాడారు. ప్రకృతి, గో ఆధారిత వ్యవసాయం గురించి రైతుల్లో అవగాహన కల్పించడం ఎంతైనా అవసరం ఉందని అన్నారు. ఎరువులు, క్రిమిసంహారక మందులు అవసరం లేకుండా కేవలం గో పేడతో పంటలు పండించడం ద్వారా అనారోగ్యాల బారిన పడకుండా ఉంటామని అన్నారు. గతంలో మిద్దె వ్యవసాయం జరిగేదని, దీనిపై కూడా ప్రజల్లో అవగాహన కల్పించాలని ఆయన కోరారు. వ్యర్థాలను ఎరువులుగా మార్చి పంటలు పండించేందుకు కృషి చేయాలని ఆయన సూచించారు. ఐక్యరాజ్యసమితి ఈ సంవత్సరాన్ని మిల్లెట్ ఇయర్ గా ప్రకటించడం ముదావహమని అన్నారు.
రాష్ట్ర పరిశ్రమల శాఖ మంత్రి గుడివాడ అమర్నాథ్ మాట్లాడుతూ గత రెండు సంవత్సరాలు ఇక్కడ నిర్వహించిన ఆర్గానిక్ మేళా విజయవంతం కావడంతో ఈ సంవత్సరం కూడా ఈ కార్యక్రమాన్ని ఇక్కడ నిర్వహించడం సంతోషకరమని అన్నారు. కోవిడ్ అనారోగ్య సమస్యలను ఆర్గానిక్ పదార్థాలతో అధిగమించగలుగుతున్నామని చెప్పారు. వ్యవసాయ రంగంలో గణనీయమైన మార్పులు వస్తున్నాయని, కానీ ఎరువులు, క్రిమిసంహార మందులు లేకుండా పూర్వపు పద్ధతుల్లోనే వ్యవసాయం చేస్తే పోషకాలతో కూడిన ఆహారం అందుబాటులోకి వస్తుందని, తద్వారా మనుషుల జీవన ప్రమాణం పెరుగుతుందని మంత్రి అమర్నాథ్ అన్నారు. ప్రకృతి, గో ఆధారిత వ్యవసాయానికి ప్రభుత్వం నుంచి ప్రోత్సాహం ఉంటుందని అమర్నాథ్ చెప్పారు.ఈ సందర్భంగా మేళాలో ఏర్పాటు చేసిన స్టాల్స్ ను గవర్నర్ హరిబాబు మంత్రి గుడివాడ అమర్నాథ్ పరిశీలించారు.
