చిత్ర విచిత్రాలన్నీ ఆంధ్రప్రదేశ్ ప్రభుత్వంలోని 75వ ప్రభత్వ శాఖగా ఏర్పాటైన గ్రామ, వార్డు సచివాలయశాఖ సిబ్బంది విషయంలోనే జరుగుతాయనడానికి ఏలూరు జిల్లాలోని పశుసంవర్ధకశాఖలో సహాయ సంచాలకులు డా.టి.గోవిందరాజు పాల్పడిన అవినీతి సంఘటనే దానికి ప్రధాన ఉదాహరణ.. నిలువెత్లు సాక్ష్యం కూడా.. అంతేకాదు చేసిన అవినీతి ఆధారాలతో సహాయ బయటపడినా..  దాని నుంచి తప్పించుకోవడానికి  ఉన్నతాధికారుల అండదండలు.. నకిలీ సర్టిఫికేట్లతో ఉద్యోగాల్లోకి చేరిక మరికొంత మంది సచివాలయ పశు సంవర్ధక శాఖ సహాయకులతో మాష్టర్ ప్లాన్ వేసిన పశుసంవర్ధక శాఖ అవినీతి విచారణలో ట్విస్టులు మామూలుగా లేవంటే అతిశయోక్తి కాదేమో.. బహుసా మొదటి సారి విచారణలో అవినీతికి సంబంధించిన చూపించిన క్యాష్ ట్రాంజాక్షన్ ఆధారాలు, విహెచ్ఏ లు ఇచ్చిన వాంగ్మూలాలు, లిఖిత పూర్వక అంశాలు రాష్ట్ర అధికారులకి కనిపించలేదేమో.. లేదంటే చట్టంలోని లొసుగులను అడ్డం పెట్టుకొని ఫిర్యాదు చేసిన వారిని బెదిరించి.. అధిరించి.. తమ అధికారిని కాపాడుకోవడానికి పశుసంవర్ధకశాఖ రాష్ట్ర అధికారులు వేసిన పన్నాగం కూడా కావచ్చు.

 

లక్షలు కొల్లగొట్టి లక్షణంగా ఏమీ తెలియని సుద్దపూసలా బయట పడటానికి సదరు పసుసంవర్ధకశాఖ ఏడీ డా.టి.గోవివరాజు వేస్తున్న మాస్టర్ ప్లాన్ లన్నీ.. ఈయనపై ప్రభుత్వానికి ఫిర్యాదులు చేసిన గ్రామీణ పశుసంవర్ధక సహాయకులు చెబుతున్న వివరాలు తెలుసుకుంటే కళ్లు బైర్లు కమ్మడం ఖాయం. ఆంధ్రప్రదేశ్ ప్రభుత్వం గ్రామ, వార్డు సచివాలయాల్లోని పశు సంవదర్ధక శాఖ సహాయకులకు ఎర్న్ లీవ్ ల కోసం ఎన్ కేష్ చేసుకోవడానికి ఉత్తర్వులు జారీ చేసింది. అయితే వాటిని బిల్లులు పెట్టే క్రమంలో ఉమ్మడి పశ్చిమ గోదావరి జిల్లా వ్యాప్తంగా సుమారు 350కి పైగా పశు సంవర్ధక సహాయకుల నుంచి ఒక్కొక్కరి దగ్గర నుంచి రూ.3500 నుంచి 5000 వరకూ వసూళ్లు చేశారు పశుసంవర్ధకశాఖ ఏడీ. ప్రభుత్వం నుంచి తమకు న్యాయబద్దంగా రావాల్సిన వాటికి డబ్బులు ఎందుకు ఇవ్వాలని జిల్లా కార్యాలయంలోని అధికారులను అడిగితే మామూళ్లు ఇస్తే తప్పా బిల్లులు పెట్టేది లేదని తెగేసి చెప్పడంతో గత్యంతరం లేక అడిగినంత మొత్తం కట్టేశారు. 

తరువాత వెంటనే జరిగిన బదిలీల్లో కూడా మెరిట్ ప్రాతిపదికన కాకుండా ఒక్కొక్కరి దగ్గర నుంచి సుమారు లక్ష రూపాయల వరకూ తీసుకొని అర్హులైన వారి స్థానాలను మామూళ్లు ఇచ్చిన వారికి కట్ట బెట్టారు. దీనితో ఒళ్లు మండిన ఉద్యోగులు పీఆర్జీఎస్ లో ఫిర్యాదు చేశారు. దాని క్రమ సంఖ్య ఈఐఆర్ 20250530117 ఆధారంగా సదరు అధికారిపై అధికారిక విచారణ ఏర్పాటు చేశారు. ఆ సమయంలో పశుసంవర్ధకశాఖ ఏడీ అడిగిన మొత్తాలు ఇచ్చినట్టు పోన్ పే రుజువులన్నీ విచారణలో బయటపెట్టారు. విచారణలో విహెచ్ఏలంతా మూకుమ్మడిగా ఏడీకి చేసిన అవినీతిని రుజువు చేశారు.తమే ఏ విధంగా హించించారో.. ఎలా బెదిరంచారో కూడా చెప్పారు. అంతే ఆధారాలతో  సహా చేసిన అవినీతి బయట పడటంతో అందరూ ఈ అధికారి సస్పెండ్ అవుతారని అనుకున్నారు.. కానీ ఇక్కడ సీన్ రివర్స్ అయ్యింది. అనూహ్యంగా  మళ్లీ ఇక్కడే అసలు ట్విస్టు ప్రారంభమైంది. 

-రాష్ట్ర అధికారులు, తేడా విహెచ్ఏలతో మాష్టర్ ప్లాన్ వేశారిలా..

అవినీతి వ్యవహారాలు విచారణలో వాస్తవాలు, ఆధారాలతో బయట పడితే  ఆంధ్రప్రదేశ్ సివిల్ సర్వీసెస్  (సిసిఅండ్ఏ) రూల్స్ 1991, సబ్ రూల్(1) రూల్(8) ప్రకారం అవినీతి అధికారిని కాంపిటెంట్ అధికారి(రాష్ట్రశాఖ అధికారులు) ద్వారా  సస్పెండ్ చేయాలి.. కానీ ఈ అవినీతి అధికారి విషయంలో మా చెల్లికి పెళ్లి జరగాలి మళ్లీ మళ్లీ అన్నట్టుగా ఒక సారి జరిగిన విచారణ సరిగా జరగలేదని చెప్పి.. ఫిర్యాదు చేసిన విహెచ్ఏలలో కొందరిని బెదిరించి వారి పేరుతో ప్రత్యేకంగా అర్జీ పెట్టి మరీ రెండవసారి విచారణ నవంబరు 27కి వేయించుకున్నాడా అ అధికారి.. దానికి రాష్ట్ర కార్యాలయంలోని అధికారులు కూడా పూర్తి సహకారం అందించారు. దానికి కారణం కూడా లేకపోలేదు.. ఈయన మరో రెండు మూడేళ్లలో ఉద్యోగ విరమణ చేయనున్నారు. ఈ సమయంలో తమ శాఖ అధికారి ఇబ్బందులు పడటం ఇష్టం లేకనో లేదంటే చేసిన అవినీతిలో కాస్త అధికారులకు ఇచ్చారనో తెలీదు గానీ.. చట్టంలోని అంశాలను అవకాశం చేసుకొని.. అవినీతి ఆధారాలు బయట పడినా.. విచారణ సక్రమంగా జరగలేదని మరోసారి విచారణ వేయించుకోగలిగారు. 

ఇక్కడ మరో ట్విస్టు ఏంటంటే... ఫిర్యాదు చేసిన వారికి కూడా విచారణ ఎప్పుడు చేస్తామో కూడా రాష్ట్ర అధికారులు కనీసం సమాచారం ఇవ్వలేదు. అంటే ఫిర్యాదు చేసిన వారు విచారణకు రాకపోయినా.. ఎక్కువ మంది అవినీతి చేసిన అధికారికి అనుకూలంగా విచారణలో వాంగూల్మం ఇచ్చినా ఫిర్యాదులను విచారణ అధికారులు కొట్టేస్తారు. ఈ లొసుగును పావుగా వినియోగించుకొని.. ఇదే పశు సంవర్ధకశాఖలోని నకిలీ సర్టిఫికేట్లతో విధుల్లో చేరిన వారిని పోగు చేసి.. తనకు అనుకూలంగా.. ఫిర్యాదు చేసిన వారికి వ్యతిరేకంగా విచారణలో వాంగ్మూలం ఇచ్చేందుకు గ్రౌండ్ లెవల్ లో అంతా ఏర్పాటు చేసుకున్నారు. ఇపుడు నేటి విచారణకు ఫిర్యాదు చేసిన వారిలో చాలా మందికి ఇప్పటికే వార్నింగులు ఇచ్చారట. వారు విచారణ కు వచ్చే పరిస్థితి లేదు.. అయితే సమాచారం అందుకున్న ఫిర్యాదు దారుల్లో కొందరు విచారణకు హాజరై వాస్తవాలు విచారణ అధికారుల ముందు పెట్టనున్నారు.

-విహెచ్ఏ లనకిలీ సర్టిఫికేట్ల వ్యవహారంపై విజిలెన్స్ విచారణ.?

పశ్చిమ గోదావరి జిల్లాలోని గ్రామ, వార్డు సచివాలయశాఖలో నకిలీ సర్టిఫికేట్లతో విధుల్లోకి చేరిన అంశం ఇపుడు రాష్ట్ర పశుసంవర్ధక శాఖలో కలకలం రేపుతోంది. ఎక్కువ మంది ఈ జిల్లాలోనే దొడ్డిదారిన విధుల్లో చేరినట్టు ప్రాధమికంగా రూఢీ కావడంతో సదరు ఉద్యోగుల వివరాలతో కూడిన సమాచారాన్ని రాష్ట్రప్రభుత్వానికి నివేదించడంతో వారిపై విచారణ జరుగుతున్నట్టుసమాచారం అందుతుంది. అలాంటి వారిలో కొందరిని నేడు విచారణ జరుగుతున్న సమయంలో తనకు అనుకూలంగా వాంగ్మూలం ఇచ్చేందుకు పశుసంవర్ధక శాఖ ఏడీ ముందుగానే మాట్లాడుకొని ఏర్పాటు చేసినట్టు తెలిసింది. తన అవినీతి వ్యవహారం ఇప్పటికే కొన్నిఆధారాలతో బయట పడిందని.. అయితే విచారణ సరిగా జరగలేదని మళ్లీ అధికారుల కాళ్లా వేళ్లా పడి మీరిచ్చిన రిప్రజెంటేషన్ తోనే మళ్లీ నేడు విచారణ జరుగుతుందని.. ఆ విచారణ మమ అనిపించేస్తే అవినీతి వ్యవహారం నుంచి బయటపడిపోతానని సదరు విహెచ్ఏలకు చెప్పినట్టు తెలిసింది. తమకు నకిలీ సర్టిఫికేట్ల అంశం నుంచి బయట పడేస్తే తాము మీ వెంట ఉంటామని కూడా సదరు తేడా విహెచ్ఏలు తోడుగా ఉంటామని కూడా మాటిచ్చారట. ఇక్కడ ట్విస్టు ఏంటంటే ఎవరెవరు జరిగిన అవినీతికి, అవినీతి రుజువులకు వ్యతిరేకంగా వాంగ్మూలం ఇచ్చేవారి వివరాలు.. ముందుగా రాష్ట్ర కార్యాలయాలనికి ఫిర్యాదులు వెళ్లిన వారి పేర్లు ట్యాలీ అయితే వారి సర్టిఫికేట్లపై అధికారికంగా విచారణ సాగే అవకాశాలున్నాయని రాష్ట్ర సచివాలయంలోని  ఉన్నతాధికారులు స్పష్టం చేస్తున్నారు.

-ఉద్యోగాలు పోయినా అవినీతిని, వేధింపులను బయట పెడతాం-విహెచ్ఏలు

అవినీతిని ఆధారాలతో సహా విచారణ అధికారుల మందు వాస్తవాలు బయట పెట్టినందుకు ఏడీ డా.గోవిందరాజు తమను ఏం చేసినా.. ఎన్ని ఇబ్బందులు పెట్టినా తాము సిద్దంగా ఉన్నామని.. ఉద్యోగాలు తీయించడానికి రాష్ట్ర అధికారులతో కుమ్మక్కై వ్యవహారం నడిపినా ఎక్కడా వెనక్కి తగ్గేది లేదని ప్రభుత్వానికి ఫిర్యాదు చేసిన విహెచ్ఏలు స్పష్టం చేశారు. విచారణ విషయం బయటకు మీడియాలో రాకుండా నేటి వరకూ చాలా జాగ్రత్త పడ్డారని.. అయినా డబ్బులు ఇచ్చిన ఆధారాలన్నీ విచారణ అధికారుల ముందు పెడతామని..స్పష్టం చేశారు. ఇప్పటికే అవినీతిని గత విచారణలో అధికారుల ముందు బయట పెట్టినందుకు తమను చాలా దారుణంగా ఇబ్బందులు పెట్టారని.. బదిలీల్లో అయితే అవినీతిని ప్రశ్నించినా వారిని జిల్లా చివారకు బదిలీలు కూడా చేశారని వాపోయారు. విచారణ తేదీని ఫిర్యాదు చేసిన తమకు తెలియకుండా జాగ్రత్తలు పడ్డారని.. కానీ ఆ సమాచారం మాలో కొందరికి తెలిసిందని.. అంతా కలసి విచారణలో తమ వాంగ్మూలం ఇస్తామని విహెచ్ఏలు ఏ మీడియా సహకరించకపోవడంతో  ఈరోజు-ఈఎన్ఎస్ కి తో తమ గోడును చెప్పారు. 

ఎర్న్ లీవ్ ఎన్ కేష్ మెంట్ సమయంలో విహెచ్ఏ ల దగ్గర 3500 నుంచి 5000 వరకూ ఎలా డబ్బులు వసూలు చేశారో కొన్ని ఆధారాలున్నాయని.. అదేవిధంగా బదిలీల సమయంలో నేరుగా లక్షల్లో నగదు పుచ్చుకున్నారని.. కొంత ఆన్ లైన్ ట్రాన్జాక్షన్ అధికారి బ్యాంకు ఖాతా కాకుండా ఇతరుల ఖాతాలకు మళ్లించారని.. ఇపుడు ఆ సమాచారాన్ని కూడా బయటకు తీసే ప్రయత్నం చేస్తున్నామని కూడా బాధిత విహెచ్ఏలు వాపోయారు. అవినీతి చేయడమే కాకుండా విహెచ్ఏలను ముప్పు తిప్పలు పెట్టి నానా రకాలుగా వేధించిన అవినీతి అధికారిని వెంటనే విధుల నుంచి సస్పెండ్ చేయాలని డిమాండ్ చేస్తున్నారు. ఈ విషయంలో ఆధారాలు చూపిన మాకు ఏం జరిగినా దానికి బాధ్యత కూడా తమ అధికారే బాధ్యత వహించాల్సి వుంటుందని కూడా విహెచ్ఏలు స్పష్టం చేస్తున్నారు. 

కాగా కొందరు విహెచ్ఏలను ఇప్పటికే విధుల నుంచి సస్పెండ్ చేస్తాం.. డిప్యుటేషన్ దూరంగా వేస్తాం.. షోకాజ్ నోటీసులు ఇస్తామని బెదిరించడంతో వాళ్లలో చాలా మంది నేడు విచారణకు వచ్చే పరిస్థితి లేదని తాము భావిస్తున్నామని.. మరికొందరికి సమాచారం అందలేదని చెప్పారు. తాము మాత్రం ఏదోలా సమాచారం తెలుసుకున్నామని..నేడు విచారణ అధికారుల ముందు వాస్తవాలు బయట పెడతామని స్పష్టం చేశారు. కాగా ఈ విషయమై సదరు పశుసంవర్ధక శాఖ అధికారిని వివరణ కోరేందుకు ప్రయత్నించగా ఆయన అందుబాటులోకి లేరు.. అటు రాష్ట్ర అధికారులు ఫిర్యాదు దారులకు సమాచారం అందించామని చెప్పి ఫోన్లు పెట్టేశారు..!