ప్ర‌తి ఒక్క‌రూ కోవిడ్ ప‌ట్ల అప్ర‌మ‌త్తంగా ఉండాల‌ని కోవిడ్ -19 నిబంధ‌న‌లు పాటించాల‌ని జిల్లా కలెక్టర్ ఎ. సూర్య‌కుమారి హెచ్చ‌రించారు. అన్ని ప్రభుత్వ, ప్ర‌యివేటు కార్యాల‌యాల్లో కోవిడ్ నిబంధ‌న‌లు విధిగా పాటించాల‌ని, ప్ర‌తి ఒక్క‌రూ మాస్కు ధ‌రించేలా ఆయా విభాగాధిప‌తులు చ‌ర్య‌లు తీసుకోవాల‌ని శుక్రవారం జారీ చేసిన ఉత్త‌ర్వుల్లో ఆమె పేర్కొన్నారు. నాలుగో వేవ్ పై ప్ర‌జ‌ల‌ను అప్ర‌మ‌త్తం చేయ‌టంలో కింది స్థాయి నుంచి జిల్లా స్థాయి వ‌ర‌కు అన్ని శాఖ‌ల అధికారులు భాగ‌స్వామ్యం కావాల‌ని ఆదేశించారు. ప్ర‌జా ప్రతినిధులు, ప్ర‌జాసంఘాల స‌భ్యులు, స్వ‌చ్చంద సేవా సంస్థ‌ల నిర్వాహ‌కుల నుంచి స‌హాయం పొందాల‌ని సూచించారు. స‌ఖి గ్రూపుల స‌భ్యుల సేవ‌ల‌ను సద్వినియోగం చేసుకోవాల‌న్నారు.
కేంద్ర, రాష్ట్ర ప్రభుత్వ ఆదేశాల మేర‌కు ప్ర‌తి ఒక్క‌రూ కోవిడ్ నాలుగో ద‌శ ప్ర‌మాదంపై ముంద‌స్తు చ‌ర్య‌లు చేప‌ట్టాల‌ని పేర్కొన్నారు. ఇంటింటికీ వెళ్లి ప్ర‌జ‌ల‌ను అప్ర‌మ‌త్తం చేయాల‌ని సూచించారు. ఆరు మీట‌ర్ల భౌతిక దూరం పాటించాల‌ని, గుమిగూడ‌రాద‌ని హిత‌వు ప‌లికారు. ప్ర‌తి ఒక్క‌రూ మాస్కు ధ‌రించాల‌ని, శానిటైజ‌ర్ వినియోగించాల‌ని సూచించారు. వైద్య సిబ్బంది త‌గిన చ‌ర్య‌లు తీసుకోవాల‌ని ప్ర‌జ‌లు భ‌య‌భ్రాంతుల‌కు గురికాకుండా ధైర్యం నింపాల‌ని పేర్కొన్నారు.
