భూ హక్కు పత్రాలు భూమిని కొనుగోలు చేసిన వారికి మాత్రమే అందేలా చర్యలు తీసుకోవాలని పశ్చిమగోదా వరి జెసి జె.వి మురళీ తాసిల్దార్ లను ఆదేశించారు.సోమవారం భీమవరం కలెక్టరేట్ నుంచి వీడియో కాన్ఫరెన్స్ ద్వారా వివిధ అంశాలపై రెవెన్యూ అధికారులు, సిబ్బందితో సమీక్షించారు. ఈ సందర్భంగా జెసి మాట్లాడుతూ భూమిని అమ్మకం జరిపిన కేసులకు సంబంధించి భూమిని కొనుగోలు చేసిన వారికే భూ హక్కు పత్రాలను అందజేయాలని సూచించారు. వారితో ముటేషన్స్ కి దరఖాస్తు చేయించి ఈకేవైసీ ద్వారా పేరు మార్పును చేయాల్సిందిగా సూచించారు. పేదలకు స్థలాలు కేటాయించిన చోట ఇళ్ల పట్టాలు పొందడానికి సుముఖంగా లేని వారి కారణాలను పొందుపరచి సమర్పించాలన్నారు.
ఇళ్ల పట్టాలకు అవసరమైన భూమిని గుర్తించే ప్రక్రియ త్వరగా పూర్తి చేయాలన్నారు. స్మశాన వాటిక లకు స్థల కేటాయింపులలో తగు జాగ్రత్తలు తీసుకోవాలన్నారు, అభ్యంతరం ఉన్న పోరంబోకు స్థలాలకు ప్రత్యామ్నాయంగా వేరే స్థలాలను గుర్తించాలన్నారు. భూ రీసర్వే పనులను వేగవంతంగా పూర్తి చేయడంతో పాటు, పొరపాట్లకు తావులేని విధంగా రికార్డులను రూపొందించాలన్నారు. వీడియో కాన్ఫరెన్స్ లో ఇన్చార్జి జిల్లా రెవెన్యూ అధికారి దాసిరాజు, నరసాపురం సబ్ కలెక్టర్ సూర్య తేజ, తాసిల్దార్ లు, ఎంపీడీవోలు, రెవెన్యూ సిబ్బంది పాల్గొన్నారు.
