నవరత్నాలు పేదలందరికీ ఇళ్లు పథకంలో భాగంగా తొలిదశలో ప్రారంభించిన గృహాలన్నిటినీ రానున్న మార్చినాటికి సిద్దం చేయాలని జిల్లా కలెక్టరు డా.కృతికా శుక్లా అధికారులను ఆదేశించారు. మంగళవారం కాకినాడ కలెక్టరేట్ నుంచి హౌసింగ్, విద్యుత్, ఆర్డబ్ల్యూఎస్, మండల ప్రత్యేక అధికారులతో కలిసి క్షేత్రస్థాయిలో గృహ నిర్మాణాల పురోగతిపై అన్ని మండలాల అధికారులు, మున్సిపల్ కమిషనర్లుతో వీడియో కాన్ఫరెన్స్ ద్వారా సమీక్షించారు. ఈ సందర్భంగా కలెక్టరు కృతికా శుక్లా మాట్లాడుతూ రాష్ట్ర ప్రభుత్వం ప్రతిష్టాత్మకంగా అమలు చేస్తున్న నవరత్నాలు పేదలందరికీ ఇళ్లు పథకం కింద చేపట్టిన గృహ నిర్మాణాలు నిర్దేశించిన లక్ష్యానికి అనుగుణంగా పనుల్లో పురోగతి చూపాలన్నారు. తొలి దశలో జిల్లాలో 18,003 గృహ నిర్మాణాలు ప్రారంభించడం జరిగిందన్నారు.
ఇందులో ఇప్పటి వరకు10,300 గృహాలు పూర్తి అయ్యాయని ఇంకా మిగిలిన గృహాలన్నిటిని మార్చి నెల ఉగాది నాటికి గృహప్రవేశాలకు సిద్దం చేయాలని జిల్లా కలెక్టరు ఆదేశించారు. ఇందుకు సమన్వయ శాఖల అధికారులు, మండల ప్రత్యేక అధికారులు కృషి చేయాలన్నారు. త్వరితగతిన స్టేజ్ కన్వర్షన్ జరిగే చూడాలన్నారు. నిర్మాణానికి అవసరమైన ఇసుక, సిమెంట్ ఇతర మెటీరియల్ ను అందుబాటులో ఉండే విధంగా చూడాలన్నారు. స్వయం సహాయక సంఘాలలో ఉన్న మహిళా లబ్ధిదారులకు రుణాల మంజూరు వేగవంతం చేయాలని కలెక్టర్ తెలిపారు. రూప్ లెవెల్ దశలో ఉన్న గృహాలపై ప్రత్యేక దృష్టి పెట్టి పూర్తిచేసే విధంగా చూడాలని గృహాలు పూర్తయిన వాటికి తాగునీరు, విద్యుత్ కనెక్షన్లు తక్షణమే అందించాలని కలెక్టరు కృతికా శుక్లా అధికారులకు స్పష్టం చేశారు.
