ప్రముఖ వాగ్గేయకారుడైన కర్ణాటక సంగీత సామ్రాట్‌ శ్రీత్యాగరాజస్వామివారి 176వ ఆరాధనోత్సవం జనవరి 12వ తేదీ గురువారం తిరుపతిలోని ఎస్వీ సంగీత కళాశాలలో జరుగనుంది. శ్రీత్యాగరాజస్వామివారు పుష్యబహుళ పంచమి నాడు పరమపదించిన సందర్భంగా ఈ కార్యక్రమాన్ని నిర్వహించనున్నారు. ఇందులో భాగంగా కళాశాలలోని ఓపెన్ ఆడిటోరియంలో ఉదయం 10 నుంచి మధ్యాహ్నం 1 గంట వరకు ఘనరాగ పంచరత్న కృతులు, ఉత్సవ సంప్రదాయ, దివ్యనామ సంకీర్తనలను తిరువయ్యార్ పద్ధతిలో బృందగానం చేస్తారు. కళాశాల ప్రిన్సిపాల్ సుధాకర్ ఆధ్వర్యంలో ఇందుకోసం ఏర్పాట్లు పూర్తయ్యాయి.
