విశాఖలో ఈ ఏడాది మార్చిలోజరగనున్న రెండు అంతర్జాతీయ సదస్సులను విజయవంతం చేసేందుకు వివిధ పరిశ్రమల యాజమాన్యాలు సహకరించాలని రాష్ట్ర పరిశ్రమల శాఖ మంత్రి గుడివాడ అమర్నాథ్ విజ్ఞప్తి చేశారు. అనకాపల్లి, విశాఖ జిల్లాలలోని భారీ పరిశ్రమల ప్రతినిధులతో సోమవారం విశాఖ జిల్లా పరిషత్ లో ఏర్పాటు చేసిన కన్సల్టెంట్ కం ఇంట్రాక్షన్ మీటింగ్లో మంత్రి మాట్లాడారు. మార్చి 3, 4 తేదీల్లో గ్లోబల్ ఇన్వెస్ట్మెంట్ సదస్సు విశాఖపట్నంలో నిర్వహించనున్నామని, అదే నెల 28,29,30వ తేదీలలో భారతదేశం నాయకత్వం వహిస్తున్న జీ-20 సదస్సు విశాఖలో అత్యంత ప్రతిష్టాత్మకంగా నిర్వహించబోతున్నామని చెప్పారు. ఈ సమావేశానికి 45 దేశాలకు చెందిన సుమారు 250 మంది ప్రతినిధులు పాల్గొననున్నారని అని చెప్పారు. ఇటువంటి జి20 సదస్సులు దేశంలోని 50 ప్రాంతాలలో నిర్వహించనున్నారని, మౌలిక సదుపాయాల అంశంపై విశాఖ నగరంలో జీ 20 సదస్సు జరగబోతుందని మంత్రి అమర్నాథ్ తెలియజేశారు.
ప్రపంచ ప్రాముఖ్యత కలిగిన ఈ సదస్సుకు రాష్ట్ర ప్రభుత్వం ఆతిథ్యమివ్వటం మనమంతా గర్వంగా భావించాలని, ఈ సదస్సును విజయవంతం చేయడం ద్వారా రాష్ట్రానికి ఎన్నో ప్రయోజనాలు చేకూరనున్నాయని ఆయన చెప్పారు. ప్రపంచ ఆర్థిక రంగంలో 75% ఆదాయాన్ని సమకూర్చుతున్న దేశాల ప్రతినిధులు ఈ సదస్సుకు హాజరు కావడం గమనార్హమని మంత్రి అమర్నాథ్ తెలియజేశారు. గతంలో విశాఖ నగరంలో అనేక జాతీయ, అంతర్జాతీయ సదస్సులు జరిగాయని, ఆయా సదస్సులను దృష్టిలో పెట్టుకుని నగరంలో తాత్కాలిక సుందరీ కారణ పనులు చేపట్టారని, ఈసారి ఆ విధంగా కాకుండా శాశ్వత ప్రాతిపదికన పనులు జరగాలని మంత్రి అమర్నాథ్ విజ్ఞప్తి చేశారు. పనుల నాణ్యత కూడా అంతర్జాతీయ స్థాయిలో ఉండాలని ఆయన సూచించారు. నగర సుందరీకరణకు సంబంధించి ఏ పనులు చేయాలో ఇప్పటికే ఒక జాబితా సిద్ధం చేశామని వీటిలో ఏ పనులునైనా పరిశ్రమల యాజమాన్యాలు తీసుకుని పూర్తి చేయవచ్చని ఆయన సూచించారు.
ఆర్కే బీచ్ నుంచి భీమిలి వరకు ఉన్న బీచ్ రోడ్డును అభివృద్ధి చేయడం, నగరంలో ఉన్న పర్యాటక కేంద్రాలను విదేశీయులను ఆకట్టుకునే విధంగా తీర్చిదిద్దడం వంటి పనులు శరవేగంగా చేపట్టాలని ఆయన సూచించారు. అలాగే అరకు కాఫీ మ్యూజియం వంటి అనేక పర్యాటక ప్రదేశాలను సుందరీకరించాలని అమర్నాథ్ కోరారు.
కలెక్టర్ మల్లికార్జున మాట్లాడుతూ రాష్ట్ర సంస్కృతి, సంప్రదాయాలు ప్రపంచానికి తెలిసే విధంగా సుందరీకరణ పనులు జరగాలని పరిశ్రమల యాజమాన్య ప్రతినిధులను కోరారు. రాష్ట్ర ప్రభుత్వం, జీవీఎంసీ కలిసి సుమారు 200 కోట్ల రూపాయలతో ఈ సుందరీకరణ పనులు చేయబోతున్నాయని ఆయన చెప్పారు .నగరం మొత్తం మీద సుమారు 148 కిలోమీటర్ల రోడ్డును పూర్తిస్థాయిలో అభివృద్ధి చేయనున్నామని, విద్యుదీకరణ, సుందరీకరణకు సంబంధించి సుమారు 150 పనులు చేపట్టనున్నామని ఆయన చెప్పారు. కేంద్ర ప్రభుత్వం కూడా విశాఖ సదస్సును ప్రతిష్టాత్మకంగా తీసుకున్న నేపథ్యంలో వివిధ పరిశ్రమల యాజమాన్యాలు నగరాభివృద్ధి పనులలో కీలకపాత్ర పోషించాలని కలెక్టర్ మల్లికార్జున విజ్ఞప్తి చేశారు.
