జాతీయ ఫైలేరియా నియంత్ర‌ణ కార్య‌క్ర‌మంలో భాగంగా ఫైలేరియా నిర్మూల‌న‌కు ఫిబ్ర‌వ‌రి 10వ తేదీన పెద్దఎత్తున ప్ర‌జ‌ల‌కు ఉచితంగా మాత్ర‌లు పంపిణీ చేసి, వేయించే కార్య‌క్ర‌మాన్ని నిర్వ‌హించ‌నున్న‌ట్లు జిల్లా కలెక్టర్ డా. కృతికా శుక్లా తెలిపారు. మంగ‌ళ‌వారం కాకినాడ క‌లెక్ట‌రేట్ నుంచి కలెక్టర్ డా. కృతికా శుక్లా అధ్య‌క్ష‌త‌న ఫైలేరియా నియంత్ర‌ణ‌పై జిల్లా స‌మ‌న్వ‌య క‌మిటీ (డీసీసీ) స‌మావేశం వ‌ర్చువ‌ల్‌గా జ‌రిగింది. ఈ సంద‌ర్భంగా కలెక్టర్ కృతికా శుక్లా మాట్లాడుతూ రెండేళ్ల‌కు పైబ‌డిన వారికి ఫైలేరియా నివారణ మాత్ర‌లు (డై ఇథైల్ కార్బ‌మెజైన్‌-డీఈసీ, ఆల్‌బెండ‌జోల్‌) పంపిణీ చేసి, వేసుకునేలా చ‌ర్య‌లు తీసుకోవాల‌ని ఆదేశించారు. ఈ కార్య‌క్ర‌మం ఆవ‌శ్య‌క‌త‌పై ప్ర‌జ‌ల‌కు గ్రామ, వార్డు స‌చివాల‌య స్థాయిలో అవ‌గాహ‌న క‌ల్పించాల‌ని సూచించారు.
స‌మ‌న్వ‌య శాఖ‌ల అధికారులు కార్య‌క్ర‌మాన్ని విజ‌య‌వంతం చేసేందుకు ఆయా శాఖ‌ల క్షేత్ర‌స్థాయి సిబ్బందికి శిక్ష‌ణ కార్య‌క్ర‌మాలు నిర్వ‌హించాల‌న్నారు. వ‌య‌సు ఆధారంగా ఇవ్వాల్సిన మాత్ర‌లు, డోస్ త‌దిత‌రాల‌పై అవ‌గాహ‌న పెంపొందించాల‌న్నారు. తిన్న త‌ర్వాతే మాత్ర‌లు వేసుకోవాల్సి ఉంటుంద‌ని, ఈ విష‌యంపై సిబ్బందికి అవ‌గాహ‌న క‌ల్పించాల‌ని సూచించారు. ఈ కార్య‌క్ర‌మం జ‌రిగే రోజున పీహెచ్‌సీ స్థాయిలో వైద్య అధికారులు అప్ర‌మ‌త్తంగా ఉండాల‌ని ఆదేశించారు. స‌మావేశానికి జెడ్‌పీ సీఈవో ఎన్‌వీవీ స‌త్య‌నారాయ‌ణ, డీఎంహెచ్‌వో డా. ఎం.శాంతిప్ర‌భ, డీసీహెచ్ఎస్ డా. పీబీవీ విష్ణువ‌ర్ధిని, జిల్లా మ‌లేరియా అధికారి ఎస్‌.భాస్క‌ర్, జిల్లా పంచాయ‌తీ అధికారి ఆర్‌.విక్ట‌ర్ త‌దిత‌రులు హాజ‌ర‌య్యారు.
