కేంద్ర ప్రభుత్వం వైజాగ్ స్టీల్ ప్లాంట్ ను ప్రైవేటు పరం చేస్తున్నవేళ విశాఖ మహానగర పాలక సంస్థ(జివిఎంసీ)కి కట్టాల్సిన పన్నులపై రాష్ట్రప్రభుత్వం బకాయిలను రాబట్టుకునే పనిలో పడింది. జివిఎంసీకి స్టీల్ ప్లాంట్ సుమారు 400 కోట్ల రూపాయలకు పైగానే పన్నులు చెల్లించాల్సి వుంది. గతంలో కేంద్ర ప్రభుత్వ సంస్థ కావడంతో కొద్ది కొద్దిగా పన్నులు వసూలు చేసుకుంటూ వచ్చింది. ఇదే సమయంలో స్టీలు ప్లాంటు ప్రైవేటు పరం అయిపోతే రాష్ట్ర ప్రభుత్వానికి రావాల్సిన పన్నులన్నీ స్టీల్ ప్లాంట్ నష్టాల్లో చూపిస్తారా అనే చర్చ ఇపుడు విశాఖలో జోరుగా సాగుతుంది. దీపముండగానే ఇల్లు చక్కబెట్టుకోవాలనే సామెత ఇపుడు షడన్ గా జీవిఎంసీకి గుర్తొచ్చింది. దీనితో రెవిన్యూ విభాగం విశాఖ స్టీలు ప్లాంట్ నుంచి రావాల్సిన పన్నులను చిట్టాను తనిఖీ చేసి..ఇప్పటి వరకూ ఎంతమేర బకాయిలున్నాయనే కోణంలో లెక్కలు వేస్తుంది. కేంద్ర ప్రభుత్వం ఆగమేఘాలపై స్టీలు ప్లాంటుని ప్రైవేటీకరించే పనిలో పడినందున స్టీలు ప్లాంట్ నుంచి బకాయిలు పడ్డవారంతా కూడా యాజమాన్యంపై ఒత్తిడి తెస్తున్నారు.
ప్లాంటు ఉంచాలని రాజకీయం ఏ స్థాయిలో ఒత్తిడి పడుతుందో అదే స్థాయిలో విద్యుత్ బకాయిలు, జివిఎంసీ పన్ను బకాయిలు, ఉద్యోగుల ఇన్కం టాక్స్ బకాయిలు, జిఎస్టీ బకాయిలు ఇలా సమస్తం రాబట్టుకోవాలనే పనిలో రాష్ట్రప్రభుత్వం చాలా సీరియస్ గా లెక్కలు వేస్తుంది. ఏ శాఖలకు చెందిన ముఖ్య అధికారులు వారి వారి పరిధిలో రావాల్సిన పన్నులను లెక్కలు వేసి రాబట్టడానికి అన్ని ఏర్పాట్లు చేసుకుంటున్నారు. ఈ అవకాశం ఒకవేళ పోతే ఎవరైతే నష్టాల్లో ఉన్న స్టీలు ప్లాంటుని కొనుగోలు చేస్తున్నారో వారి దగ్గర నుంచి బకాయిలు రాబట్టుకోవడానికి చాలా సమయం పడుతుంది. దానికోసం ప్రస్తుం స్టీలుప్లాంట్ కేంద్ర ప్రభుత్వ సంస్థగా ఉన్నప్పుడు మాత్రమే ఈ బకాయిలు వసూలు చేసుకుంటే ఇదొక చరిత్రగా అయినా మిగిలిపోతుందనేది బకాయిలు వసూలు చేసుకునే ప్రభుత్వ శాఖల ఆలోచనగా కనిపిస్తుంది. ఈ తరుణంలోనే జీవిఎంసీకి బకాయిపడ్డ మొత్తం పన్నులను సింగిల్ టేక్ లో రాబట్టుకోవాలని గట్టిగానే ప్రయత్నం చేస్తున్నారు.
అన్నీ అనుకున్నట్టు జరిగితే జీవిఎంసీ గళ్లా పెట్టి కొత్త పాలక వర్గం కొలువుతీరిన మలి సమావేశానికల్లా గలగల లాడనుంది. స్టీలు ప్లాంటుతోపాటు, కేంద్ర ప్రభుత్వం మరో 34 సంస్థలను ప్రైవేటీకరించే యోచనలో ఉన్నందున విశాఖలోని అన్ని కేంద్ర ప్రభుత్వ సంస్థల బకాయిలను వసూలు చేసుకోకపోతే తరువాత ఆ నష్టాలను రాష్ట్రప్రభుత్వం భరించాల్సి వుంటుంది. అందులోనూ జీవిఎంసీలో చాలా పనులకు నిధులు లేకపోవడంతో ప్రజల నుంచి ప్రభుత్వ సంస్థల నుంచి స్టీలు ప్లాంటు నుంచి ఎంత త్వరగా వీలైతే అంతే త్వరగా బకాయి పన్నులన్నీ రాబట్టుకోవాలని యోచిస్తుంది. స్టీలు ప్లాంట్ ప్రైవేటీకరణ నేపథ్యంలో విశాఖ మహానగర పాలక సంస్థ ఏ మేరకు బకాయి పన్నులు వసూలు చేస్తుందనేది ఇపుడు సర్వత్రా ఆశక్తిని రేపుతుంది.
