రాష్ట్రంలో ఉత్తరాంధ్రాతోపాటు పలు ప్రాంతాల్లో శాసనమండలి ఎన్నికల షెడ్యూలు విడుదల చేసినందున ఎన్నికల కోడ్ కఠినంగా అమలు చేయాలని రాష్ట్ర ప్రధాన ఎన్నికల అధికారి ముఖేష్ కుమార్ మీనా అధికారులను ఆదేశించారు. ఎన్నికల ప్రచారంలో ఉద్యోగులు పాల్గొనరాదని తెలిపారు. ఓటర్లను ప్రలోభ పెట్టుటకు ప్రయత్నించకూడదని తెలిపారు. రాష్ట్ర ప్రధాన ఎన్నికల అధికారి ముఖేష్ కుమార్ మీనా శాసనమండలి, స్థానిక సంస్థల ఎన్నికలపై జిల్లాకలెక్టర్లు, జిల్లా ఎన్నికల అధికారులు,రిటర్నింగు అధికారులు, సహాయ రిటర్నింగు అధికారులు మరియు ఎన్నికల రిటర్నింగు అధికారులతో గురువారం వీడియో కాన్ఫరెన్స్ నిర్వహించారు. ఎన్నికల నిర్వహణ సన్నద్దత, ఓటర్ల జాబితా తయారీ, చేర్పులు, డూప్లికేట్ మరియు అనర్హుల తొలగింపు, ఎన్నికల ఏర్పాట్లు, పోలింగు అధికారులు, సిబ్బంది నియామకం, పోలింగు కేంద్రాలు ఏర్పాటు, సిబ్బందికి పోలింగుపై శిక్షణ తదితర అంశాలపై సమీక్ష నిర్వహించారు.
జిల్లా కలెక్టరు నిశాంత్ కుమార్ మాట్లాడుతూ శాసనమండలి ఎన్నికల నిర్వహణకు కావలసిన ఏర్పాట్లు చేస్తున్నట్లు తెలిపారు. జిల్లాలో ఓటర్ల జాబితా తయారీ ప్రక్రియ గూర్చి తెలియజేసారు. శాసనమండలి ఎన్నికలకు 24 పోలింగు కేంద్రాలు ఏర్పాటు చేసామని, అవసరమైన బ్యాలెట్ బాక్సులు సిద్దం చేసినట్లు, పోలీసు బందోబస్తుకు ప్రణాళిక తయారు చేస్తున్నట్లు తెలిపారు. ఈ కార్యక్రమంలో జిల్లారెవిన్యూ అదికారి జె.వెంకటరావు, కలెక్టరు కార్యాలయ పరిపాలనాధికారి ఆర్. ఉమామహేశ్వరరావు, ఎన్నికల సెక్షను సూపరింటెండెంటు డి.రవి హాజరయ్యారు.
