ప్ర‌తీ మూడు నెల‌ల‌కోసారి నిర్వ‌హించే లోక్ అదాల‌త్‌ను క‌క్షిదారులు ఉప‌యోగించుకోవాల‌ని, జిల్లా ప్ర‌ధాన న్యాయ‌మూర్తి బి.సాయి క‌ల్యాణ‌చ‌క్ర‌వ‌ర్తి కోరారు. రాజీమార్గం ఎంతో శ్రేయ‌స్క‌ర‌మ‌ని ఆయ‌న సూచించారు. జాతీయ లోక్ అదాల‌త్‌ను జిల్లా కోర్టు స‌ముదాయంలో శ‌నివారం ఆయ‌న ప్రారంభించారు. ఈ సంద‌ర్భంగా ప్ర‌ధాన న్యాయ‌మూర్తి మాట్లాడుతూ, మంచి జీవితం కావాలంటే స‌మ‌స్య‌ల‌ను ప‌రిష్క‌రించుకొని, ప్ర‌శాంతంగా ఉండాల‌ని సూచించారు. రాజీమార్గం ద్వారా కేసుల‌ను ప‌రిష్క‌రించుకోవ‌డం ద్వారా ఎంతో స‌మ‌యం ఆదా అవుతుంద‌ని చెప్పారు. ఇత‌ర కేసుల‌తోపాటు భార్యాభ‌ర్త‌ల గొడ‌వ‌ల‌ను కూడా లోక్ అదాలత్ ద్వారా పరిష్కరించుకోవాలని సూచించారు. రోడ్డు ప్ర‌మాదాల‌కు సంబంధించిన కేసుల‌ను మూడు నెల‌ల్లోనే ప‌రిష్క‌రించ‌డం జ‌రుగుతోంద‌న్నారు. జిల్లా అద‌న‌పు న్యాయ‌మూర్తి కె.రాధార‌త్నం మాట్లాడుతూ, ఏ స‌మ‌స్య‌కైనా త‌ప్ప‌కుండా ప‌రిష్కారం ఉంటుంద‌ని స్ప‌ష్టం చేశారు.
పెద్ద‌ల స‌మ‌క్షంలో స‌మ‌స్య‌ల‌ను ప‌రిష్క‌రించుకోవ‌చ్చున‌ని, సివిల్ కేసుల‌ను రాజీ చేసుకోవ‌చ్చ‌ని, కుటుంబ త‌గాదాల‌ను రాజీ చేసుకొని సంతోషంగా ఉండాల‌ని సూచించారు. దేశ‌వ్యాప్తంగా నిర్వ‌హిస్తున్న జాతీయ లోక్ అదాలత్, కేసుల ప‌రిష్కారానికి చ‌క్క‌టి మార్గ‌మ‌ని అన్నారు. నాల్గ‌వ అద‌న‌పు న్యాయ‌మూర్తి (ఎస్‌సి, ఎస్‌టి ట్ర‌యిల్‌ కేసుల ప్ర‌త్యేక న్యాయ‌మూర్తి), షేక్ సికింద‌ర్ భాషా మాట్లాడుతూ, రాజీయే రాజ‌మార్గ‌మ‌న్న‌ది లోక్ అదాలత్ ఉద్దేశ‌మ‌ని పేర్కొన్నారు. సివిల్ కేసులు, చిన్న‌చిన్న క్రిమిన‌ల్ కేసుల‌ను కూడా రాజీ ద్వారా ప‌రిష్క‌రించుకోవ‌చ్చ‌ని సూచించారు. ఫ్యామిలీకోర్టు న్యాయ‌మూర్తి ఎం.మీనాదేవి మాట్లాడుతూ, లోక్ అదాల‌త్‌ను క‌క్షిదారులు స‌ద్వినియోగం చేసుకొని త‌మ కేసుల‌ను పరిష్కరించుకోవాలని కోరారు.
ముఖ్యంగా ఐదు సంవ‌త్స‌రాలు పైబ‌డిన కేసుల‌పై దృష్టి పెట్టాల‌ని సూచించారు. జిల్లా బార్ అసోసియేష‌న్ అధ్య‌క్ష‌లు బి.సంజీవ‌రావు మాట్లాడుతూ, సుప్రీంకోర్టు, హైకోర్టు ఆదేశాల‌కు అనుగుణంగా ఈ మెగా లోక్ అదాల‌త్‌ను నిర్వ‌హించ‌డం జ‌రుగుతోంద‌ని చెప్పారు. లోక్ అదాలత్ ద్వారా స‌త్వ‌ర‌మే న్యాయం జ‌రుగుతుంద‌ని, తిర‌గాల్సిన అవ‌స‌రం ఉండ‌ద‌ని అన్నారు. జిల్లా న్యాయ‌సేవ‌ల సంస్థ కార్య‌ద‌ర్శి, సీనియ‌ర్ సివిల్ జ‌డ్జి బిహెచ్‌వి ల‌క్ష్మీకుమారి, ప‌లువురు న్యాయ‌వాదులు, బార్ అసోసియేష‌న్ ప్ర‌తినిధులు పాల్గొన్నారు.
