ఉత్తరాంధ్రా శాసన మండలి ఎన్నికలకు సిద్ధం కావాలని జిల్లా ఎన్నికల అధికారి, జిల్లా కలెక్టర్ శ్రీకేష్ లాఠకర్ ఆదేశించారు. సోమవారం జిల్లా కలెక్టర్ కార్యాలయ సమావేశ మందిరంలో శాసన మండలి ఎన్నికలకు సంబంధించి పట్టభద్రులు, స్థానిక సంస్థల నియోజక వర్గాల నోడల్ అధికారులతో ఆయన సమావేశం నిర్వహించారు.  ఈ సందర్భంగా ఆయన మాట్లాడుతూ అత్యవసరమైతే తప్ప రెవెన్యూ సిబ్బంది ఎన్నికల సమయంలో సెలవులు పెట్టరాదన్నారు. పట్టభద్రులకు సంబంధించి 59 పోలింగ్ స్టేషన్లు, స్థానిక సంస్థల ఎన్నికలకు 4 పోలింగ్ కేంద్రాలు ఉంటాయన్నారు. సమస్యాత్మక ప్రాంతాలు గుర్తించాలని, పోలీసు బందోబస్తు ఏర్పాటుకు తగు చర్యలు తీసుకోవాలని పోలీసు అధికారులకు తెలిపారు. పిఓ, ఎపిఓలకు  శిక్షణ తరగతులు ఏర్పాటుకు చర్యలు తీసుకోవాలని డిఆర్డిఎ పిడి, కొవ్వాడ ఎస్డీసిలను ఆదేశించారు.  అందుబాటులో ఉన్న బ్యాలెట్ బాక్స్ లు సిద్ధంగా ఉంచుకోవాలన్నారు.

డిపిఓ పోలింగ్ కు సంబంధించి మెటీరియల్ చూసుకోవాలని,  ఎన్నికల నియమావళి సిపిఓ, సింగిల్ విండో ఫర్మిషన్ సెట్ శ్రీ సిఇఓ చూడాలన్నారు. సూక్ష్మ పరిశీలకులుగా బ్యాంకు, పోస్టల్ సిబ్బందికి శిక్షణ తరగతులు ఏర్పాటు లీడ్ బ్యాంక్ మేనేజర్ చర్యలు తీసుకోవాలని, బ్యాలెట్ పేపర్ మెప్మా పిడి, వెబ్ కాస్టింగ్ వీడియో గ్రాఫర్లు, ఫొటోగ్రఫీ హౌసింగ్ పీడీ చూసుకోవాలని ఆదేశించారు.  నామినేషన్లకు సంబంధించిన అన్ని ఏర్పాట్లు చేసి సిద్ధంగా ఉంచుకోవాలన్నారు. ఎప్పటికప్పుడు రిపోర్టులు ఎన్నికల కమీషన్ కు పంపేందుకు చర్యలు తీసుకోవాలన్నారు.  స్ట్రాంగ్ రూం వద్ద ఏర్పాట్లు చూసుకోవాలన్నారు. ఎన్నికల మెటీరియల్ కు సంబంధించి అందరి నోడల్ అధికారులతో డిపిఓ కో ఆర్డినేట్ చేసుకోవాలన్నారు.  ఎన్నికల పనులపై నిర్లక్ష్యం వహించరాదన్నారు.  ఎన్నికల సామగ్రిని ముందుగానే తరలించే విధంగా చర్యలు తీసుకోవాలని రవాణా శాఖ, ఆర్టీసీ అధికారులను ఆదేశించారు.

ఈ సమావేశంలో ఆర్డీవోలు సీతారామమూర్తి, బి. శాంతి, ఉప కలెక్టర్ మురళీకృష్ణ, డిపిఓ రవి కుమార్, మున్సిపల్ కార్పొరేషన్ కమిషనర్ చల్లా ఓబులేసు, డిఆర్డిఎ పిడి విద్యాసాగర్, ఆర్ అండ్ బి ఎస్ఈ కాంతిమతి, హౌసింగ్ పీడీ గణపతిరావు, కలెక్టరేట్ ఏవో రాజేశ్వరరావు, తహసీల్దార్ వెంకటరావు, తదితరులు పాల్గొన్నారు.