శ్రీ కాళహస్తీశ్వర స్వామి వారి కల్యాణోత్సవం సందర్భంగా టీటీడీ తరపున ఈవో  ఎవి ధర్మారెడ్డి దంపతులు సోమవారం సాయంత్రం పట్టువస్త్రాలు సమర్పించారు . వీరితో పాటు టీటీడీ ధర్మకర్తల మండలి సభ్యులు పోకల అశోక్ కుమార్, టీటీడీ చైర్మన్  వైవి సుబ్బారెడ్డి సతీమణి స్వర్ణలత కూడా పట్టు వస్త్రాలు సమర్పించారు. ఆలయం వద్దకు చేరుకున్న వీరికి  ఆలయ ధర్మకర్తల మండలి చైర్మన్  అంజూరు శ్రీనివాసులు, ఈవో సాగర్ బాబు, పాలకమండలి సభ్యులు స్వాగతం పలికారు. దేవాంగుల మండపంలో అర్చకులు ధర్మారెడ్డికి తలపాగా చుట్టి  పట్టు వస్త్రాలు తలమీద ఉంచారు. అక్కడి నుంచి ఊరేగింపుగా ఆలయానికి చేరుకున్న ఈవో దంపతులు, ఇతర ముఖ్యులతో కలసి సోమ స్కంధమూర్తి,  జ్ఞాన ప్రసూనాంబ కు పట్టు వస్త్రాలు సమర్పించారు.  అనంతరం శ్రీ వాయులింగేశ్వరుడు, శ్రీ జ్ఞాన ప్రసూనాంబ అమ్మవారు, శ్రీ గురు దక్షిణామూర్తి దర్శనం చేసుకున్నారు. అర్చకులు వేద ఆశీర్వచనం చేసి తీర్థ, ప్రసాదాలుఅందించారు. తిరుమల శ్రీవారి ఆలయ పారుపత్తే దారు  ఉమామహేశ్వరరెడ్డి ఈ కార్యక్రమంలో పాల్గొన్నారు.