విశాఖపట్నం -విజయనగరం-శ్రీకాకుళం ఉమ్మడి జిల్లాల పట్టభద్రులు నియోజకవర్గ శాసనమండలి ఎన్నికలు -2023 పోలింగ్ అనంతరం ఆరు జిల్లాల నుండి అన్ని బ్యాలట్ బాక్సులు స్వర్ణ భారతి ఇన్డోర్ స్టేడియంకు చేరుకున్నాయి . బ్యాలెట్ బాక్సులను జిల్లా కలెక్టర్ డా.ఎ.మల్లికార్జున , ఎన్నికల పరిశీలకులు సిద్దార్ధ్ జైన్ , ఆరు జిల్లాల డిఆర్వోలు , అభ్యర్థుల సమక్షంలో ఆరు స్ట్రాంగ్ రూములలో భద్రపరచి సీల్ వేశారు. ప్రత్యేక బందో బస్తు కూడా ఏర్పాటు చేశారు. వీటిని మళ్లీ కౌంటింగ్ రోజున అధికారుల సమక్షంలోనే సీల్ విప్పి బయటకు తీస్తారు. ఉత్తరాంధ్ర జిల్లాల్లోని రాత్రి పదిగంటల వరకూ ఎన్నిక జరగడంతో బ్యాలెట్ బాక్సులు రావడం ఆలస్యం అయ్యింది. కట్టుదిట్టమైన భద్రత మధ్యవీటిని విశాఖ తీసుకు వచ్చారు. జాయింట్ కలెక్టర్ కె ఎస్ విశ్వనాథన్ , డి సి పి సుమిత్ సునిల్ గరుడ్ , డిఆర్వో శ్రీనివాస మూర్తి , ఎలక్షన్ సిబ్బంది తదితరులు పాల్గొన్నారు.
