ఉత్తరాంధ్ర పట్టభద్రుల నియోజవకర్గ ఎమ్మెల్సీ ఓట్ల లెక్కింపులో అభ్యర్ధులను ఆదిలోనే పోస్టల్ ఇన్వాలీడ్ ఓట్లు ముచ్చెమటలు పట్టించా యి. ఒకటి కాదు రెండు కాదు ఏకంగా 228 పోస్టల్ బ్యాలెట్ ఓట్లు చెల్లకుండా పోయాయి. ఆరుజిల్లాల్లో కలిపి 767 పోస్టల్ బ్యాలెట్లు అధికార యంత్రంగాం ఎన్నికల విధుల్లోకి పాల్గొన్నవారికి జారీచేసింది. అయితే అందులో 583 మంది మాత్రమే ఓటును వినియోగించుకోగా మళ్లీ అందులోనే 228 ఓట్లు చెల్లకుండా పోయాయి. దీనితో పోస్టల్ బ్యాలెట్ సుభ సూచికం అనుకున్న అభ్యర్ధులకు గుండెల్లో రాయి పడినట్టు అయ్యింది. పోస్టల్ బ్యాలెట్ పరిస్థితే ఈ విధంగా ఉంటే చాలా చోట్ల బ్యాలెట్ లో ప్రాధాన్యత ఓట్లు సక్రమంగా వేయలేదనే ప్రచారం జరిగింది. సాధారణ బ్యాలెట్ పేపర్లు పరిశీలన తరువాత ఇంకెన్ని ఓట్లు చెల్లకుండా పోతాయోననే ఆందోళన బరిలో ఉన్న అభ్యర్ధులు వ్యక్తం చేశారు. ఇప్పటికే ఎన్నికల ఫలితాలపై హై కోర్టు స్టే ఇచ్చిన నేపథ్యంలో ఒక్కో చేదువార్త అభ్యర్ధులను మరింత ఆందోళనకు గురిచేస్తున్నది.
