శ్రీవారి సేవకులు ఎప్పటిలాగే ఈ సారి కూడా ఒంటిమిట్ట శ్రీ కోదండరామస్వామి బ్రహ్మోత్సవాలు,కళ్యాణోత్సవంలో భక్తులకు చక్కని సేవలు అందించాలని టీటీడీ జేఈవో వీరబ్రహ్మం పిలుపునిచ్చారు. బ్రహ్మోత్సవాల నిర్వహణలో భాగంగా ఆదివారం ఒంటిమిట్టలో శ్రీవారి సేవకు లతో ఆయన సమావేశమయ్యారు. ఈ సందర్బంగా జేఈవో మాట్లాడుతూ, ఏప్రిల్ 5వ తేదీ స్వామివారి కల్యాణం రోజున సాయంత్రం 4 గంటల నుండే భక్తులు గ్యాలరీల్లోకి వస్తారని అన్నారు .భక్తులకు అన్నప్రసాదం, లడ్డూ ప్రసాదం,అక్షింతలు,పసుపు,కుంకుమ , వాటర్ పాకెట్లు ఉంచిన బ్యాగు అందిస్తామని చెప్పారు. శ్రీవారి సేవకులు గ్యాలరీల్లో ఉండి భక్తులందరికీ ఈ బ్యాగులు అందించాలని చెప్పారు. భక్తులతో మర్యాద పూర్వకంగా, ఓపికతో వ్యవహరించాలన్నారు.
శ్రీవారి సేవకులు ఎక్కడ సేవ చేయాలో నిర్ణయించి అందుకు సంబంధించిన పాసులు ముందే ఇస్తామని జేఈవో చెప్పారు. సేవకోసం వచ్చే వారికి ఆహారం ఇతర సదుపాయాలు కల్పిస్తామని ఆయన తెలిపారు. టీటీడీలో శ్రీవారి సేవ విభాగానికి ఎంతో గౌరవం గుర్తింపు ఉన్నాయన్నా రు. ఒంటిమిట్ట బ్రహ్మోత్సవాల్లో అద్భుత సేవలందించి ఈ పేరు నిలుపుకోవాలని వీరబ్రహ్మం కోరారు. ఎస్వీబీసి సిఈఓ షణ్ముఖ్ కుమార్, టీటీడీ చీఫ్ ఇంజినీర్ నాగేశ్వరరావు, పిఆర్వో డాక్టర్ రవి, జిఎం ట్రాన్స్ పోర్ట్ శేషారెడ్డి ,శ్వేత డైరెక్టర్ ప్రశాంతి, విజివో మనోహర్ పాల్గొన్నారు.
