విశాఖ జిల్లాలో బ్యాక్ లాగ్ ఉద్యోగాల భర్తీలో భాగంగా ఎస్సీ , ఎస్టీ  లకు కేటాయించిన 20 పోస్టులను భర్తీచేస్తూ జిల్లా జాయింట్ కలెక్టర్ కె ఎస్ విశ్వనాథన్ ఉత్తర్వులు జారీ చేశారు. ఈ మేరకు స్ధానిక కలెక్టర్ కార్యాలయంలో శనివారం ఎస్‌ సి, ఎస్‌ టి బ్యాక్‌ లాగ్‌ పోస్టులకు అన్ని అర్హతల తో ఎంపికైన 20 మందికి జాయింట్ కలెక్టర్‌ ఉద్యోగ నియామక పత్రాలు అందజేశారు. 2019- 20 సంవత్సరానికి గాను 14 పోస్టులు , 2020-21  సంవత్సరానికి గాను 6 పోస్టులకు  సంబంధించి ఎస్సీ , ఎస్టీ బ్యాక్ లాగ్ ఉద్యోగాలకు ప్రత్యేక నోటిఫికేషన్ జారీ చేశారు. ధరఖాస్తు చేసుకొని, ప్రతిభ ఆధారంగా  అర్హులైన అభ్యర్థులకు  ఆఫీస్ సబార్డినేట్, క్లాస్ రూం అటెండెంట్ మొదలగు పోస్టులకు సంబంధించి జాయింట్ కలెక్టర్ నియామక పత్రాలు అందజేశారు. ఈ సందర్భంగా జాయింట్ కలెక్టర్ మాట్లాడుతూ ఉద్యోగాలు పొందిన అభ్యర్థులు అంకితభావంతో విధులు నిర్వహించి సమాజంలో వెనుకబడిన వారి అభ్యున్నతికి తమ వంతు సేవలు అందించాలని పిలుపునిచ్చారు.  ఈ కార్యక్రమంలో డిఆర్ఓ శ్రీనివాసమూర్తి , ఎస్సీ కార్పొరేషన్ ఎగ్జిక్యూటివ్  డైరెక్టర్ రమణ మూర్తి , కలెక్టరేట్ పరిపాలన అధికారి ఈశ్వర రావు, రెవెన్యూ సిబ్బంది తదితరులు పాల్గొన్నారు.