ఆంధ్రప్రదేశ్ లో రూ.450 కోట్లతో 10,960 డిజిటల్‌ లైబ్రరీలను ప్రభుత్వం ఏర్పాటు చేస్తుందని రాష్ట్ర గ్రంధాలయ పరిషత్‌ చైర్మన్‌ మందపాటి శేషగిరిరావు ప్రకటించారు. శ్రీ గౌరీ గ్రంథాలయంలో ఆదివారం ‘గ్రంథాలయాలు`సాంకేతిక పరిజ్ఞానం’ అంశంపై జరిగిన సదస్సుకు ముఖ్య అతిధిగా హాజరైన ఆయన మాట్లాడుతూ ఇప్పటికే కడపలో మొదటి డిజిటల్‌ లైబ్రరీ ఏర్పాటైందని, అన్ని జిల్లాల్లో దశల వారీగా నిర్మాణ పనులు జరుగుతున్నాయన్నారు. గ్రంధాలయాల్లో సాంకేతిక భాగస్వామ్యం కావాలని ఆయన పిలుపునిచ్చారు. స్ధానిక సంస్ధలు పన్ను చెల్లింపు దారుల నుంచి వసూలు చేస్తున్న గ్రంథాలయ సెస్‌తో రాష్ట్రంలోని గ్రంథాలయ పురోగాభివృద్ధికి కృషి చేస్తామన్నారు. ఈ ఉగాదిని ‘జగన్‌ డిజిటల్‌ శోభకృత నామ సంవత్సరం’గా గ్రంథాలయ పరిషత్‌ తరుపున నామకరణం చేశామన్నారు. రాష్ట్రంలోని అన్ని యూనివర్సిటీలలో ఏప్రిల్‌ 5 నుండి ‘విజనరీ జగన్‌’ పేరుతో సదస్సులు నిర్వహిస్తున్నామన్నారు. రాష్ట్రంలో గ్రంథాలయాల్లో పుస్తకాల కొనుగోలుకు రూ.15.75 కోట్లు ప్రభుత్వం కేటాయించిందని, ఇప్పటి వరకు రూ.10 కోట్లతో పుస్తకాలను కొనుగోలు చేసి గ్రంథాలయాలకు అందజేశామన్నారు.
గత ప్రభుత్వాలు గ్రంథాలయ వ్యవస్ధను పూర్తిగా నిర్వీర్యం చేశాయని, పదేళ్లుగా ఒక్క పుస్తకం కూడా కొనుగోలు చేయకపోవడమే నిదర్శమని ఆయన ఆరోపించారు. ‘యువత-భవిష్యత్‌-వైఎస్‌ ఆర్‌ డిజిటల్‌ లైబ్రరీ’ అంశం ఇతివ్తృతంగా ప్రత్యేక సంకలనంకు రాష్ట్ర గ్రంథాలయ పరిషత్‌ శ్రీకారం చుట్టిందని శేషగిరిరావు చెప్పారు. రాష్ట్ర వ్యాప్తంగా గ్రంథాలయాలకు శాశ్వత భవనాల నిర్మాణానికి చర్యలు తీసుకుంటున్నామన్నారు. గ్రామాలకు విజ్ఞాన వీచికలు అందాలన్న లక్ష్యంతో దేశంలో ఏ రాష్ట్రంలోనూ లేని విధంగా ఆంధ్రప్రదేశ్‌లో డిజిటల్‌ గ్రంథాలయాలను ఏర్పాటు చేసామన్నారు. పేదోళ్లకు విద్య, విజ్ఞానాన్ని అందించాలన్న లక్ష్యంతో విద్యాశాఖలో పలు సంస్కరణలు తీసుకువచ్చిన ఘనత సీఎం వై.ఎస్‌.జగన్మోహన్‌ రెడ్డికు దక్కిందన్నారు. గ్రంధాలయాల పురోభివృద్ధే లక్ష్యంగా పరిషత్‌ పనిచేస్తుందన్నారు.
జిల్లా ప్రభుత్వాస్పత్రి సూపరింటెండెంట్‌, ఏపీ వైద్య విధాన పరిషత్‌ జిల్లా ఆసుపత్రుల సమన్వయకర్త డాక్టర్ పేరాల శ్రావణ్‌కుమార్‌ మాట్లాడుతూ శ్రీ గౌరీ గ్రంథాలయం డిజిటల్‌ లైబ్రరీ ద్వారా కొన్నేళ్లుగా విద్య, విజ్ఞానం అందించడం అభినందనీయమన్నారు. గ్రంథాలయాలతోనే పురాతన సంస్కృతి, సంప్రదాయం, మేధోసంపత్తి, ఉజ్వల భవిష్యత్తు, మానవ పురోభివృద్ధి సాధ్యమవుతుందన్నారు. యువత, విద్యార్ధులు గ్రంథాలయాలను సద్వినియోగపరచుకోవాల్సిన ప్రాముఖ్యత గురించి ఆయన వివరించారు. కోవిడ్‌`నేపధ్యంలో డిజిటల్‌ వ్యవస్ధకు అత్యంత ప్రాధ్యాన్యత చేకూరిందని శ్రావణ్‌కుమార్‌ పేర్కొన్నారు.
ఈ సందర్భంగా గ్రంధాలయ పరిషత్‌ చైర్మన్‌ మందపాటి శేషగిరిరావు, జిల్లా ప్రభుత్వాస్పత్రి సూపరింటెండెంట్‌ శ్రావణ్‌కుమార్‌, ఎన్‌వైకే జిల్లా యువజన అధికారి జి. మహేశ్వరరావులను గ్రంథాలయం ఘనంగా సత్కరించింది. కార్యక్రమంలో గ్రంథాలయ అధ్యక్షుడు డి.నూకఅప్పారావు, కార్యదర్శి కాండ్రేగుల వెంకటరమణ, కోశాధికారి బీశెట్టి కృష్ణఅప్పారావు, సభ్యులు బొడ్డేడ జగ్గఅప్పారావు, కాండ్రేగుల సత్యనారాయణ (ఎస్‌.ఎఫ్‌.ఐ), కర్రి గంగాధర్‌, మళ్ల బాపునాయుడు, ఉమ్మడి విశాఖపట్నం జిల్లా పుస్తక నిక్షిప్త`డీబీసీ కేంద్రం జిల్లా అధ్యక్షుడు సాసుబిల్లి మహాలక్ష్మినాయుడు పెద్ద సంఖ్యలో మహిళలు, విద్యార్ధులు పాల్గొన్నారు. అనంతరం వారు గ్రంథాలయంలో ఉన్న సాహిత్యం, నవలలు, చరిత్ర పుస్తకాలు, పత్రికలు, పోటీ పరీక్షలు, కంప్యూటర్‌ విభాగాలను వారు పరిశీలించారు.
