శ్రీకాకుళం జిల్లాలో 149 పరీక్షా కేంద్రాల్లో సుమారు 29 వేల మంది విద్యార్థిని, విద్యార్థులు 10వ తరగతి పరీక్షలకు హాజరవుతున్నట్లు జిల్లా కలెక్టర్ శ్రీకేష్ లాఠకర్ వెల్లడించారు. స్థానిక ప్రభుత్వ ఉన్నత పాఠశాలలో జరుగుతున్న 10వ తరగతి పరీక్షా కేంద్రాన్ని సోమవారం ఆయన సందర్శించారు. ఈ సందర్భంగా ఆయన మాట్లాడుతూ ఎ.పి. ఓపెన్ స్కూల్ కు సంబంధించి సుమారు 1200 మంది విద్యార్థులు 13 పరీక్షా కేంద్రాల్లో రెండవ పూట పరీక్షకు హాజరవుతున్నట్లు పేర్కొన్నారు. పరీక్ష కేంద్రాల్లో తాగునీరు, తదితర సౌకర్యాలు ఏర్పాటు చేసినట్లు చెప్పారు. ఇన్విజిలేటర్, చీఫ్ సూపరింటెండెంట్ లకు పలు సూచనలు జారీచేశారు. విద్యార్థులు, తల్లిదండ్రులు పరీక్షలు సజావుగా జరిగేలా యంత్రాంగానికి సహకరించాలని ఆయన తెలిపారు. ఈ కార్యక్రమంలో విద్యాశాఖ నుండి ఎసిఇ లియాఖత్ అలీఖాన్, తదితరులు పాల్గొన్నారు.
