ప్ర‌తీ ప్రభుత్వ ఉద్యోగి ప్ర‌జ‌ల‌తో స్నేహ‌పూర్వ‌కంగా మెల‌గాల్సి ఉంటుంద‌ని, జిల్లా కలెక్టర్ ఎ.సూర్య‌కుమారి అన్నారు. ఉద్యోగుల‌కు క్ర‌మ‌శిక్ష‌ణ, అంకిత‌భావం త‌ప్ప‌నిస‌రి అని ఆమె స్ప‌ష్టం చేశారు. ఎపి సివిల్ స‌ర్వీసెస్ కాండ‌క్ట్ రూల్స్‌పై స‌ర్వేయ‌ర్లు, విఆర్ఓలు, స‌చివాల‌య సిబ్బందికి క‌లెక్ట‌రేట్ ఆడిటోరియంలో మంగ‌ళ‌వారం శిక్ష‌ణా కార్య‌క్ర‌మాన్ని నిర్వ‌హించారు. ఈ కార్య‌క్ర‌మంలో కలెక్టర్ మాట్లాడుతూ, శిక్ష‌ణ‌ను స‌ద్విని యోగం చేసుకొని, వివిధ అంశాల‌పై సంపూర్ణ అవ‌గాహ‌న ఏర్పాటు చేసుకోవాల‌న్నారు. చ‌ట్టాల‌ను, ప్రభుత్వ నిబంధ‌న‌ల‌ను ఉద్యోగులు త‌ప్ప‌నిస‌రిగా అమ‌లు చేయాల‌ని ఆదేశించారు. ప్ర‌తీ ప్రభుత్వ ఉద్యోగీ ప్ర‌భుత్వంలో ఒక భాగ‌మేన‌ని స్ప‌ష్టం చేశారు. ప్ర‌జ‌ల‌తో స్నేహ‌పూ ర్వ‌కంగా, న‌మ్ర‌త‌గా, ఆచితూచి మాట్లాడాల‌ని సూచించారు. తాము ప్రభుత్వ ప్ర‌తినిధుల‌మ‌న్న విష‌యాన్ని నిరంత‌రం మ‌న‌నంలో ఉంచు కోవాల‌న్నారు.
ప్ర‌తీఒక్క‌రికీ వృత్తిప‌ర‌మైన క్ర‌మ‌శిక్ష‌ణ చాలా అవ‌స‌ర‌మ‌న్నారు. ప్రభుత్వ ఉద్యోగంలో ఒత్తిడి చాలా ఎక్కువ‌గా ఉంటుంద‌ని, దీనినినుంచి బ‌య‌ట ప‌డ‌టానికి సంగీతం, చిత్ర‌లేఖ‌ణం, ర‌చ‌న త‌దిత‌ర క‌ళ‌ల‌ను అల‌వాటు చేసుకోవాల‌ని సూచించారు. దాదాపు వందేళ్ల త‌రువాత ఎంతో ప్ర‌తిష్టాత్మ‌కంగా జ‌రుగుతున్న భూముల రీస‌ర్వేలో భాగ‌స్వాములు అవుతున్నందుకు గ‌ర్వ‌ప‌డాల‌ని కోరారు. ప‌నిలో మ‌మేకం కావాల‌ని, ఆ ప‌నిలోనే ఆనందాన్ని పొందాల‌ని కలెక్టర్ సూచించారు. ఈ శిక్ష‌ణా కార్య‌క్ర‌మంలో కెఆర్ఆర్‌సి ప్ర‌త్యేక ఉప కలెక్టర్ సూర్య‌నారాయ‌ణ, స‌ర్వేశాఖ ఎడి టి.త్రివిక్ర‌మ‌రావు, జిల్లా శిక్ష‌ణా కేంద్రం మేనేజ‌ర్ ఎన్‌.శ్రీ‌నివాసులు తదిత‌రులు పాల్గొన్నారు.
