అనకాపల్లి నూకాంబికా అమ్మవారి దేవస్థానం ట్రస్టు బోర్డు నియమకానికి మొక్కుబడి ప్రకటన కాకుండా పూర్తి వివరాలతో సమగ్ర ఉత్తర్వును ప్రభుత్వం విడుదల చేయా లని పబ్లిక్‌ ఫోరం రాష్ట్ర కో`ఆర్డినేటర్‌, సమాచార హక్కు, వినియోగదారుల రక్షణ చట్టాల ఉద్యమకర్త కాండ్రేగుల వెంకటరమణ గురువారం ఒక ప్రటకనలో డిమాండ్‌ చేశారు. దేవాదాయ, ధర్మాదాయ శాఖ డిప్యూటీ కమిషనర్‌ ట్రస్టు బోర్డు నియామకం కోసం తాజాగా విడుదల చేసిన ఉత్తర్వు (నెం. ఎ1/396/2023 తేది : 25-4-2023) అసం పూర్తిగా, ఆక్షేపనీయంగా ఉందని విమర్శించారు. ఈ మేరకు సీఎం వైఎస్‌ జగన్మోహనరెడ్డి, దేవాదాయ, ధర్మాదాయ శాఖ కమిషనర్‌లకు లేఖ వ్రాసినట్టు పేర్కొన్నారు. ఏటా రూ. 4 కోట్లు ఆదాయం సమకూరుతున్న దేవస్థానానికి ట్రస్టు బోర్డును నియమించాలని ఏడాదిగా ఆర్టీఐ చట్టం (కేసు నెం. 19032/ఎస్‌ఐసీ-ఆర్‌ఎస్‌ఆర్‌/2022) ద్వారా చేసిన పోరాట ఫలితంగా ఎట్టకేలకు ప్రభుత్వం చర్యలు చేపట్టడం హర్షనీయమన్నారు. అయితే తాజాగా వెలువడిన ఉత్తర్వులో ట్రస్టు బోర్డు సభ్యుల సంఖ్య, అర్హతలు, రిజర్వేషన్లు, దరఖాస్తు నమూనా, చిరునామా తదితర వివరాలు లేకుండా మొక్కుబడిగా ప్రకటన జారీ చేయడం సిగ్గుచేటన్నారు. ఉద్దేశపూర్వకంగా సాంకేతిక సమస్యలు సృష్టించి ట్రస్టు బోర్డును నియమించకుండా కాలయాపన చేసే దురుద్దేశంతో జారీ చేసిన ఉత్తర్వులా ఉందని వెంకటరమణ అనుమానం వ్యక్తం చేశారు.

                ఆచార వ్యవహారాలు, ఆగమశాస్త్రంపై అవగాహన ఉన్న అర్హులను మాత్రమే ధర్మకర్తలుగా నియమించాలని ఆయన కోరారు. దేవాదాయ, ధర్మాదాయ చట్టం 30/1987లోని సెక్షన్లు 13, 15, 17, 18, సవరణ చట్టం 8/2014, 31/2019, ప్రభుత్వ సర్య్కులర్లు (నెం.42 తేది : 8-12-2001)కు విరుద్దంగా జరిగిన ట్రస్టు బోర్డు సిఫార్సులు, నియామకాలకు సంబంధిత అధికారులను బాధ్యులుగా చేయాలని వెంకటరమణ ప్రభుత్వానికి విజ్ఞప్తి చేశారు.

                ఉమ్మడి ఆంధ్రప్రదేశ్‌ రాష్ట్రంలో మొదటి 10 దేవస్ధానాల్లో ఒకటిగా, ఆదాయం ప్రాతిపాదికన 6`ఎ2 దేవస్థానంగా గుర్తింపు పొందిన శ్రీ నూకాంబికా అమ్మవారి దేవస్ధానానికి గత 8ఏళ్లుగా ట్రస్టు బోర్డు నియామకానికి నోచుకోకపోవడం ‘స్ధానిక’ పాలకుల వైఫల్యమని ఆయన దుయ్యబట్టారు. 2019లో ట్రస్టు బోర్డు నియామకం కోసం ప్రభుత్వ ఉత్తర్వు (ఆర్టీ నెం. 986 రెవిన్యూ (ఎండోమెంట్స్‌-11) డిపార్ట్‌మెంట్‌ తేది : 30-9-2019) ప్రకారం స్వీకరించిన దరఖాస్తులు ఏమైనట్టు ఆయన నిలదీశారు. భక్తుల ఆదాయంతో నడుస్తున్న దేవస్ధానాల్లో విధులు నిర్వహిస్తున్న ఉద్యోగులు, అధికారులు జీతాలు పొందుతూ ట్రస్టు బోర్డును నియమించకుండా జాప్యం చేస్తున్నారని, తక్షణం జోక్యం చేసుకోవాలని కాండ్రేగుల వెంకటరమణ ప్రభుత్వానికి విజ్జప్తి చేశారు.