మా అల్లుడు చంద్రబాబునాయుడు కోసం అల్లుడి సుద్దులు పేరిట ఓ పుస్తకం రాశానని అది త్వరలోనే విడుదల చేస్తానని ఏపీ  తెలుగు సంస్కృతి అకాడమీ చైర్ పర్సన్ లక్ష్మీపార్వతి అన్నారు. ఆ పుస్తకంలో మా అల్లుడు, ఆయన కుమారుడు లోకేష్ చెబుతున్న నీతులన్నీ ఉంటాయని  తీవ్రస్థాయిలో విరుచుకుపడ్డారు. వచ్చే ఎన్నికల్లో చంద్రబాబుకు సమాధి కట్టేయడం ఖాయమంటూ వ్యాఖ్యలు చేశారు. బుధవారం విశాఖలోని ప్రభుత్వ అతిధి గ్రుహంలో ఏర్పాటు చేసిన విలేకరుల సమావేశంలో మాట్లాడుతూ.. ఓటమి తర్వాత చంద్రబాబు, ఆయన కుమారుడు ప్రవాసీలుగా మిగిలిపోతారని.. ఇప్పటికే వాళ్ళు తెలంగాణ నుంచి వచ్చి వెళుతున్నారన్నారు. చంద్రబాబు సిగ్నల్ ఇచ్చిన తర్వాతే వారాహి రోడ్డెక్కుతోందని తెలిపారు. టీడీపీతో కలయిక రాజకీయ నాయకుడుగా పవన్ కళ్యాణ్‌కు తీవ్ర నష్టం కలిగిందని అన్నారు. ఓట్లు చీల్చడం అంత ఈజీ కాదని.. నాయకుడి విధానాలు అర్ధం కాక జనసేన కార్యకర్తలు అయోమయంలో ఉన్నారన్నారు. లోకేష్ చదువు సంధ్య లేని మూర్ఖుడంటూ వ్యాఖ్యలు చేశారు. లోకేష్ పాదయాత్రలో ముఖ్యమంత్రిపై చేస్తున్న వ్యాఖ్యలు దారుణంగా ఉన్నాయన్నారు. వ్యక్తిగత విమర్శలు చేసే కుసంస్కారం లోకేష్ దని అన్నారు. రోజూ సాయంత్రం 5 గంటల నుంచి చేస్తే అది ఈవెనింగ్ వాక్ అంటారే గానీ పాదయాత్ర ఎలా అవుతుందంటూ ఎద్దేవా చేశారు.

ఇటీవల రాజమండ్రిలో విడుదల చేసిన టీడీపీ మానిఫెస్టో ఆత్మవంచన అని తెలిపారు. మహిళలు, రైతులను మోసం చేయడమే చంద్రబాబు ఉద్దేశమన్నారు. కేసుల మాఫీ కోసం ఢిల్లీకి వెళ్లిన చంద్రబాబుకు తొలి ప్రయత్నం విఫలమైందన్నారు. పొత్తుల కోసం బీజేపీ పెద్దలను ఆశ్రయించాలనే చంద్రబాబు ఆలోచనలకు బ్రేకులు పడ్డాయన్నారు. కాలం మళ్లీ వెనక్కి తిరిగిందని అన్నారు. కమీషన్ల కోసం పోలవరం ప్రాజెక్టును ముంచేసిన ఘనుడు చంద్రబాబు అంటూ విరుచుకుపడ్డారు. చంద్రబాబు అవినీతి కోసం పోలవరంలో ప్రజాధనం దోపిడీకి గురైందని ఆరోపించారు. పొత్తుల కోసం చంద్రబాబు ఎటువంటి ఉపాయాలైన వేస్తారన్నారు. రాజకీయ ప్రయోజనాలు తప్ప శాశ్వత శత్రుత్వాలు పార్టీల మధ్య ఉండవన్నారు. చంద్రబాబును బీజేపీ నమ్మదని... వెంకయ్యనాయుడు చెప్పారనే చంద్రబాబుతో మీటింగ్‌కు అమిత్ షా ఒప్పుకున్నారని తెలిపారు. మరోసారి షా, బాబు భేటీ జరిగితే అప్పుడు ఏదో జరుగుతుందని భావించొచ్చని చెప్పుకొచ్చారు. ముఖ్యమంత్రి హోదాలో అక్రమ నిర్మాణాల్లో నివాసం ఏర్పరుచుకోవడం సిగ్గులేనితనమంటూ లక్ష్మీపార్వతి విరుచుకుపడ్డారు.