కూలి పని చేస్తూ ఎస్కే యూనివర్సిటీలో కెమిస్ట్రీలో పీహెచ్డీ పూర్తి చేసిన సాకే భారతికి ప్రభుత్వం నుంచి అవసరమైన సహాయ సహకారాలు అందిస్తామని జిల్లా కలెక్టర్ యం.గౌతమి పేర్కొన్నారు. సోమవారం అనంతపురం కలెక్టరేట్ లోని రెవెన్యూ భవనంలో సింగనమల మండలం నాగలగుడ్డం గ్రామానికి చెందిన సాకే భారతి జిల్లా కలెక్టర్ ని కలిశారు. ఈ సందర్భంగా సింగనమల మండలం సోదనపల్లి గ్రామం వద్ద సర్వే నంబర్ 9-12లో రెండు ఎకరాల పొలానికి సంబంధించిన పట్టాని సాకే భారతికి జిల్లా కలెక్టర్ అందజేశారు. ఈ సందర్భంగా జిల్లా కలెక్టర్ మాట్లాడుతూ కూలి పని చేస్తూ ఎస్కే యూనివర్సిటీలో కెమిస్ట్రీలో సాకే భారతి పీహెచ్డీ పూర్తి చేయడం జిల్లాకి గర్వకారణమన్నారు. సంకల్పం గట్టిగా ఉంటే మన విజయాన్ని ఏది ఆపదు అనేదానికి సాకే భారతి నిదర్శనమని, ఎన్నో అవంతరాలు ఎదురైనా ఎక్కడా వెనకడుగు వేయకుండా ఆమె అనుకున్నది సాధించి డాక్టర్ సాకే భారతిగా పేరు పొందారన్నారు. ఇది ఎంతో గొప్ప విషయమని, ఇతరులకు ఆదర్శవంతంగా నిలిచి ఆమె యువతకు రోల్ మోడల్ గా మారిందన్నారు. జిల్లా యంత్రాంగం నుంచి సాకే భారతికి న్యాయం చేయాలనే ఉద్దేశంతో తమ వంతు సాయంగా ప్రభుత్వ ఆదేశాల మేరకు రెండు ఎకరాల భూమిని కేటాయించినట్టు స్పష్టం చేశారు.
అసంపూర్తిగా ఉన్న ఆమె ఇంటిని కూడా పూర్తి చేసి ఇవ్వడం జరుగుతుందన్నారు. సాకే భారతి ఎస్కేయూలో కెమిస్ట్రీలో పీహెచ్డీ చేశారని, ఆమెకు ఉద్యోగ అవకాశం కింద జూనియర్ లెక్చరర్ పోస్ట్ ని గుర్తించడం జరిగిందని, ఎస్కేయూ పరిధిలోని రెసిడెన్షియల్ జూనియర్ కాలేజీలో జూనియర్ లెక్చరర్ పోస్టు కెమిస్ట్రీలో ఖాళీగా ఉందని, ఆమె ఒప్పుకుంటే ఆ పోస్టుకు ఆమెను నామినేట్ చేయడం జరుగుతుందన్నారు. జిల్లా యంత్రాంగం నుంచి ఆమెకు అవసరమైన ప్రోత్సాహం అందిస్తామని, ప్రభుత్వం నుంచి వచ్చిన ఆదేశాల మేరకు ఆమెకు అవసరమైన సౌకర్యాలు కల్పించడం జరుగుతుందన్నారు. మహిళలు అనుకుంటే ఏదైనా సాధించగలరు అనేదానికి సాకే భారతి ఒక నిదర్శనమని, ఆమె భవిష్యత్తులో మరింత ఉన్నత శిఖరాలను అధిరోహించాలన్నారు. ఈ కార్యక్రమంలో ట్రైనీ కలెక్టర్ కుషాల్ జైన్, ఆర్డీఓ మధుసూదన్, సింగనమల తహసిల్దార్ ఈశ్వరమ్మ, సాకే భారతి భర్త శివప్రసాద్, కూతురు ప్రసూన, తదితరులు పాల్గొన్నారు.
