భారత దేశం అభివృద్ధి చెందాలంటే అది కాంగ్రెస్ పార్టీతోనే సాధ్యపడుతుందని కాంగ్రెస్ పార్టీ సీనియర్ నేత, ఏపీ టెక్నాలజీ మాజీ చైర్మన్ కొయ్య ప్రసాద్ రెడ్డి అన్నారు. సోమవారం విశాఖలోని ఓ హోటల్లో ఏర్పాటు చేసిన విలేకరుల సమావేశంలో ఆయన మాట్లాడారు. రాష్ట్రంలో గత పదేళ్లుగా టిడిపి, వైఎస్సార్సీపి పాలనలో ప్రజలకు అన్యాయం జరిగిందన్నారు. విభజన చట్టం హామీలు సాధించలేని పార్టీలుగా మిగిలిపోయాయి అన్నారు. ఈ రెండు పార్టీల వల్ల అన్ని సహజ వనరులు పుష్కలంగా ఉన్న రాష్ట్రానికి లక్షల కోట్లు నష్టం వాటిలిందని ఆవేదన వ్యక్తం చేశారు. ఇటు సీఎం జగన్మోహన్ రెడ్డి అటు చంద్రబాబు పదేళ్ల కాలంలో ఒకరినొకరు విమర్శించుకుంటూ రాష్ట్రాన్ని దోచుకున్నారని విమర్శించారు. ప్రత్యేక హోదా రావాలన్నా, స్టీల్ ప్లాంట్ ప్రైవేటీకరణ కాకుండా ఉండాలన్న, కావాలన్నా వచ్చే ఎన్నికల్లో కేంద్రంలోనూ, రాష్ట్రంలోనూ కాంగ్రెస్ పార్టీ అధికారంలోకి వచ్చి, రాహుల్ గాంధీ ప్రధాని అయిన నాడే సాధ్యపడుతుందన్నారు. ప్రధాని మోడీ
ఏటా రెండు కోట్ల ఉద్యోగాలు ఇస్తామన్న హామీని ఉల్లంగించారని అన్నారు.
కాంగ్రెస్ గెలిస్తే ఏ పి కి ప్రత్యేక హోదాపై తొలి సంతకం చేస్తారని, అలాగే
సుజల స్రవంతి పూర్తి చేస్తామన్న మేనిఫెస్టోతో ముందుకు వెళతామని పేర్కొన్నారు.
అంబటి రాంబాబు, రోజా, పేర్ని నాని ఊర కుక్కలు మాదిరిగా షర్మిల మీద విమర్శలు చేస్తున్నారని ఇది కరెక్ట్ కాదన్నారు. భీమిలిలో జగన్
సిద్దం సభకు నాలుగున్నర లక్షల మంది వస్తారని ప్రకటనలు గుప్పించిన వైసిపికి లక్ష మంది కూడా రాలేదని, జగన్ అర్జునుడు కాదు ఉత్తర కుమారుడు అని ఎద్దేవా చేశారు.
సజ్జల రామకృష్ణా రెడ్డి, వై వి సుబ్బారెడ్డి దిగజారి షర్మిల మీద విమర్శలు చేస్తున్నారని అది మంచి పద్ధతి కాదన్నారు. కార్యకర్తలను జగన్ విస్మరిస్తున్నారని,
దివంగత నేత వైఎస్సార్ మీద వున్న అభిమానం వల్లనే జగన్ ప్రభుత్వం అధికారంలోకి వచ్చిందని గుర్తు చేశారు.
టీడీపీ, వైసీపీ వేలం పాట మాదిరిగా ఉచిత పథకాలు ప్రకటిస్తున్నారని విమర్శించారు.
రైల్వే జోన్ జాప్యం వల్ల నష్టం జరుగుతోందని, విభజన హామీలు అమలు జరగడం లేదని విచారం వ్యక్తం చేశారు.
గంగ వరం పోర్టుని అదానికి దోచి పెట్టారని, ఉత్తరాంధ్రను అభివృద్ది చేయలేదని, విశాఖను బొత్సకి తాకట్టు పెట్టారని విమర్శించారు.
పార్టీ నగర అధ్యక్షుడు గొంప గోవిందరాజు మాట్లాడుతూ రాష్ట్రంలో పి సీ సీ అధ్యక్షురాలుగా వైయస్ షర్మిలా రెడ్డి రాకతో మాజీ కాంగ్రెస్ వాదులు, రాజశేఖర్ రెడ్డి అభిమానులు కాంగ్రెస్ పార్టీలో చేరుతున్నారన్నారు. వైఎస్సార్ మీద అభిమానంతో వైసీపీ లోకి వెళ్లి జగన్ తో ఇమడ లేని నేతలు కాంగ్రెస్ పార్టీలోకి వస్తున్నారని, తద్వారా పార్టీకి పూర్వ వైభవం వస్తుందని ఆశాభావం వ్యక్తం చేశారు. ఈ
సమావేశంలో పార్టీ జిల్లా ప్రధాన కార్యదర్శి కాకినాడ చిన్నబాబు, నాయకులు తలారి సురేష్, హాసిని వర్మ, మహ్మద్ హర్షద్ భాషా, నమ్మి రామారావు, దేవ తదితరులు పాల్గొన్నారు.
