కుంకుమ పువ్వు డిమాండ్ 100 టన్నులు కాగా.. ఉత్పత్తి 4.46 టన్నులుమన దేశంలో కుంకుమపువ్వుకు విపరీతమైన డిమాండ్ ఉంది. భారత దేశంలో 100 టన్నులు డిమాండ్ ఉంటే ఉత్పత్తి మాత్రం 4.46 టన్నులు మాత్రమే.. ఇక ప్రపంచ వ్యాప్తంగా చూస్తే కుంకుమపువ్వు వార్షిక ఉత్పత్తి సంవత్సరానికి 300 టన్నులు మాత్రమే. మన దేశంలోనే దీని వినియోగం ఎక్కువ. ఈ ఖరీదైన కుంకుమపువ్వు సాగు ఉత్పత్తిలో ఇరాన్ ది మొదటి స్థానం కాగా..రెండో స్థానంలో స్పెయిన్..మన భారత దేశం మూడో స్థానంలో ఉంది.  షేడెడ్ నెట్లు, గ్లాస్ హౌస్ లో పెంపకం సముద్ర మట్టానికి 1,500 నుండి 2,800 మీటర్ల ఎత్తులో ఉన్న సమ శీతోష్ణ పొడి వాతావరణంలో కుంకుమపువ్వు బాగా వృద్ధి చెందుతుందని స్థానిక ప్రాంతీయ పరిశోధనా స్థానం అసిస్టెంట్ డైరెక్టర్, సీనియర్ శాస్త్ర వేత్త ఎం సురేష్ కుమార్ వివరించారు.

 కుంకుమ పూలు పూయడానికి 17°C ఉష్ణోగ్రత అవసరం ఉంటుందన్నారు. వివిధ వాతావరణ పరిస్థితుల్లో షేడెడ్ నెట్లు,గ్లాస్ హౌస్ లు (కుండలు)బహిరంగ పొలాల్లో వీటిని పెంచుతారని వివరించారు. ఆగష్టు- అక్టోబర్ మధ్య మొత్తం 6,500 కుంకుమ విత్తనాలు నాటితే గ్లాస్ హౌస్ ల విషయం లో అధిక శాతం అంకురోత్పత్తి కనిపించిం దన్నారు. తరువాత షేడ్ నెట్, కొంత ఆలస్యంగా బహిరంగ పొలాల్లో పేలవ మైన అంకురోత్పత్తి కనిపించిందన్నారు. గ్లాస్ హౌస్ లోనే ఇది అతి వేగంగా ఉత్పత్తి అవుతుందని వివరించారు. ఆగస్టులో షేడ్ నెట్ లో వేసిన విత్తనాలు మొలకెత్తాయని తెలిపారు. సెప్టెంబరులో నాటిన విత్తనాలు వికసించటానికి సిద్ధంగా ఉన్నాయన్నారు. షేడ్ నెట్విషయానికొస్తే,మొదటి పువ్వు పూయ డానికి 87 రోజులు పట్టిందన్నారు.  సెప్టెంబరులో విత్తిన మొక్కకు మొదటి పువ్వు పూయడానికి 56 రోజులు పట్టడం విశేషమని ఆయన తెలిపారు.  ఒకప్పుడు ఎక్కడెక్కడ నుంచో తెచ్చుకునే ఈ కుంకుమపువ్వును మన రాష్ట్రంలోనూ అందులోనూ ఏజెన్సీ ప్రాంతంలో అభివృద్ధి చేసివాటి ఫలసాయాలు తీయడం ద్వారా గిరిజనుల మరింత మేలు కలిగే అవకాశాలు కనిపిస్తున్నాయి. గిరిజనులను ఆర్ధికంగా అభివృద్ధి చేయాలంటే ఈ తరహా పంటలను జిసిసి ద్వారా గిరిజనులతో పండించి..అదే జిసిసి ద్వారా మార్కెంటింగ్ చేస్తే ఆశించిన దానికంటే ఎక్కువ ఫలితాలు వచ్చే అవకాశం వుంటుందని చెబుతున్నారు. ప్రస్తుతం జిసిసి ఉత్పత్తులకు మంచి డిమాండ్ ఉంది. ఈ నేపథ్యంతో గిరిజనుల ద్వారా ఈ కుంకుమపువ్వుసాగుని పెద్ద మొత్తంలో చేపడితే అధిక ఆధాయం రావడంతోపాటు, గిరిజన రైతుల జీవితాల్లో కూడా వెలుగులు నిండే అవకాశం వుంది.