పదవులంటే అలంకార ప్రాయం కాదని, మనం చేసే పనిలో, సేవలో మరింత బాధ్యతను పెంచుతాయని రాష్ట్ర హోంమంత్రి డా. తానేటి వనిత అన్నారు. బుధవారం కొవ్వూరు కమ్యూనిటీ హెల్త్ సెంటర్ లో జరిగిన ఆసుపత్రి అభివృద్ధి కమిటీ మెంబర్స్ ప్రమాణ స్వీకారోత్సవంలో హోంమంత్రి ముఖ్యఅతిథిగా పాల్గొన్నారు. సభ్యులుగా వరిగేటి సుధాకర్, నగళ్లపాటి శ్రీనివాసర రావులు ఎన్నికయ్యారు. కార్యక్రమం అనంతర హోంమంత్రి ఆసుపత్రి పరిసరాలను, అన్ని వార్డులను క్షుణ్ణంగా పరిశీలించారు. ఆసుపత్రి రికార్డులను పరిశీలించారు. స్త్రీల ప్రసూతి విభాగంలో ఆసుపత్రిలో సేవలు ఎలా అందుతున్నాయని మంత్రి ప్రశ్నించగా.. బాగా అందుతున్నాయని సమాధానం వచ్చింది.
ఈ సందర్భంగా హోం మంత్రి తానేటి వనిత మాట్లాడుతూ.. వైద్యం ప్రతి పేదవాడికి ఉచితంగా అందజేయాలన్న లక్ష్యంతో ప్రభుత్వం కృషిచేస్తుందన్నారు. డాక్టర్ వైఎస్సార్ ఆరోగ్యశ్రీ పథకం ద్వారా ప్రభుత్వ ఆసుపత్రుల్లో మెరుగైన వైద్యం అందించడమే కాకుండా, పేదవాడికి కార్పోరేట్ వైద్యం అందేలా చేశామన్నారు. ప్రభుత్వ ఆసుపత్రుల్లో వైద్యం ఎవరూ ఇబ్బంది పడకుండా మానిటరింగ్ చేయాల్సిన బాధ్యత కమిటీలపై ఉందని తెలిపారు. ఆసుపత్రి అభివృద్ధి పనులకు సీఎస్ఆర్ ఫండ్స్ ను వినియోగించుకోవాలని మంత్రి సూచించారు. కొవ్వూరు కమ్యూనిటీ హెల్త్ సెంటర్ ను 50 పడకల నుంచి 100 పడకల ఆసుపత్రిగా సామర్థ్యం పెంచడానికి కృషి చేస్తున్నామన్నారు.
