కరోనా వైర‌స్ బారిన‌ప‌డి మ‌ర‌ణించిన వైద్య‌, ఆరోగ్య సిబ్బంది కుటుంబాల‌ను అన్ని విధాలా ఆదుకునేందుకు ముఖ్య‌మంత్రి ప్ర‌త్యేక కార్యాచ‌ర‌ణ‌ను అమ‌లుచేస్తున్నార‌ని తూర్పుగోదావ‌రి జిల్లా క‌లెక్ట‌ర్ డి.ముర‌ళీధ‌ర్‌రెడ్డి తెలిపారు. జిల్లాలోని స‌ఖినేటిప‌ల్లి మండ‌లం మోరి గ్రామానికి చెందిన డాక్ట‌ర్ కందిక‌ట్ల రోజి ఏలూరులోని ఆశ్ర‌మ్ వైద్య క‌ళాశాల‌లో ఎంబీబీఎస్ పూర్తిచేసి, అక్క‌డే హౌస్ స‌ర్జ‌న్ చేస్తూ కోవిడ్ రోగుల‌కు సేవ‌లందిస్తూ వైర‌స్ బారిన‌ప‌డ్డారు. ఆ త‌ర్వాత మోరిలోని ఆసుప‌త్రిలో చికిత్స పొందుతూ ప‌రిస్థితి విష‌మించి జూన్ 1వ తేదీన మ‌ర‌ణించారు. కోవిడ్ బాధితుల ప్రాణాల‌ను కాపాడే క్ర‌మంలో అదే వైర‌స్ బారిన‌ప‌డి మ‌ర‌ణించిన రోజి కుటుంబాన్ని ఆదుకునే క్ర‌మంలో గౌర‌వ ముఖ్య‌మంత్రి ఆదేశాల మేర‌కు రోజి సోద‌రుడు రాకేశ్‌కు ముఖ్య‌మంత్రి స‌హాయ నిధి (సీఎంఆర్ఎఫ్‌) కింద రూ.25 ల‌క్ష‌ల చెక్కును బుధ‌వారం క‌లెక్ట‌రేట్‌లో క‌లెక్ట‌ర్ డి.ముర‌ళీధ‌ర్‌రెడ్డి అందించారు. ఈ సంద‌ర్భంగా క‌లెక్ట‌ర్ మాట్లాడుతూ సామాన్య ప్ర‌జ‌ల‌తో పాటు వైద్య‌, ఆరోగ్య‌; పోలీస్‌, రెవెన్యూ ఇలా వివిధ ప్ర‌భుత్వ శాఖ‌ల‌కు చెందిన సిబ్బంది వైర‌స్ బారిన‌ప‌డుతున్నార‌ని, దుర‌దృష్ట‌వ‌శాత్తు కొంద‌రు మ‌ర‌ణిస్తున్నార‌ని తెలిపారు. ముఖ్యంగా ప్ర‌త్య‌క్షంగా రోగుల‌కు వైద్య సేవ‌లు అందించే క్ర‌మంలో వైద్య‌, ఆరోగ్య శాఖ సిబ్బంది వైర‌స్ బారిన‌ప‌డుతున్నారని, వీరిలో కొంద‌రు మ‌ర‌ణించ‌డం విచార‌క‌ర‌మ‌న్నారు. ఇలా మ‌ర‌ణించిన వారి కుటుంబాల‌కు రాష్ట్ర ప్ర‌భుత్వం అండ‌గా ఉంటూ, బాధిత కుటుంబ స‌భ్యుల‌కు భ‌రోసా క‌ల్పిస్తోంద‌ని పేర్కొన్నారు. ఈ క్ర‌మంలోనే ఆర్థికంగా బ‌ల‌హీనంగా ఉన్న డా. రోజి కుటుంబానికి ప్ర‌భుత్వం ఆర్థిక స‌హ‌కారం అందించిన‌ట్లు క‌లెక్ట‌ర్ వివ‌రించారు.