విశాఖపట్నం పోర్టు అధారిటీ మరో నూతన రికార్డును నెలకొల్పింది. ఒకే నెలలో 7630 మెట్రిక్ టన్నుల కాల్సినెడ్ అల్యూమినా ను హ్యాండిల్ చేయడం ద్వారా నూతన రికార్డ్ నమోదు చేసిందని పోర్టు కార్యదర్శి టి. వేణుగోపాల్ తెలియజేశారు. ఈ మేరకు మీడియాకి ప్రకటన విడుద లచేశారు. ఈస్ట్ క్యూ 3 బెర్త్ లో నవంబర్ నెలలో సాధించిన రికార్డును బ్రేక్ చేసి సరికొత్త రికార్డు సృష్టించిందని పేర్కొన్నారు. ఉత్కల్ అల్యూమినా ఇంటర్నేషనల్ లిమిటెడ్ సంస్ధ ఎంవి హెచ్ పిసి నౌక లో సరుకును హ్యాండిల్ చేయడం ద్వారా ఈ రికార్డును సుసాధ్యంచేసిందన్నారు. అదే సంస్ధ నవంబర్ 2023లో 7549 మెట్రిక్ టన్నుల కాల్సినేడ్ అల్యూమినాను హ్యాండిల్ చేసిందని.. ఉత్కల్ అల్యుమినా ఇంటర్నేషనల్ లిమిటెడ్ సంస్ధ నవంబర్ లో తాను నెలకొల్పిన రికార్డును తానే బ్రేక్ చేసి నూతన రికార్డును నెలకొల్పిందని తెలియజేశారు. తద్వారా వరుసగా మూడు నెలల పాటు తమ రికార్డును తామే తిరగరాయగలిగామన్నారు. ఎంవిహెచ్పిసి నౌకకు శ్రావణ్ షిప్పింగ్ సర్వీస్, ఈశ్వర్ షిప్పింగ్ సర్వీసులు స్టీమర్ ఏజెంట్లుగా వ్యవహరిస్తున్నారని..ఈ రికార్డును సాధించడంలో కృషి చేసిన స్టీమర్ ఏజెంట్లను, స్టివెడోర్స్ ను పోర్టు చైర్ పర్సన్ డా ఎం.అంగముత్తు అభినందనలు తెలియజేశారు. పోర్టు ట్రాఫిక్ మేనేజర్ బి.రత్న శేఖర్ రావును పోర్టు చైర్ పర్సన్ ప్రత్యేకంగా అభినందించారు. భవిష్యత్తులో పోర్టు మరింత ప్రగతిని కనబరచాలని చైర్ పర్సన్ ఆకాంక్షించారు. పోర్టు సిబ్బంది మరింత కృషి చేయడం ద్వారా మంత్రిత్వ శాఖ విధించిన టార్గెట్ ను అధిగమించాలని సూచించారు. రికార్డును సాధించడంలో కృషి చేసిన ట్రాఫిక్ విభాగం సిబ్బందిని పోర్టు డిప్యూటీ చైర్ పర్సన్ దుర్గేష్ కుమార్ దూబె, కార్యదర్శి వేణుగాపాల్ అభినందించారు.
