విజ‌య‌న‌గ‌రం జిల్లాకు జ‌ల సంర‌క్ష‌ణ‌లో జాతీయ జ‌ల‌ అవార్డు వ‌రించింది. కేంద్ర జ‌ల‌శ‌క్తి మంత్రిత్వ‌శాఖ దేశ‌రాజ‌ధాని న్యూఢిల్లీలోని విజ్ఞాన‌భ‌వ‌న్‌లో బుధ‌వారం ఘ‌నంగా నిర్వ‌హించిన 2వ జాతీయ  జ‌ల అవార్డుల పంపిణీ  కార్య‌క్ర‌మంలో ఉప‌రాష్ట్ర‌ప‌తి వెంక‌య్య‌నాయుడి చేతుల‌మీదుగా వ‌ర్చువ‌ల్ విధానంలో విజ‌య‌న‌గ‌రం జిల్లాకు ఈ  పుర‌స్కారాన్ని ప్ర‌ధానం చేశారు.  ఈ సంద‌ర్భంగా ఉప‌రాష్ట్ర‌ప‌తి వెంక‌య్య‌నాయుడు మాట్లాడుతూ జ‌ల సంర‌క్ష‌ణ  ప్ర‌తీఒక్క పౌరుడి బాధ్య‌త అని స్ప‌ష్టం చేశారు. మాన‌వ మ‌నుగ‌డ‌కు నీరే మూలాధార‌మ‌ని అన్నారు. మ‌న జీవన విధానంలో జ‌ల‌సంర‌క్ష‌ణ ఒక భాగం కావాల‌ని ఆయ‌న కోరారు. పెరుగుతున్న జ‌నాభాకు అనుగుణంగా నీటిని ప‌రిర‌క్షించుకోవాల్సిన అవ‌స‌రం ఉంద‌న్నారు. దీని ప్రాధాన్య‌త‌ను గుర్తించి 2004 నుంచి జ‌ల సంర‌క్ష‌ణ ఉద్య‌మాలు దేశవ్యాప్తంగా మొద‌ల‌య్యాయ‌ని చెప్పారు. కేంద్ర జ‌ల‌శ‌క్తి మంత్రిత్వ‌శాఖ ప్ర‌ధాన విధుల్లో ప్ర‌కృతి వ‌న‌రుల సంర‌క్ష‌ణ కూడా ఒక‌ట‌ని పేర్కొన్నారు. పాఠ‌శాల‌లు, క‌ళాశాల‌లు, విశ్వ‌విద్యాల‌యాల్లో నీటి వ‌న‌రుల సంర‌క్ష‌ణ‌పై విస్తృత ప్ర‌చారం చేప‌ట్టాల్సిన అవ‌స‌రం ఉంద‌న్నారు. దీనిలో స్వ‌చ్ఛంద సంస్థ‌లు కూడా భాగ‌స్వాములు కావాల‌ని పిలుపునిచ్చారు. ప‌రిశ్ర‌మ‌లు, వ్య‌వ‌సాయ కార్య‌క్ర‌మాల విస్త‌ర‌ణ కార‌ణంగా క్ర‌మంగా నీటి వినియోగం కూడా పెరుగుతోంద‌ని చెప్పారు. 2050 నాటికి కేవ‌లం త్రాగునీటి అవ‌స‌రాల‌కే అందుబాటులో ఉన్న జ‌లాల్లో సుమారు 18శాతం వినియోగింప‌బ‌డుతుంద‌ని తెలిపారు. నీటి దుర్వినియోగాన్ని త‌గ్గించడం, నీటి పున‌ర్ వినియోగాన్ని పెంచ‌డం, జ‌ల సంర‌క్ష‌ణ చ‌ర్య‌ల‌ను భారీఎత్తున చేప‌ట్ట‌డం ద్వారా నీటి వ‌న‌రుల‌ను భ‌విష్య‌త్ త‌రాలకోసం సంర‌క్షించ‌వ‌చ్చ‌ని సూచించారు. జ‌ల‌శ‌క్తి అభియాన్ కార్య‌క్ర‌మం ద్వారా నీటి సంర‌క్ష‌ణ‌కు దేశ‌వ్యాప్తంగా చ‌ర్య‌ల‌ను చేప‌ట్ట‌డం జ‌రిగింద‌ని చెప్పారు.  ప్ర‌కృతి వ‌నరుల‌ను సంర‌క్షించుకోవ‌డం మ‌న విధి అని  ఉప‌రాష్ట్ర‌ప‌తి స్ప‌ష్టం చేశారు.   ఈ కార్య‌క్ర‌మంలో కేంద్ర జ‌ల‌శ‌క్తి మంత్రి గ‌జేంద్ర‌సింగ్ షెకావ‌త్‌, సామాజిక న్యాయ‌శాఖామంత్రి  ర‌త‌న్‌లాల్ క‌ఠారియా, కేంద్ర జ‌ల‌వ‌న‌రుల శాఖ కార్య‌ద‌ర్శి యుపి సింగ్ త‌దిత‌ర ప్ర‌ముఖులు పాల్గొన్నారు. ఈ కార్య‌క్ర‌మాన్ని క‌లెక్ట‌రేట్ ఆడిటోరియంలో లైవ్‌టెలికాస్ట్ ద్వారా జిల్లా క‌లెక్ట‌ర్ డాక్ట‌ర్ ఎం.హ‌రి జ‌వ‌హ‌ర్‌లాల్‌, జాయింట్ క‌లెక్ట‌ర్ (రెవెన్యూ) డాక్ట‌ర్ జి.సి.కిశోర్‌కుమార్‌, జాయింట్ క‌లెక్ట‌ర్‌(ఆస‌రా) జె.వెంక‌ట‌రావు, డిఆర్ఓ ఎం.గ‌ణ‌ప‌తిరావు, వివిధ శాఖ‌ల అధికారులు తిల‌కించారు. ఈ ప్ర‌తిష్టాత్మ‌క జాతీయ అవార్డును జిల్లాకు సాధించిపెట్టినందుకు జిల్లా క‌లెక్ట‌ర్ డాక్ట‌ర్ ఎం.హ‌రి జ‌వ‌హ‌ర్‌లాల్‌ను అధికారులు, సిబ్బంది అభినంద‌న‌ల‌తో ముంచెత్తారు. దుశ్శాలువ‌ల‌తో స‌త్క‌రించి, శుభాకాంక్ష‌లు చెప్పారు. జిల్లా ప్ర‌జ‌ల‌కు అంకితం ః క‌లెక్ట‌ర్ డాక్ట‌ర్ ఎం.హ‌రి జ‌వ‌హ‌ర్‌లాల్‌              అత్యంత ప్ర‌తిష్టాత్మ‌క‌మైన జాతీయ‌ జ‌లపుర‌స్కారాన్ని ఏస్పిరేష‌న్ జిల్లాగా విజ‌య‌న‌గ‌రం గెలుచుకోవ‌డం ఎంతో ఆనందంగా ఉంద‌ని జిల్లా క‌లెక్ట‌ర్ డాక్ట‌ర్ ఎం.హ‌రి జ‌వ‌హ‌ర్‌లాల్ అన్నారు. ఈ అవార్డును జిల్లా ప్ర‌జ‌ల‌కు అంకితం చేస్తున్న‌ట్లు ఆయ‌న ప్ర‌క‌టించారు. జిల్లా ప్ర‌జ‌ల భాగ‌స్వామ్యంతోనే ఈ అవార్డును సాధించగ‌లిగామ‌ని ఆయ‌న స్ప‌ష్టం చేశారు. పెద్ద‌చెరువు శుద్దితోపాటు, జిల్లా వ్యాప్తంగా వంద‌లాది చెరువుల‌ను సంర‌క్షించ‌డానికి ఒక ఉద్య‌మ స్ఫూర్తితో, ప్ర‌ణాళికా బ‌ద్దంగా, స‌మిష్టిగా ముందడుగు వేశామ‌ని తెలిపారు. దాని ఫ‌లిత‌మే ఈ అవార్డు అని ఆయ‌న పేర్కొన్నారు. తాము మొద‌టి నుంచీ మూడు అంశాల‌కు ప్రాధాన్య‌త‌నిస్తూ, డొనేట్ రెడ్ (ర‌క్త‌దానం)‌, స్ప్రెడ్ గ్రీన్(ప‌చ్చ‌ద‌నాన్ని పెంచ‌డం)‌, సేవ్ బ్లూ(నీటి వ‌న‌రుల సంర‌క్ష‌ణ‌) నినాదాల‌ను ప్ర‌జ‌ల్లోకి తీసుకువెళ్లామ‌ని చెప్పారు.    వ్య‌వ‌సాయాధారిత జిల్లా కావ‌డంతో, నీటి సంర‌క్ష‌ణ‌కు ఎక్కువ చ‌ర్య‌ల‌ను తీసుకున్నామ‌న్నారు. ప్ర‌భుత్వ కార్య‌క్ర‌మాలైన గ్రామీణ ఉపాధిహామీ త‌దిత‌ర ప‌థ‌కాల్లో కూడా ఒక‌వైపు ప‌నిని క‌ల్పించడ‌మే కాకుండా మ‌రోవైపు ఆస్తుల సృష్టికి, ప్ర‌కృతి వ‌న‌రుల ప‌రిర‌క్ష‌ణ‌కు బ‌హుముఖ వ్యూహంతో కృషి చేయ‌డం జ‌రిగింద‌ని క‌లెక్ట‌ర్ తెలిపారు.