తెలుగు సినీ చరిత్రలో మహానటి సావిత్రి ది ఎంతో ఉన్నతమైన స్థానం . ఈ స్థానాన్ని ఎవ్వరూ అందుకోలేరు. తెలుగు సినిమా రంగంలోనే కాకుండా తమిళం ,కన్నడ ,మలయాళం, హిందీ సినిమాలలో కూడా ఎన్నో విభిన్నమైన పాత్రలు పోషించి పలు విజయవంతమైన చిత్రాల్లో నటించిన మహానటి సావిత్రి ఎనభై నాలుగు వ జయంతి నేడు . తెలుగులో అక్కినేని నాగేశ్వరరావు, నందమూరి తారకరామారావు వంటి మహానటులతో పోటా పోటీ గా నటించిన మహానటి సావిత్రి . కొన్ని సినిమాలు అయితే కేవలం సావిత్రి నటనతోనే విజయం సాధించాయని చెప్పడంలో అతిశయోక్తి లేదు . ప్రముఖ తమిళ చిత్ర కథానాయకుడు జెమినీ గణేషన్ ను ప్రేమించి పెళ్లి చేసుకున్నారు సావిత్రి . సతీష్ కుమార్ గణేషన్ , విజయ చాముండేశ్వరి వీరిద్దరి సంతానం .పాతాళభైరవి ,పల్లెటూరు ,పెళ్ళిచేసిచూడు ,బ్రతుకుతెరువు ,దేవదాసు' మిస్సమ్మ, అర్ధాంగి, దొంగరాముడు ,భలేరాముడు ,తోడికోడళ్లు ,మాయాబజార్ ,మాంగల్య బలం, అప్పు చేసి పప్పుకూడు , నమ్మినబంటు, వేంకటేశ్వర మహత్యం వెలుగునీడలు, మంచి మనసులు ,గుండమ్మకథ ,నాదీ ఆడజన్మే, దేవత వంటి ఎంతో కథాబలం ఉన్న చిత్రాలలో ఎంతో అద్భుతంగా నటించిన మహానటి సావిత్రి . ఎవరికైనా ఎటువంటి కష్టం వచ్చినా వారికి ఎంతో సహాయపడిన మంచి మనసున్న కథానాయిక సావిత్రి .ఈమె పరమపదించి అప్పుడే సుమారు నాలుగు దశాబ్దాలు కావస్తున్నా ఈమె నటించిన చిత్రాలు, నటించిన చిత్రాలలోని పాత్రలు ఇంకా మన మధ్య సజీవంగానే ఉన్నాయి . ఈమె జయంతి సందర్భంగా ENS సినిమా టీమ్ ఘనమైన నివాళులు అర్పిస్తోంది .