చిత్తూరు జిల్లాలోని కాణిపాకం స్వయంభు శ్రీ వరసిద్ధి వినాయక స్వామి వారి హుండీ ఆదాయం 41 లక్షల 38వేల 796 రూపాయలు వచ్చినట్టు ఈఓ వెంకటేశు తెలియజేశారు. గురువారం ఈ మేరకు 24 రోజుల యొక్క హుండీ లెక్కింపు చేపట్టినట్టు వివరించారు. ఇందులో బంగారం-38.గ్రాములు, వెండి-258.గ్రాములు , బంగారు రథం ద్వారా వచ్చిన ఆదాయం - 83,191, అన్నదానం ద్వారా రూ. 1785, ప్రచార రథం ద్వారా 3077, బిక్షడి హుండి ద్వారా 7,946, ఆదాయం వచ్చినట్లు దేవస్థానం ఈవో వివరించారు. ఈ హుండీ లెక్కింపు లో దేవస్థానం అసిస్టెంట్ కమిషనర్ కస్తూరి, ఏఈఓలు చిట్టెమ్మ, రవీంద్ర బాబు, విద్యాసాగర్ రెడ్డి,హరి మాధవరెడ్డి, సి ఎఫ్ ఓ -బి,యన్ నాగేశ్వరరావు, పర్యవేక్షకులు ప్రసాద్, శ్రీధర్ బాబు, వెంకటేశ్వర్లు, బ్యాంకు , ఆలయ సిబ్బంది పాల్గొన్నారు.
ఆంధ్రప్రదేశ్ లో ఆర్థిక నేరాలకు పాల్పడే సంస్థలపై కేసుల దర్యాప్తు సత్వరమే పూర్తి చేసి బాధితులకు నాయ్యమందించాలని రాష్ట్ర ప్రభుత్వ ప్రధాన కార్యదర్శి నీలం సాహ్ని అధికారులను ఆదేశించారు. 19వ స్టేట్ లెవల్ కో ఆర్డినేషన్ కమిటీ వర్చువల్ సమావేశం సీఎస్ అధ్యక్షతన సచివాలయంలోని మొదటి బ్లాక్ లో ఆమె కార్యాలయంలో గురువారం జరిగింది. ఆ సందర్భంగా ఆర్థిక శాఖ ముఖ్య కార్యదర్శి ఎస్.ఎస్.రావత్ మాట్లాడుతూ, 19వ స్టేట్ లెవల్ కో ఆర్డినేషన్ కమిటీ ఉద్దేశాన్ని వివరించారు. అనంతరం సీఎస్ నీలం సాహ్ని మాట్లాడుతూ, ఈ ఏడాది జనవరి 29న జరిగిన 18 వ స్టేట్ లెవల్ కో ఆర్డినేషన్ కమిటీలో తీసుకున్న నిర్ణయాల ప్రగతిని అడిగి తెలుసుకున్నారు. ఆర్థిక నేరాలకు పాల్పడిన పలు సంస్థల కేసులు ఏ యే దశల్లో ఉన్నాయో ఆరా తీశారు. ప్రజల కష్టాన్ని దోచుకునే సంస్థలపై కఠినంగా వ్యవహరించాలని ఆదేశించారు. అదే సమయంలో బాధితులకు తక్షణ పరిష్కారం చూపాలన్నారు. మోసాలకు పాల్పడక ముందే, ఏర్పాటైన చిట్ ఫండ్, ఫైనాన్స్ సంస్థలు ఆర్బీఐ నిబంధనలకు లోబడి ఉన్నాయా...? సంస్థల కార్యకలాపాల నిర్వహణకు అనుమతులు ఉన్నాయా..? అని గుర్తించాలన్నారు. అగ్రి గోల్డ్, అక్షయ్ గోల్డ్, అభయ్ గోల్డ్, హీరా గ్రూప్, కపిల్ గ్రూప్, సహారా సహా పలు సంస్థలపై వివిధ కోర్టుల్లో ఉన్న కేసుల వివరాలను సీఎస్ కు సిఐడి, పోలీసు అధికారులు వివరించారు. ఎక్కువ కేసులు విజయవాడ, విశాఖపట్నం, గుంటూరు వంటి నగరాల్లో నమోదవుతున్నట్లు సీఎస్ దృష్టికి అధికారులు తీసుకొచ్చారు. ఎక్కువ వడ్డీల పేరుతో ప్రజల కష్టాన్ని దోచుకుంటున్న ఆర్థిక సంస్థలపై కేసులు దర్యాప్తు సత్వరమే పూర్తి చేసి, బాధితులకు న్యాయమందించాలని సీఎస్ ఆదేశించారు. ఈ సమావేశంలో ఆర్థిక శాఖ ముఖ్య కార్యదర్శి ఎస్ఎస్.రావత్, కార్యదర్శి సునీత, ఆర్బీఐ ఏపీ, తెలంగాణ రీజనల్ డైరెక్టర్ సుబ్రతా దాస్, సీఐడీ, పోలీసు అధికారులు తదితరులు పాల్గొన్నారు.
రాష్ట్ర ప్రభుత్వం రవాణాశాఖ లో పరిపాలన కేంద్రీకరణలో భాగంగా సులభమైన విధానంలో పౌరసేవల అందించేందుకు అడుగులు వేస్తుంది. ఇందులో భాగంగానే రాష్ట్రంలోని 440 పట్టణ సచివాలయాలు, 845 గ్రామ సచివాలయాలలోనూ రవాణాశాఖ అందించే వివిధ సేవలను ప్రజలకు చేరువ చేయనుంది. ఇందులో భాంగా రవాణాశాఖ ప్రధానంగా నిర్వహించే డ్రైవింగ్ లైసెస్సుల జారీ, వాహనదారుల రిజిస్ట్రేషన్లు, రవాణాశాఖ పన్నులు, వాహనముల పర్మిట్లకు సంబంధించిన 4 విభాగాల్లోని 56 సేవలను వారి ఉన్న ప్రాంతాలలోని సచివాలయ సిబ్బందిని సంప్రదించి సేవలను పొందే అవకాశం వుంటుంది.. ఇందుకోసం గ్రామ,వార్డు సచివాలయంలో ఉండే డిజిటల్ అసిస్టెంట్లు, సంక్షేమ సహాయ కార్యదర్శలను నియమించడం జరిగిందన్నారు. తద్వారా ప్రజలకు వారు ఉన్న ప్రాంతాల్లో రవాణాశాఖ అందించే సేవలు అందించడంతో పాటు దళారి వ్యవస్థను కట్టడికి సాధ్యమవుతుందని రవాణాశాఖ భావిస్తోంది. ముఖ్యంగా ఏజెంట్లు ప్రైవేటు వ్యక్తుల జోక్యం తగ్గిపోవడంతోపాటు, ప్రభుత్వానికి ఆదాయం కూడా పెరుగుతుంది. రవాణాశాఖ ద్వారా క్షేత్రస్థాయిలో వివిధ సేవలను ప్రజలకు అందించే దిశలో ప్రతి జిల్లా నుండి నలుగురు చొప్పున 13 జిల్లాల నుంచి వచ్చిన వారికి మాస్టర్ ట్రైనీర్స్ ఎంపిక చేసి ఇప్పటికీ రాష్ట్ర స్థాయిలో సాంకేతిక విధానంపై శిక్షణ అందిస్తారు. శిక్షణ పొందిన మాస్టర్ శిక్షకులు జిల్లాలలోకి వెళ్లి ప్రణాళిక ప్రకారం మిగతా సిబ్బందికి శిక్షణనిస్తూ గ్రామ, వార్డు సచివాలయ డిజిటల్, సంక్షేమ సహాయ కార్యదర్శిల ఆధ్వర్యంలో రవాణాశాఖ సేవలు అందిస్తారు. గ్రామ, వార్డు సచివాలయం అందించే రవాణాశాఖ సేవలను పూర్తిస్థాయిలో ప్రజలు సద్వినియోగం చేసుకోవాలని కోరుతున్న రవాణా శాఖ దళారులను, మధ్యవర్తులను ఆశ్రహించవద్దని ప్రజలను చైతన్యం చేస్తుంది...
రాష్ట్రంలోని సుమారు 90 లక్షల మంది డ్వాక్రా మహిళలకు లబ్ధి చేకూర్చే వైయస్ ఆర్ ఆసరా పథకం ప్రారంభోత్సవాన్ని విజయవంతం చేయాలని పురపాలక శాఖ మంత్రి బొత్స సత్యనారాయణ విజ్ఞప్తి చేశారు. సీఎం వైయస జగన్ మోహన్ రెడ్డి శుక్రవారం (11 వ తేదీ) ప్రారంభిస్తారన్నారు. ఈ ప్రారంభోత్సవంలో గ్రామ సచివాల యాలు, రైతు భరోసా కేంద్రాల వద్ద చేసినట్లుగానే అన్ని మున్సిపల్ కార్యాలయాల ముందు, వార్డు సెక్రటేరియట్ ల నుంచి ప్రజలు వర్ట్యుయల్ విధానంలో పాల్గొనేలా ఏర్పాట్లు చేసినట్లు మంత్రి వెల్లడించారు. మెప్మా మిషన్ డైరక్టర్ విజయలక్ష్మి తదితర ఉన్నతాధికారులతో గురువారం సాయంత్రం విజయవాడలోని క్యాంపు కార్యాలయంలో సమీక్ష నిర్వహించారు. ఈ సందర్బంగా మంత్రి మాట్లాడుతూ, ప్రజలకిచ్చిన హామీలను అమలు చేసే వరుస క్రమంలో వైయస్ఆర్ ఆసరా పథకానికి ఒక విశిష్టత ఉందన్నారు. . ముఖ్యమంత్రి వైయస్ జగన్ మోహనరెడ్డి నేతృత్వంలోని ప్రభుత్వం లో చేపడుతున్న సంక్షేమ, పథకాల్లో ఇది మరో ముందడుగన్నారు. రాష్ట్ర వ్యాప్తంగా సుమారు 88 లక్షల మంది డ్వాక్రా మహిళలకు అందుతున్న రూ.6792 కోట్లలో , పట్టణ ప్రాంతాల్లో సుమారు 15 లక్షల మంది డ్వాక్రా మహిళలకు రూ.1186 కోట్ల మేర ఆర్ధిక సహాయం అందనున్నదని ఈ సందర్భంగా అధికారులు వివరించారు. ఇంతటి ప్రత్యేకత ఉన్నందున, కోవిడ్ నిబంధనలను అనుసరిస్తూ, ఈ కార్యక్రమంలో పట్టణ ప్రాంతాల్లోని డ్వాక్రా సభ్యులదరూ పాల్గొనేలా వార్డు సెక్రటేరియట్ ల వద్ద, అన్ని మున్సిపల్ కార్యాలయాల వద్ద ప్రత్యేకంగా టీవీలు, స్క్రీన్ల ను ఏర్పాటు చేసినట్లు అధికారులు ఈ సందర్భంగా వివరించారు. అంతే కాకుండా ఈ కార్యక్రమంలో ప్రత్యక్షంగా పాల్గొనలేని వారు కూడా తమ ఇళ్ల నుంచే మొబైల్ ఫోన్ల ద్వారా పాల్గొనేలా అందరికీ , కార్యక్రమానికి సంబంధించిన లింక్ ను పంపుతున్నట్లు వారు తెలిపారు. ప్రభుత్వం అమలు చేస్తున్న సంక్షేమ కార్యక్రమాల్లో కలికితురాయి వంటి ఆసరా పథకం ప్రారంభోత్సవంలో ప్రజలందరూ వర్ట్యుయల్ విధానంలో హాజరై , సంక్షేమ ప్రభుత్వానికి బాసటగా నిలవాలని మంత్రి విజ్ఞప్తి చేశారు.
ఆంధ్రప్రదేశ్ రాష్ట్ర రాజధాని విషయంలో తమ జోక్యం ఉండబోదని మరోసారి కేంద్రం స్పష్టం చేసింది. గురువారం ఈ మేరకు ఏపీ హైకోర్టులో కేంద్ర హోంశాఖ అనుబంధ పిటిషన్‌ దాఖలు చేసింది. రాష్ట్రానికి ఒకే రాజధాని ఉండాలని చట్టంలో ఎక్కడా లేదని పేర్కొన్న కేంద్రం సెక్షన్‌ 13 ప్రకారం రాజధాని అంటే ఒకటికే పరిమితం కావాలని కాదని వివరించింది. 2018లో అప్పటి ప్రభుత్వం అమరావతిలో హైకోర్టు ఏర్పాటు చేసిందని, అంత మాత్రాన హైకోర్టు ఉంటేనే అమరావతినే రాజధాని అని చెప్పలేమని స్పష్టం చేసింది. రాజధాని విషయంలో రాష్ట్ర ప్రభుత్వానిదే అంతిమ నిర్ణయం అని కేంద్రం తెలిపింది. దీంతో మూడు రాజధానుల విషయంలో కోర్టుకెక్కిన వారికి కేంద్రం పూర్తి క్లారిటీ ఇచ్చినట్టు అయ్యింది. రాష్ట్రంలో ప్రధాన ప్రాంతాలు, ఇప్పటి వరకూ అభివ్రుద్ధికి నోచుకోని ప్రాంతాలను అభివ్రుద్ధి చేయాలనే లక్ష్యంలో వైఎస్సార్సీపీ ప్రభుత్వం మూడు రాజధానులను ప్రవేశపెట్టింది. కాగా ఈ నిర్ణయాన్ని సవాల్ చేస్తూ కోర్టుకి వెళ్లడంతోపాటు, అమరావతిలో ఆందోళనలు కూడా చేస్తూ వచ్చారు. ఈ నేపథ్యంలోనే కేంద్రం ఇచ్చిన క్లారిటీతోపాటు, కోర్టుకి దాఖలు చేసిన అఫడవిట్ మూడు రాజధానుల విషక్ష్ం కేంద్రానికి కాకుండా రాష్ట్ర పరిధిలోనిదేనని తేల్చి చెప్పింది.
తిరుమల శ్రీ వేంకటేశ్వరస్వామివారి సాల‌క‌ట్ల బ్ర‌హ్మోత్స‌వాలు సెప్టెంబరు 19 నుంచి 27వ తేదీ వరకు జ‌రుగ‌నున్నాయని టిటిడి ప్రకటించింది. ఈ మేరకు సెప్టెంబరు 18న బ్ర‌హ్మోత్స‌వాలకు అంకురార్ప‌ణ నిర్వహిస్తారు. బ్ర‌హ్మోత్స‌వాల నేపథ్యంలో సెప్టెంబరు 15న కోయిల్ ఆళ్వార్ తిరుమంజ‌నం జ‌రుగ‌నుంది. కరోనా వ్యాధి వ్యాప్తిని అరిక‌ట్టే చ‌ర్య‌ల్లో భాగంగా, భక్తులకు, టిటిడి ఉద్యోగులకు ఈ వ్యాధి వ్యాపించ‌కుండా నివారించేందుకు ఈ బ్ర‌హ్మోత్స‌వాల‌ను ఏకాంతంగా నిర్వహించాలని టిటిడి నిర్ణ‌యించింది. ఈ ఉత్స‌‌వాల్లో విశేషంగా..సెప్టెంబరు 19న - ధ్వ‌జారోహ‌ణం, సెప్టెంబరు 23న - గ‌రుడ‌సేవ, సెప్టెంబరు 24న - స్వ‌ర్ణ‌ర‌థోత్స‌వం(సర్వభూపాల వాహ‌నం), సెప్టెంబరు 26న - ర‌థోత్స‌వం(సర్వభూపాల వాహ‌నం) ,సెప్టెంబరు 27న - చ‌క్ర‌స్నానం, ధ్వ‌జావ‌రోహ‌ణం నిర్వహిస్తారు. అంతేకాకుండా ఈ కార్యక్రమాలన్నీ కోవిడ్-19 నిబంధనల నేపథ్యంలో సెప్టెంబరు 24న స్వ‌ర్ణ‌ర‌థోత్స‌వం, సెప్టెంబరు 26న ర‌థోత్స‌వం ఉండని కారణంగా ఈ రెండు రోజుల్లో సర్వభూపాల వాహనంపై శ్రీవారు ఉభయదేవేరులతో కలిసి వేంచేపు చేస్తారు.
వై.ఎస్.ఆర్. ఆసరా కార్యక్రమం ఈ నెల 11న సీఎం వైఎస్ జగన్మోహన్ రెడ్డి ప్రారంభించనున్నారని రాష్ట్ర మంత్రి బొత్స సత్యనారాయణ చెప్పారు. బుధవారం ఈమేరకు విజయవాడ నుంచి మునిసిపల్ శాఖ ప్రధాన కార్యదర్శి జె.శ్యామల రావు , సి.డి.ఎం.ఎ.విజయకుమార్ వీడియో కాన్ఫరెన్స్ నిర్వహించారు. ఈ వీడియో కాన్ఫరెన్స్ లో తిరుపతి నగరపాలక సంస్థ నుంచి కమిషనర్ గిరీషా పాల్గొన్నారు. ఈ సందర్భంగా మంత్రి మాట్లాడుతూ, వైఎస్సార్ ఆసరా కార్యక్రమాన్ని పండుగవాతావరణంలో నిర్వహించాలని సూచించారు. స్వచ్ సర్వేక్షన్ లో జాతీయ స్థాయిలో ఉత్తమ ర్యాకులు సాధించడం సంతోషకరమన్నారు. ర్యాంకులు సాధించిన ప్రతిఒక్కరికి పేరుపేరునా అభినందనలు తెలిపారు. ర్యాంకులు తృటిలో తప్పిన వారు మరోసారి ర్యాంకు సాధించేందుకు కృషి చేయాలన్నారు. ర్యాంకులు సాధించిన ఆయా కమిషనర్ లను ముఖ్యమంత్రి త్వరలోనే స్వయంగా అభినందిస్తారన్నారన్నారు. పాదయాత్రలో ముఖ్యమంత్రి ఇచ్చిన హామీ మేరకు పేదలను ఆదుకునేందుకు ఈ వై.ఎస్.ఆర్ . ఆసరా, చేయూత కార్యక్రమం నిర్వహిస్తున్నామన్నారు. వీడియో కాన్ఫరెన్స్ ద్వారా ఈ కార్యక్రమాన్ని ముఖ్యమంత్రి ప్రారంభిస్తారన్నారు. కోవిడ్ నిబంధనలు పాటిస్తూ ప్రతి సచివాలయం వద్ద టి.వి.లు ఏర్పాటు చేసి లైవ్ టెలికాస్ట్ చేయాలన్నారు. ప్రతి చోటా ప్రజాప్రతినిధులు హాజరయ్యేలా ఏర్పాట్లు చేయాలన్నారు. వారం రోజులు పాటు ఈ కార్యక్రమం నిర్వహించేలా తగు ఏర్పాట్లు చేసుకోవాలన్నారు. తిరుపతి నగరపాలక సంస్థ కమిషనర్ గిరీషా మాట్లాడుతూ, వై.ఎస్.ఆర్. ఆసరా కు సంబంధించి లబ్ధిదారులను ఎంపిక చేయడం జరిగిందన్నారు. వారందరికీ 11 ముఖ్యమంత్రి ప్రారంభోత్సవం సందర్భంగా 3160 స్వయం సహాయక సంఘాలకు మొదటి విడతగా 30.84 కోట్ల రూపాయలు సంఘాల ఖాతాల్లో జమ చేసేందుకు చర్యలు తీసుకున్నామన్నారు. ప్రభుత్వం ప్రవేశపెట్టి అమలు చేస్తున్న అన్ని సంక్షేమ పథకాలు ప్రజలందరికీ అర్థమయ్యేలా మా సిబ్బంది అవగాహన కల్పిస్తున్నారన్నారు. తిరుపతిలోని 50 డివిజన్లలో వారం రోజులు పాటు ఈ కార్యక్రమాలు నిర్వహించేందుకు అన్ని ఏర్పాట్లు చేస్తామన్నారు. వై.ఎస్.ఆర్. ఆసరా, చేయూత కార్యక్రమాలు కోవిడ్ నిబంధనలు పాటిస్తూ నిర్వహించడం జరుగుతుందని చెప్పారు. సమావేశం అనంతరం 11న చేయాల్సిన ఏర్పాట్లపై అధికారులతో సమీక్షించి, పక్కాగా ఏర్పాట్లు చేయాలని ఆదేశించారు. ఈ వీడియో కాన్ఫరెన్స్ లో అదనపు కమిషనర్ హరిత, ఉప కమిషనర్ చంద్రమౌళీశ్వర్ రెడ్డి, సూపరింటెండెంట్ ఇంజినీర్ చంద్రశేఖర్, మునిసిపల్ ఇంజినీర్ వెంకట్రామిరెడ్డి, మేనేజర్ హాసిమ్, వైద్యాధికారిని సుధారాణి, రెవిన్యూ ఆఫీసర్ గాలి సుధాకర్, శానిటరీ సూపరువైజర్స్ గోవర్ధన్, చెంచెయ్య, మెప్మా రమణ, తదితరులు పాల్గొన్నారు.
తిరుమల శ్రీ వేంకటేశ్వరస్వామివారి ఆలయంలో ఆన్‌లైన్ కల్యాణోత్సవ సేవకు భక్తుల నుండి విశేష స్పంద‌న ల‌భిస్తోంది. కరోనా వ్యాధి వ్యాప్తి నేపథ్యంలో భక్తులు నేరుగా క‌ల్యాణోత్స‌వంలో పాల్గొనే అవకాశం లేక‌పోవ‌డంతో భక్తుల కోరిక మేరకు ఆగ‌స్టు 7న ఈ సేవ‌ను టిటిడి ప్రారంభించింది. అప్ప‌టినుండి సెప్టెంబరు 7వ తేదీ వరకు నెల రోజుల్లో 8,330 టికెట్ల‌ను భక్తులు ఆన్‌లైన్‌లో బుక్ చేసుకున్నారు. ఆగ‌స్టు 15వ తేదీన అత్య‌ధికంగా 1,012 టికెట్ల‌ను భక్తులు బుక్ చేసుకుని ఆన్‌లైన్ సేవ‌లో పాల్గొన్నారు. ఈ సేవ‌లో పాల్గొన్న గృహ‌స్తులకు ఉత్త‌రీయం, ర‌విక, అక్షింత‌లు, క‌ల‌కండ ప్ర‌సాదాన్ని త‌పాలా శాఖ ద్వారా వారి చిరునామాకు టిటిడి పంపుతోంది. ఆన్‌లైన్ క‌ల్యాణోత్స‌వంలో పాల్గొనే గృహ‌స్తులు(ఇద్ద‌రు) టికెట్ బుక్ చేసుకున్న తేదీ నుంచి 90 రోజుల్లోపు శ్రీ‌వారిని ద‌ర్శించుకునే అవ‌కాశాన్ని టిటిడి క‌ల్పించింది. వీరికి సుప‌థం ప్ర‌వేశ‌మార్గం ద్వారా ఉచితంగా శ్రీవారి ద‌ర్శ‌నం క‌ల్పిస్తారు. ఈ అవ‌కాశాన్ని ఆన్‌లైన్ క‌ల్యాణోత్స‌వంలో పాల్గొన్న గృహ‌స్తులు వినియోగించుకోవాల‌ని టిటిడి కోరుతోంది.
తిరుమల శ్రీవారి ద‌ర్శ‌నానికి సంబంధించిన రూ.300/- ప్రత్యేక ప్రవేశ ద‌ర్శ‌న టికెట్ల అదనపు కోటాను టిటిడి బుధవారం సాయంత్రం ఆన్‌లైన్‌లో విడుదల చేసింది. సెప్టెంబరు 10 నుండి 30వ తేదీ వరకు అద‌నంగా రోజుకు 3 వేల టికెట్లు చొప్పున ఆన్‌లైన్‌లో అందుబాటులో ఉంచినట్టు టిటిడి అధికారులు ప్రకటించారు. కరోనా వ్యాధి వ్యాప్తి నివార‌ణ చ‌ర్య‌ల్లో భాగంగా ఆఫ్‌లైన్‌లో ఇస్తున్న స‌ర్వ‌ద‌ర్శ‌నం టైంస్లాట్ టోకెన్ల‌ను సెప్టెంబరు 30వ తేదీ వరకు టిటిడి తాత్కాలికంగా నిలుపుద‌ల చేసిన విష‌యం తెలిసిందే. ఈ క్రమంలో భక్తుల కోరిక మేరకు అద‌నంగా ప్రత్యేక ప్రవేశ ద‌ర్శ‌న టికెట్ల‌ను ఆన్‌లైన్‌లో అందుబాటులో ఉంచారు. దీంతో భక్తులు చేసిన ఆందోళనకు టిటిడి అధికారులు స్వామివారి ప్రత్యేక ప్రవేశ కోటా విడుదలకు చర్యలు చేపట్టారు. కరోనా సమయంలోనే స్వామివారిని భక్తులు చూడక, వైరస్ తగ్గుతున్న సమయంలో తిరుమలకు చేరుకుంటున్నారు. ఈ సమయంలో టిటిడి తీసుకున్న నిర్ణయంతో ఆందోళనకి దిగడంతో టిటిడి మళ్లీ ఆ టిక్కెట్ల కోటా విడుదల చేయక తప్పలేదు...
తూర్పుగోదావరి జిల్లా అంతర్వేది దేవస్థానంలో శ్రీ లక్ష్మీనరసింహ స్వామివారి రథం దగ్ధమై సంఘటన విషయంలో ప్రభుత్వం ఆలయ ఈఓపై బదిలీ వేటు వేసింది. ఈమేరకు మంగళవారం చక్రధరరావును దేవాదాయశాఖ కమిషనర్ విధుల నుండి తప్పించారు. ఆయన స్థానంలో ఎర్రంశెట్టి భద్రాజీరావుని కార్యనిర్వహణాధికారిగా నియమిస్తూ ఉత్తర్వులు జారీచేసింది ప్రభుత్వం. ఆలయంలో స్వామివారి రథం దగ్ధమైన విషయంలో జరిగిన నిర్ల్యక్ష్యం లో అనేక విమర్శలు, ఆందోళన లు,ఆరోప ణలు సర్వత్రా వినిపిస్తున్నాయి. ఇదే సమయంలో అటు ప్రభుత్వం కూడా ఆలయ సంఘటన విషయంలో సోషల్ మీడియాలో చిలవలు పలవలుగా అల్లి చూపించే అవాస్థవాలను నమ్మవద్దని కోరింది. అంతేకాదు ఇలాంటి సంఘటనలు జరిగినపుడు భక్తుల మనోభావాలు దెబ్బతిన కుండా లోతుగా అధ్యయనం చేయించే దిశగా అధికారులు ప్రయత్నాలు ముమ్మరం చేశారు. మరోవైపు తేనపట్టు కోసం పెట్టిన నిప్పు స్వామివారి రథంపై ఉన్న కమ్మలకు అంటుకొని ప్రమాదం జరిగినట్టుగా తేల్చిన ప్రాధమిక విచారణపై భక్తులు ఆగ్రహం వ్యక్తం చేస్తున్నారు. విచక్షణా రహితంగా అలా ఎలా చేస్తారని మండిపడుతున్నారు. కానీ ప్రభుత్వం మాత్రం సమగ్ర విచారణ జరిపిస్తామని చెబుతోంది.
భగవద్గీత ప్రాశస్త్యాన్ని భక్తులకు తెలియజేసేందుకు సెప్టెంబర్ 10వ తేదీ నుండి తిరుమలలోని నాదనీరాజనం వేదికపై గీతా పారాయణం ప్రత్యక్ష ప్రసారం చేస్తా మని టీటీడీ అదనపు ఈవో ఎవి.ధర్మారెడ్డి తెలిపారు. నాదనీరాజనం వేదికపై మంగళవారం సాయంత్రం 4 నుండి 5 గంటల వరకు గీతా పారాయణం శ్లోకపఠనం, వ్యాఖ్యానంతో మూడో విడత ట్రయల్ రన్ నిర్వహించారు. వేదపారాయణందార్ కాశీపతి భగవద్గీత పారాయణం చేయగా, వేదపండితుడు కుప్పా విశ్వనాథశాస్త్రి వ్యాఖ్యానం చెప్పారు. ఈ సందర్భంగా అదనపు ఇఓ మాట్లాడుతూ, సుందరకాండ పారాయణం, విరాటపర్వం పారాయణం భక్తులను ఎంతగానో ఆకట్టుకున్నాయని, ఇదే తరహాలో గీతా పారాయణం విశేషంగా ఆకట్టుకుంటుందని చెప్పారు. సాయంత్రం 6 నుండి 7 గంటల వరకు ఎస్వీబీసీలో ఈ పారాయణం ప్రత్యక్ష ప్రసారం ఉంటుందన్నారు. శ్లోక పఠనం, వ్యాఖ్యానంతో పాటు ప్రస్తుత పరిస్థితుల్లో మానవాళి ఎదుర్కొంటున్న సమస్యలకు తగిన పరిష్కారాన్ని సూచిస్తూ గీతా పారాయణం ఉంటుందన్నారు. అనంతరం పండితుల నుండి సూచనలు, సలహాలు స్వీకరించారు.
ఇప్పటికే సెప్టెంబరు 1, 3వ తేదీల్లో రెండు విడతల్లో ట్రయల్ రన్ నిర్వహించి ఎలాంటి లోటుపాట్లు లేకుండా పారాయణం జరిగేందుకు వీలుగా టిటిడి చర్యలు చేపట్టింది. ఈ కార్యక్రమంలో ఎస్వీ వేద విశ్వవిద్యాలయం ఉపకులపతి ఆచార్య సన్నిధానం సుదర్శన శర్మ, ధర్మగిరి వేద పాఠశాల ప్రిన్సిపాల్ కుప్పా శివసుబ్రమణ్య అవధాని, ఎస్వీ ఉన్నత వేదాధ్యయన సంస్థ ప్రాజెక్టు అధికారి డా. ఆకెళ్ల విభీషణ శర్మ, వేద పాఠశాల పండితులు పాల్గొన్నారు.
సెప్టెంబరు 12న 4వ విడత సుందరకాండ అఖండ పారాయణం..
తిరుమల నాదనీరాజనం వేదికపై సెప్టెంబరు 12వ తేదీన 4వ విడత సుందరకాండ అఖండ పారాయణం నిర్వహించనున్నారు. ఆ రోజు ఉద‌యం 7 గంటల నుండి సుందరకాండలోని 12వ సర్గ నుంచి 14వ సర్గ వరకు ఉన్న 147 శ్లోకాలను అఖండ పారాయణం చేయనున్నారు. తిరుమల వేద విజ్ఞాన పీఠం, వేద విశ్వవిద్యాలయం, సంస్కృత విశ్వవిద్యాలయం, వేద పారాయణదారులు, పండితులు ఈ అఖండ పారాయ‌ణంలో పాల్గొననున్నారు.
తూర్పుగోదావరి జిల్లా అంతర్వేది శ్రీలక్ష్మీనరసింహస్వామి ఆలయం ప్రాంగణంలోని కల్యాణోత్సవ రథం అగ్నికి ఆహుతవడం పట్ల విశాకలోని శ్రీ శారదా పీఠం అధి పతి స్వరూపానందేంద్రసరస్వతి ఆవేదన వ్యక్తం చేశారు. స్వామిరి వారి రథం దగ్దమైన సంఘటనను తాను ఖండిస్తున్నానని చెప్పారు. ఆయన మీడియాతో మాట్లాడు తూ, స్వామివార్ల రధాన్ని ఎంతో జాగ్రత్తగా భద్రపరుస్తారని అలాంటి రధం ఏవిధంగా ఆహుతైందో ప్రభుత్వం విచారణ చేపట్టి దోషులను కఠినంగా శిక్షించాలన్నారు. ఇలాంటి సంఘటనల ద్వారా ప్రజలు మానసికంగా ఆందోళన చెందుతారని అన్నారు. స్వామి రథం విషయంలో నిర్లక్ష్యం తగదన్న స్వామీజీ ఇలాంటి విషయాలను జీవకోటి మనుగడను ప్రశ్నార్ధం చేస్తాయన్నారు. స్వామివారి రథం ఆగ్నికి ఆహుతి అవడమంటే అపశకునానికి సూచిక అన్నారు. ఈ సంఘటను ద్రుష్టిలో ఉంచుకొని రాష్ట్రంలోని ఆలయాలకు కట్టుదిట్టమైన భద్రతా ఏర్పాట్లు చేయాలని, ప్రతీచోట సిసి కెమెరాలు అమర్చాలన్నారు. తద్వారా ఏదైనా సంఘటన జరిగితే తక్షణమే దోషులను పట్టుకొని శిక్షించడానికి వీలు కలుగుతుందన్నారు.
ఆంధ్రప్రదేశ్ ప్రభుత్వం ప్రతిష్టాత్మకంగా తీసుకున్న సమగ్ర భూ సర్వేతో భూ వివాదాలన్నీ పరిష్కారం కానున్నాయి. ఈమేరకు జనవరి నుంచి ప్రారంభం కానున్న ఈ సర్వేకు అత్యాధునిక సాంకేతికతపై సర్వేయర్లకు రాష్ట్రవ్యాప్తంగా జిల్లాల్లో శిక్షణ ఇస్తున్నారు. మూడునెలల్లో శిక్షణ పూర్తయిన తరువాత సర్వేయర్లు సర్వే మొదలు పెట్టి ప్రభుత్వానికి నివేదికలు సమర్పిస్తారు. అదే సమయంలో భూ వివాదాలు పరిష్కారం కావడంతోపాటు, ఆక్రమణలు జరిగిన ప్రభుత్వ భూములను కూడా స్వాధీ నం చేసుకునే అవకాశం వుంది. దీంతో ఆక్రమణదారుల గుండెల్లోరైళ్లు పరిగెడుతున్నాయి. రాష్ట్రంలో చాలా మంది కొనుగోలు చేసిన భూములు కంటే అధికంగా కొం డ ప్రాంతాలు, గెడ్డ ప్రాంతాలు, ఇరిగేషన్ కి చెందిన భూములను ఆక్రమించుకుని అనుభవిస్తున్నారు. ప్రభుత్వం తీసుకున్న సమగ్ర భూ సర్వేతో ఇలాంటి వివాదాల న్నీ పరిష్కారం కానున్నాయి. దీంతో ప్రభుత్వానికి ఒక లెక్కతేలుతుంది. తద్వారా ప్రభుత్వ భూముల్లో ఉద్యోగులకు ఆవాసాలు ఏర్పాటు చేయడంతోపాటు, ప్రభుత్వ కార్యాలయాల నిర్మాణాలకు స్థలం చేకూరుతుంది. ఇలా చాలా ప్రయోజనాలు ఈసర్వేతో కలగనున్నాయి.
