బుధవారం నుంచి రాష్ట్రవ్యాప్తంగా కర్ఫ్యూ..

రాష్ట్రంలో బుధవారం నుంచి కర్ఫ్యూ అమలు చేస్తున్నామని, లాక్ డౌన్ కాదని రాష్ట్ర వైద్య ఆరోగ్య శాఖ ముఖ్య కార్యదర్శి అనిల్ కుమార్ సింఘాల్ తెలిపారు. మంగళగిరిలోని ఏపీఐఐసీ భవనంలో సోమవారం నిర్వహించిన విలేకరుల సమావేశంలో ఆయన మాట్లాడారు. రాష్ట్రంలో 24 గంటల్లో 1,15,275 కరోనా పరీక్షలు నిర్వహించగా, 18,972 పాజిటివ్ కేసులు నమోదయ్యాని, 71 మరణాలు సంభవించాయని తెలిపారు. ఆదివారం కంటే అయిదు వేల కేసులు తక్కువగా నమోదయ్యాని తెలిపారు. 599 ఆసుపత్రుల్లో  కరోనా సేవలు అందిస్తున్నామన్నారు. కర్నూల్ మినహా మిగిలిన జిల్లాల్లో ఐసీయూ బెడ్ లు తక్కువ సంఖ్యలో అందుబాటులో ఉన్నాయన్నారు. కర్నూలు లో 324 బెడ్లు ఖాళీగా ఉన్నాయన్నారు. కొవిడ్ కేర్ సెంటర్లలో 11,665 మంది వైద్య సేవలు పొందుతున్నారన్నారు. రాష్ట్ర వ్యాప్తంగా ఉన్న 82 కొవిడ్ కేర్ సెంటర్లలో 68 చోట్ల కరోనా టెస్టింగ్ సదుపాయం ఏర్పాటు చేశామన్నారు. 

అన్ని ప్రభుత్వాసుపత్రుల్లోనూ పీఎస్ఏ ప్లాంట్ల ఏర్పాటు

ఈరోజు 447 మెట్రిక్ టన్నుల లిక్విడ్ ఆక్సిజన్ ను రాష్ట్ర వ్యాప్తంగా ఉపయోగించామన్నారు. రాష్ట్రంలో పెరిగిన కేసుల సంఖ్యను దృష్టిలో పెట్టుకుని ఆక్సిజన్ కేటాయింపులు పెంచాలని కేంద్ర ప్రభుత్వాన్ని కోరామన్నారు. కరోనా కట్టడి కోసం రాష్ట్ర ప్రభుత్వం ఏర్పాటు చేసిన రాష్ట్ర స్థాయి కొనుగోలు కమిటీ తొలి సమావేశం నేడు(సోమవారం) జరిగిందన్నారు. ఈ సమావేశంలో  ఆక్సిజన్ స్టోరేజ్, రవాణాకు అవసరమైన క్రయోజనిక్ ట్యాంకర్లు, ఇతర పరికరాల కొనుగోలుపై చర్చించామన్నారు. టీచింగ్ సహా అన్ని ప్రభుత్వాఆసుపత్రుల్లోనూ పీఎస్ఏ ప్లాంట్లు ఏర్పాటు చేయాలని నిర్ణయించామన్నారు. ఈ ప్లాంట్ల ఏర్పాటుకు అవసరమైన పరికరాలు, పైప్ లైన్ల కొనుగోలుకు మూడు నాలుగు రోజుల్లో టెండర్లు ఫైనల్ చేస్తామన్నారు. ఇందుకోసం ఎన్ని కోట్ల రూపాయలు వెచ్చించనున్నామనేది రెండ్రోజుల్లో తెలియజేస్తామన్నారు.  104 కాల్ సెంటర్ కు 13,839 కాల్స్ వచ్చాయన్నారు. వాటిలో 5,093 కాల్స్ వివిధ రకాల సమాచారం, 3,413 కాల్స్ కరోనా టెస్టులు, 2,370 ఆసుపత్రుల్లో అడ్మిషన్ల వివరాలు, 1,768 ఫోన్ కాల్స్ కరోనా టెస్టు రిజల్ట్ కోసం వచ్చాయన్నారు. 

లాక్ డౌన్ కాదు... కర్ఫ్యూ మాత్రమే...

పెరుగుతున్న కేసుల నేపథ్యంలో...రాష్ట్రంలో రెండు రకాల కట్టడి నిర్ణయాలు తీసుకున్నామన్నారు. ఉదయం 6 గంటల నుంచి మధ్యాహ్నం 12 గంటల వరకూ ఎటువంటి ఆంక్షలు ఉండవన్నారు. వ్యాపారాలకు, సాధారణ జీవనానికి ఎటువంటి ఆటంకాలు ఉండబోవన్నారు. అయితే, ఎక్కడైనా అయిదుగురు కంటే ఎక్కువగా ఉండకుండా ఉండేలా 144 సెక్షన్ అమలు చేస్తామన్నారు. నిత్యావసరాలు, ఇతర సరకుల కొనుగోలు సమయంలో భౌతిక దూరం పాటించాలన్నారు. గుంపుగా ఎక్కడా అయిదుగురికి  మించి ఉండకూడదన్నారు. 144 సెక్షన్ నిబంధన ఒక్కటే ఉదయం వేళల్లో అమలు చేస్తామన్నారు. ఇక రెండోది...మధ్యాహ్నం 12 గంటల నుంచి ఉదయం ఆరు గంటల వరకూ రాష్ట్ర వ్యాప్తంగా కర్ఫ్యూ పరిస్థితి ఉంటుందన్నారు. ఇది లాక్ డౌన్ మాత్రం కాదన్నారు. మెడికల్ సహా అత్యవసర సర్వీసులకు మినహాయింపు ఉంటుందన్నారు. మీడియా, ఉద్యోగులకు ఎటువంటి ఆటంకం ఉండబోదన్నారు. పాస్ లు, ప్రయాణికుల రాకపోకలపై విధి విధానాలను రేపు తెలియజేస్తామన్నారు. ఈ నిబంధనలు బుధవారం ఉదయం నుంచి అమల్లోకి వస్తాయన్నారు. కర్ఫ్యూతో పెరుగుతున్న కరోనా కేసులను కట్టడి చేయొచ్చునన్నారు. కర్ఫ్యూ కు సంబంధించి పూర్తి వివరాలను మంగళవారం అందజేస్తామన్నారు. కరోనా కట్టడి కోసం సీఎం వైఎస్ జగన్మోహన్ రెడ్డి రెండ్రోజులకొకసారి అధికారులతో సమీక్షా సమావేశం నిర్వహిస్తున్నారన్నారు. నేడు(సోమవారం) సమీక్షా సమావేశం నిర్వహించారన్నారు. కొన్ని జిల్లాలో బెడ్లు నిండిపోయాయని, మరికొన్ని జిల్లాలో ఖాళీలు ఉన్నాయని తెలిపారు. 

ఏపీలో కొత్త స్ట్రెయిన్ వ్యాప్తి లేదు...

ఏపీలో కొత్త స్ట్రెయిన్ లేదని, ప్రస్తుతం ఉన్న స్ట్రెయిన్ గతేడాది జులై నుంచే రాష్ట్రంలో ఉందని రాష్ట్ర వైద్య, ఆరోగ్య శాఖ ముఖ్య కార్యదర్శి అనిల్ కుమార్ సింఘాల్ తెలిపారు. ఇప్పటికే సీసీఎంబీ అధికారులతో తమ అధికారులు మాట్లాడారన్నారు. కొత్త స్ట్రెయిన్ పై సీసీఎంబీ అధికారికంగా ప్రకటించలేదన్నారు. ప్రజలను భయభ్రాంతులకు గురిచేసేలా అవాస్తవాలు సోషల్ మీడియాలో ప్రచారం చేయడం తగదన్నారు. కొత్త స్ట్రెయిన్ వల్ల కేసులు పెరుగుతున్నాయనడం సరికాదన్నారు. కేంద్ర ప్రభుత్వం ప్రకటించిన కొవిడ్ గైడ్ లైన్స్ ను పాటించడం ద్వారా కరోనా వైరస్ ను అడ్డుకట్ట వేయొచ్చునన్నారు. ప్రజలందరూ తప్పనిసరిగా కొవిడ్ గైడ్ లైన్స్ ను పాటించాలని ఆయన కోరారు. 

టీకా పంపిణీలో 45 ఏళ్లు పైబడిన వారికి ప్రాధాన్యత...

45 ఏళ్లకు పైబడిన వారికి ఇచ్చే వ్యాక్సిన్లను కేంద్ర ప్రభుత్వం అందజేస్తోందన్నారు. 18 నుంచి 45 ఏళ్లలోపు వారికి అవసరమైన వ్యాక్సిన్లను ఏపీ ప్రభుత్వమే కొనుగోలు చేస్తుందన్నారు. ఇలా కొనుగోలు చేసిన వ్యాక్సిన్లను కూడా 18 నుంచి 45 ఏళ్లలోపు వారికి కాకుండా 45 ఏళ్ల పైబడిన వారికే వేయాలని రాష్ట్ర ప్రభుత్వం నిర్ణయించిందన్నారు. వృద్ధులకు వేసిన తరవాతే యువతకు వ్యాక్సిన్ వేయడం సరైన పద్ధతన్నారు. అందరికీ వ్యాక్సిన్ వేయడానికి కొన్ని నెలల సమయం పడుతుందన్నారు. 

గ్రామ సచివాలయంలో మరో ముసలం..

ఆంధ్రప్రదేశ్ ప్రభుత్వం భారతదేశంలోనే ఎంతో ప్రతిష్టాత్మకంగా ప్రవేశపెట్టిన గ్రామ సచివాలయ వ్యవస్థలో ఏడాది తిరగగానే మరో కొత్త ముసలం మొదలైంది. గ్రామ పంచాయతీ, గ్రామసచివాలయాలు స్థానిక సంస్థల ఎన్నికల తరువాత వేరుగా మారిపోయాయి. ఈ సమయంలోనే ప్రభుత్వం జీఓనెంబరు-2 ద్వారా గ్రామసచివాలయానికి వీఆర్వోను డిడిఓగా నియమిస్తూ ప్రభుత్వం ఉత్తర్వులు జారీచేసింది. దీనితో ప్రభుత్వం ప్రతీ 3వేల మందికి ఒక గ్రామసచివాలయాన్ని ఏర్పాటు చేసి అక్కడ నియమించిన గ్రామ కార్యదర్శి గ్రేడ్-5 లకు పనిలేకుండా పోయింది. ఆర్ధికపరమైన అంశాలతోపాటు, కొన్ని అధికారాలను డీడీఓలుగా ఉన్న వీఆర్వోలకే అప్పగించడంతో సచివాలయ కార్యదర్శిలు పలు క్లస్టర్లలో చేసేపనులకు ఎవరు జవాబుదారీగా ఉండాలో తెలియక మధన పడుతూ, రాష్ట్రవ్యాప్తంగా తమ ఆందోళన మొదలు పెట్టారు. పంచాయతీలకు గ్రేడ్-1 పంచాయతీ కార్యదర్శిలను నియమించి, గ్రామసచివాలయాలకు గ్రేడ్-5 కార్యదర్శిలను అధిపతులను చేయడంతోపాటు ఆర్ధికపరమైన అంశాలు తమకే అప్పగించాలనేది వీరి వాదన. సచివాలయ కార్యదర్శిలు సెల్ఫ్ డిడిఓలుగా ఉన్నప్పటికీ ఆర్ధిక పరమైన అంశాలతోపాటు ఇతరత్రా అంశాలన్నింటికీ ప్రభుత్వం వీఆర్వోలనే సచివాలయాలకు బాసులను చేయడంతో వీరంతా తమ విధులు, బాధ్యతలు, క్లష్టర్ పరిధిలోని పనులకు ఎవరు జవాబు దారో చెప్పాలంటూ ఎంపీడీఓలకు, జిల్లా పంచాయతీ అధికారులకు వినతి పత్రాలు ఇవ్వడం మొదలు పెట్టారు. రాష్ట్రవ్యాప్తంగా లక్ష మంది సిబ్బందిని వివిధ విభాగాల్లో నియమించిన ప్రభుత్వం సచివాలయాలకు గ్రేడ్-5 కార్యదర్శిలగా ఉంచిన ప్రభుత్వం షడన్ గా వీఆర్వోలను డిడిఓలుగా చేయడం పట్ల గ్రామ కార్యదర్శిలంతా ఆందోళన బాట పట్టారు. వీఆర్వోలు విద్యార్హతలు ఇంటర్మీడియట్ మాత్రమేనని, తాము డిగ్రీలు చదువుకొని ఎపీపీఎస్సీ ద్వారా విధుల్లోకి చేరామని వాధిస్తున్నారు. అదీ నిజమే వీఆర్వోల్లో చాలా మంది పదవ తరగతి చదివిన వారే ఉన్నారు. ఇటీవల ప్రభుత్వం ఇంటర్ విద్యార్హత చేయడంతో వీరంతా ఇంటర్ పాసయ్యారు. అతి కొద్దిమంది మాత్రమే దూరవిద్యలో డిగ్రీ చదివారు. కానీ గ్రామసచివాలయ గ్రేడ్-5 కార్యదర్శిలు మాత్రం నేరుగా డిగ్రీ క్వాలిఫికేషన్ లో విధుల్లో చేరి సుమారు ఏడాదిన్నరగా ప్రజలకు సేవలు అందిస్తూ వస్తున్నారు. దీనితో ఒక్కసారిగా వీరికి కూడా ప్రభుత్వం ఇచ్చిన జీఓ పట్ల అసహనం పెరుగుతోంది. ఈ క్రమంలోనే ప్రభుత్వం వీఆర్వోలకు అధికారాలిస్తూ జారీచేసిన జీఓనెంబరు2 లోపాలను, అర్ధం కాని కొన్ని అంశాలను తెరమీదకు తీసుకు వస్తున్నారు. మరోవైపు ఇప్పటికీ చాలా పంచాయతీలు ఇన్చార్చి కార్యదర్శిలతోనే నడుతుస్తున్నాయి. మరికొన్ని గ్రామసచివాలయాల్లో విధులు, రికార్డులు, సిబ్బంది బదాలయింపులు కూడా పూర్తి కాలేదు. ఈ తరుణంలోనే పంచాయతీ ఎన్నికలు జరగడం, అక్కడ పంచాయతీ కార్యదర్శిలకు పూర్తిస్థాయిలో పనులు ఉండటంతో జీఓ నెంబరు 2 ద్వారా గ్రామసచివాలయంలోని గ్రేడ్-5 కార్యదర్శిల అధికారాలన్నీ వీఆర్వోల చేతి వెళ్లిపోవడంతో అంతా గందరగోళంగా మారింది. ఈ జీఓనెంబరు విషయంలో తొలుత ప్రభుత్వం కాస్త క్లారిటీ ఇచ్చినప్పటికీ పూర్తిస్థాయిలో గ్రామసచివాలయంలో పనిచేస్తున్న గ్రేడ్-5 కార్యదర్శిలకు తమ అధికారాలు పోతే, ఆర్దిక పరమైన విషయాలకు తమకంటే స్థాయి తక్కువగా వున్న వీఆర్వోల దగ్గరకు ఎలా వెళతామనే భావనలో ఉన్నారు. తాము చేసే పనులకు ఆర్ధిక అధికారాలు తమకు అప్పగించాలని, పంచాయతీలకు ప్రత్యేకంగా కార్యదర్శిలను నియమించాలని వీరంతా డిమాండ్ చేస్తున్నారు. ప్రస్తుతం రాష్ట్రంలో ఇదే హాట్ టాపిక్ గా వుంది. కానీ ప్రస్తుతం రాష్ట్రవ్యాప్తంగా గ్రామసచివాలయాల్లో విధులు నిర్వహిస్తున్నవారందరికీ ప్రొభిషన్ పిరియడ్ రెండేళ్లు ఇంకా పూర్తి కాలేదు. ఈ సమయంలో ప్రభుత్వం ఏ విధంగా పనిచేయమంటే ఆవిధంగా పనిచేయాలి. వీరు డిమాండ్ లు చేయడానికి వీలుపడదు. అయినప్పటీ ప్రభుత్వం ఇచ్చిన జీఓ విషయంలో లోపాలను, అర్ధం కానీ, మతలబులున్న విషయాలను గ్రేడ్-5 కార్యదర్శిలు ప్రభుత్వం ద్రుష్టికి అధికారుల ద్వారా తీసుకెళుతున్నారు. ఇప్పటి వరకూ పాత పంచాయతీ కార్యదర్శిలు, ఈఓపీఆర్డీల చేతిలోనే ఉన్న పంచాయతీలు, సచివాలయాల అధికారాల బదలాయింపు జరగకుండా ఇపుడు మళ్లీ ప్రభుత్వం గ్రేడ్-5 కార్యదర్శిల విధుల్లో కోత విధించడం తెరపైకి వీఆర్వోలను డిడిఓలుగా తీసుకురావడం ముందు ముందు ఏం జరగబోతుందనే ఉత్కంఠను రేపుతోంది..!

చిత్తూరు ఉప ఎన్నికల్లో నోటా హవా..

ఆంధ్రప్రదేశ్ లో తిరుపతి పార్లమెంటు ఉప ఎన్నికలో నోటా తన హవాని చాటుకుంది. అత్యధిక సంఖ్యలో తిరుపతిలో ఓటర్లు నోటాకి ఓట్లు వేయడం ప్రస్తుతం చర్చనీయాంశం అవుతుంది. సాధారణంగా రాష్ట్రంలో ఏ ప్రభుత్వం అధికారంలో ఉంటే ఆ పార్టీకి గెలుపు, ఇతర ప్రత్యర్ధి పార్టీలకు ఓటమి వస్తుంటాయి. కానీ విచిత్రంగా తిరుపతి పార్లమెంటు ఉప ఎన్నికలో ఆదివారం లెక్కింపు జరుగుతున్న మధ్యాహ్నాం 12.05 గంటల సమయానికే ఒక్క నోటాకి 4950(1.4 శాతం) ఓట్లు పోలవడం అన్ని రాజకీయ పార్టీల వారిని ఆలోచనకు గురిచేసింది. అంటే చాలా మంది ప్రజలకు ప్రస్తుతం ఎన్నికల బరిలో నిలబడిన వారెవరికీ ఓట్లు వేయకూడదని నిర్ణయించుకున్నట్టుగా అధికారికంగా చెప్పినట్టు అయ్యింది. వైసీపీ: 2,04,370(56.1 శాతం), టీడీపీ: 1,17,612(32.3 శాతం) , బీజేపీ: 20,811(5.7 శాతం), కాంగ్రెస్ : 3,280(0.9 శాతం) ,సీపీఎం :1,892(0.5 శాతం), ఇతరులు : 11,337(3.2 శాతం) ఓట్లు సాధించారు. ఇంకా ఓట్ల లెక్కింపు జరుగుతోంది..

జీవిఎంసీకి డా.స్రిజన..ఏపీఈపీడీసీఎల్ కి నాగలక్ష్మి..

ఆర్.టి.సి బస్సులలో ఆక్యుపెన్సీ పెంచాలి..

ఆర్.టి.సి బస్సుల్లో  ఆక్యుపెన్సీ పెంచాలని ఆర్.టి.సి వైస్ ఛైర్మన్ మరియు మేనేజింగ్ డైరక్టర్ ఆర్.పి.ఠాగూర్ అన్నారు. శుక్ర వారం శ్రీకాకుళం జిల్లా పర్యటనకు విచ్చేసిన ఠాగూర్ శ్రీకాకుళం ఆర్.టి.సి డిపో, కాంప్లెక్సు ప్రాంతాలను తనిఖీ చేసారు. అనంతరం శ్రీకాకుళం ఒకటవ నంబరు డిపోలో ఆర్.టి.సి ఉద్యోగులను ఉద్దేశించి ప్రసగించారు. ఆర్.టి.సి ఉద్యోగులది గురుతరమైన బాధ్యత అన్నారు. ఆక్యుపెన్సీ రేట్ పెంచాలని, మైలేజ్ పెంచాలని సూచించారు. రాష్ట్రంలో ప్రతి రోజు 8 లక్షల లీటర్ల డీజిల్ ను ఆర్.టి.సి వినియోగిస్తుందని ఆయన అన్నారు. మైలేజిని పెంచడం ద్వారా వినియోగం తగ్గించాలని తద్వారా ఆదాయం పెరిగే దిశగా అడుగులు వేయగలమని పేర్కొన్నారు. భవిష్యత్తులో మంచి కార్యక్రమాలు చేపట్టుటకు చర్యలు తీసుకుంటున్నామని ఆయన తెలిపారు. ప్రజల అవసరం మేరకు సేవలు మెరుగుపరచుటకు తగిన ప్రణాళికలు సిద్ధం చేస్తున్నట్లు ఆయన చెప్పారు. ఉద్యోగుల పనితీరు (పెర్ఫార్మెన్సు) మెరుగుపడాలని, ప్రజా రవాణా శాఖ స్వయం ప్రతిపత్తి దిశగా సాగలని తద్వారా  ప్రభుత్వానికి మంచి పేరు రావాలని ఆయన పేర్కొన్నారు. ఉద్యోగుల పాత బకాయిలను చెల్లిస్తామని, పారితోషికాలను పునరుద్ధరిస్తామని ఎం.డి తెలిపారు. శ్రీకాకుళంలో డిపోలు, కాంప్లెక్సు విశాలంగా ఉన్నాయని చక్కని వాతావరణం ఉందని అన్నారు. ఈ సందర్భంగా ఉత్తమ డ్రైవర్ గా ప్రధమ స్ధానం సాధించిన ఎస్.వి.రమణకు రూ.5 వందల పారితోషికాన్ని అందించారు. ఇతర డిపోలలో పనిచేస్తు ఉత్తమ ఫలితాలు అందించిన వారికి పారితోషికాలను సంబంధిత డిపో మేనేజర్లకు అందజేసారు. ఈ కార్యక్రమంలో ఆర్.టి.సి ఎగ్జిక్యూటివ్ డైరక్టర్ కె.రవి కుమార్, రీజనల్ మేనేజర్ ఏ.అప్పల రాజు, డివిజనల్ మేనేజర్ జి.వరలక్ష్మి, డిపోమేనేజర్లు, ఇతర సిబ్బంది పాల్గొన్నారు. 

అభ్యంతరాలు లేకపోతే ధృవపత్రాలు జారీ..

ప్రభుత్వ మార్గదర్శకాలకు అనుగుణంగా కోర్టు ఉత్తర్వుల పరిధికి లోబడి అభ్యంతరాలు లేని ఆక్రమణల ధృవపత్రాలు జారీకి వెంటనే చర్యలు తీసుకోమని రాష్ట్ర ప్రధాన కార్యదర్శి ఆదిత్యనాధ్‌దాస్ చెప్పారు. స్ధానిక రాష్ట్ర ప్రధాన కార్యదర్శి క్యాంపు కార్యాలయంలో సిసియల్ఏ, రెవెన్యూ, ఇరిగేషన్ ఉన్నతాధికారులు, కృష్ణా జిల్లా కలెక్టరుతో గురువారం విజయవాడ పరిధిలోని ఆక్రమణలో ఉన్న స్ధలాలపై సమీక్ష నిర్వహించారు. ఈసందర్భంగా ప్రధాన కార్యదర్శి ఆదిత్యనాధ్‌దాస్ మాట్లాడుతూ నగరంలోని పలు ప్రభుత్వ, ఇరిగేషన్, తదితర ప్రభుత్వ శాఖల అధీనంలో ఉన్నస్ధలాల క్రమబద్దీకరణ కోసం ప్రభుత్వ నిబంధనలు మేరకు క్రమబద్ధీకరించుకోవచ్చన్నారు. ఇప్పటికే అటువంటి భూముల క్రమబద్ధీకరణకు ప్రభుత్వం మార్గదర్శకాలను జారీ చేసిందన్నారు. భూముల క్రమబద్దీకరణ విషయమై సుప్రీంకోర్టు ఉత్తర్వులను పరిగణనలోనికి తీసుకుని ప్రతిపాదనలను వెంటనే ప్రభుత్వానికి సమర్పించాలని జిల్లా కలెక్టరు ఏయండి. ఇంతియాజ్‌కు సూచించారు. విజయవాడ నగరంలోని కృష్ణలంక లెఫ్ట్ కెనాల్, విజయవాడ వెస్ట్, సెంట్రల్, నార్త్, ఈస్ట్ మండలాల పరిధిలోని ఆక్రమణల్లో ఉన్న స్ధలాల విషయాలను సమావేశంలో కూలంకషంగా చర్చించారు. ఈసమావేశంలో సిసియల్ఏ స్పెషల్ సియస్ నీరబ్‌కుమార్ ప్రసాద్, రెవెన్యూ సెక్రటరి వి.ఉషారాణి, ఇరిగేషన్ కార్యదర్శి జె. శ్యామలరావు, కృష్ణాజిల్లా కలెక్టరు ఏ.యండి. ఇంతియాజ్, కృష్ణాజిల్లా జలవనరుల శాఖాధికారులు పాల్గొన్నారు.