షెడ్యూల్ 9, 10 సంస్థల ఆస్థులు విభజించండి

ఆంధ్రప్రదేశ్ విభజన చట్టంలోని షెడ్యూల్ 9, 10 సంస్థల విభజన ఆలస్యం కావడం, దానిపై తెలంగాణ ప్రభుత్వం స్పందించకపోవడంపై ఏపీ ప్రభుత్వం సుప్రీంకోర్టు  పిటిషన్ దాఖలు చేసింది. ఈ సంస్థల విభజన ఆలస్యంతో ఏపీ నష్టపోతుందని పిటిషన్‌ లో ప్రభుత్వం పేర్కొంది. కాగా ఈ షెడ్యూల్‌లో ఉన్న సంస్థల విలువ దాదాపు రూ.1,42,601 కోట్లు ఆస్తులు ఉణ్నాయని.. తెలంగాణలో ఉన్న దాదాపు 91 శాతం సంస్థలు విభజన అంశంపై తెలంగాణ స్పందించకపోవడం ఏపీ ప్రజల ప్రాథమిక హక్కుల ఉల్లంఘనే అని పిటిషన్

 లో పేర్కొంది. సంస్థలవిభజనకు ఆదేశాలు ఇవ్వాలని సుప్రీం కోర్టును ఏపీ ప్రభుత్వం కోరింది.

చార్ ధామ్ యాత్రకు కర్ణాటక ప్రభుత్వ బంపర్ ఆఫర్

కర్నాటక లో అధికారం లో ఉన్న బీజేపీ ప్రభుత్వం  చార్ ధామ్ యాత్ర కు వెళ్లే  హిందూ యాత్రీకులకు కోసం నమ్మ యాత్ర పేరిట రూ.35 వేలు సబ్సిడీ అమలు చేస్తోంది. వీటితోపాటు అమర్ నాధ్ యాత్ర,  కైలాస మానస సరోవర్ యాత్ర సహా.. ఇతర యాత్రలకు వెళ్లే కర్ణాటక ప్రయాణీకులకు సబ్సిడీ ఇస్తోంది. సబ్సిడీని క్లెయిమ్ చేయడానికి  https://nammayatra.in/SubsidyForm  లో వివరాలు నమోదు చేయాల్సి వుంటుంది. ఈ అవకం కర్నాటక వాసులు ఒక మంచి పథకంగా భావించి యాత్రకు దరఖాస్తు చేసుకుంటున్నారు.

కర్ణాటక రామనగరలో 16న శ్రీనివాస కల్యాణం

కర్ణాటక రాష్ట్రం రామనగర లోని  డిస్ట్రిక్ట్ స్టేడియంలో డిసెంబరు 16వ తేదీ సాయంత్రం 6 గంటల నుండి రాత్రి 8 వరకుశ్రీనివాసకల్యాణం నిర్వహించనున్నారు. కర్ణాటక మాజీ ముఖ్యమంత్రి  కుమార స్వామి సౌజన్యంతో  టీటీడీ ఆధ్వర్యంలో స్వామివారి కళ్యాణం నిర్వహిస్తున్నారు.  వేలాదిమంది భక్తులు  పాల్గొనేలా రామనగర డిస్ట్రిక్ట్ స్టేడియంలో  ఏర్పాట్లుతో పాటు కళ్యాణ వేదిక నిర్మాణం, విద్యుత్ అలంకరణల పనులు జరుగుతు న్నాయి. స్వామివారి కల్యాణం సందర్భంగా హిందూ ధర్మ ప్రచార పరిషత్ ఆధ్వర్యంలో అన్నమాచార్య ప్రాజెక్టు కళాకారులు సంగీత కార్యక్రమం నిర్వహించనున్నారు.   శ్రీ వేంకటేశ్వర భక్తి 

ఛానల్  ఈ కార్యక్రమాన్ని ప్రత్యక్ష ప్రసారం  చేయనుంది.

ఎలక్షన్ కి ముందే ఎల్లో బ్యాచ్ దంపుడు మొదలెట్టింది

ఆంధ్రప్రదేశ్ లో వింత పరిస్థితి చోటుచేసుకుంటోంది..ఇంకా సార్వత్రిక ఎన్నికలు దగ్గర పడనేలేదు కానీ ప్రభుత్వ తీరుపై ఎల్లోబ్యాచ్ అండ్ అకో దంపుడు మొదలెట్టింది. రోజుకో విషయాన్ని వండి వార్చేస్తున్నది తమ తమ మీడియాలో. దీనితో మంత్రులు, ఎమ్మెల్యేలు, ఎంపీలకు ఆ వార్తలపై ఖండనలు ఇచ్చుకోవడాని కే సమయం అంతా అయిపోతున్నది. వారి శాఖల అభివ‌ృద్ధి మాట ఎటోగానీ..ప్రభుత్వ వ్యతిరేక మీడియాలో ఒక్క న్యూస్ పబ్లిష్ అయితే మాత్రం చిర్రెత్తుకొస్తున్న నాయకులు ఎదురుదాడి మొదలెడుతున్నారు. వైఎస్సార్సీపీ ప్రభుత్వం అధికారంలోకి వచ్చిన కొత్తలో మీడియాని అణగదొక్కాలని ప్రభుత్వ వ్యతిరేక ప్రచారం మీడియాలో మొదలు పెడితే కేసులు పెట్టేది. దానితో అప్పట్లో అంతా కాస్త వెనక్కి తగ్గారు. ఇపుడు ఎలక్షన్ కి ముందు మీడియా తన ప్రతాపాన్ని చూపిస్తున్నది. ప్రభుత్వంలో జరిగే అన్ని విషయాలను పతాక శీర్షికన ఎండగట్టే పనిచేస్తున్నది. దానితో అధికారపార్టీ సొంత టీవీ ఛానల్, సొంత పత్రికలో ఖండనలు ఇచ్చుకునే పరిస్థితికి వచ్చారు. వాస్తవానికి ఏదైనా ఒక వార్త తప్పు అనుకుంటే సదరు ప్రచురించిన మీడియాకి ఖండన పంపాలి. ఆ మీడియాలోనే ఖండన ప్రచురింపజేసుకోవాలి. కానీ ఆంధ్రప్రదేశ్ లో ఆపరిస్థితి లేదు. ఆ ఖండన వార్తను కూడా సొంత మీడియాలోనే వేసుకునే పరిస్థితి వచ్చింది. వ్యతిరేకంగా వార్తలు  రాసినా ప్రభుత్వంగానీ, పార్టీ ఇచ్చిన ఖండనలు ఏ ఒక్క మీడియా వాటిని ప్రచురించకపోవడం ఇపుడు చర్చనీయాంశం అవుతున్నది.

ఎల్లోమీడియానే కాదు మొత్తం మీడియానే వన్ సైడ్..

ప్రభుత్వం ఎల్లో మీడియా అని గళమెత్తుతున్న ఏపీలో మొత్తం మీడియా మొత్తం వన్ సైడ్ అవుతున్నట్టుగానే కనిపిస్తున్నది. అదేంటో జరిగిన తప్పులను ఒక్కోసారి రాసే మీడియాపై కూడా ప్రభుత్వం తిరగబడిపోతుందని.. పత్రికా స్వేచ్చను హరించేస్తున్నారని సోకాల్డ్ జర్నలిస్టు సంఘాలు, వాటికి ప్రాతినిధ్యం వహిస్తున్న నేతలు కూడా మమ అనే ఆందోళనలు చేస్తున్నారు తప్పితే మరో రకంగం ముందుకు వెళ్లడం లేదు. దేని పని దానిదే అన్నట్టుగా ఆది నుంచి ప్రభుత్వ విధానాలకు వ్యతిరేకంగా వున్న ఒక వర్గం మీడియా మాత్రం ఈ మధ్య కాలంలో మాత్రం దూకుడు పెంచింది. దీనితో పరిపాలన కాకుండా పత్రికలు, మీడియాపై పడుతోంది ప్రభుత్వం. అదే సమయంలో కొన్ని పత్రికలు, ఛానళ్లు కావాలనే ప్రభుత్వం అసత్య ప్రచారాలను చేయడాన్ని కూడా ప్రజలు గమనిస్తున్నారు. ప్రజలకు ప్రభుత్వానికి  మధ్య వారధిగా వున్న మీడియాను అనగదొక్కే ప్రయత్నం చేసిన ప్రభుత్వానికి ఇపుడు సమయం రావడంతో మీడియా యావత్తు అవకాశం ఎదురు చూస్తూ ప్రభుత్వ  పరిపాలనలో జరుగుతున్న తప్పులను వార్తల రూపంలో దంచి కొడుతున్నాయి. దీనితో ప్రభుత్వంపై ముప్పేట మీడియా దాడి జరుగుతున్నది. ప్రభుత్వంలోని ముఖ్య మంత్రి దగ్గర నుంచి ఇతర మంత్రులు సోకాల్డ్ మీడియాపై పదే పదే ప్రచారం చేస్తున్నప్పటికీ, మిగిలిన మీడియా కూడా వన్ సైడ్ అయిపోయారు.

ప్రభుత్వ వ్యతిరేక వర్గానికి దగ్గరవుతున్న మీడియా

మాకు  మీడియా అవసరం లేదు.. సోషల్ మీడియా ఉంటే చాలు అనుకుంటున్న ప్రభుత్వానికి, ప్రభుత్వ వ్యతిరేక వర్గానికి అసలైన మీడియా దగ్గరవుతూ లోపాలను ఎండగట్టే ప్రయత్నం చేస్తుందని విశ్లేషకులు భావిస్తున్నారు. ఒకరు వ్యతిరేక దంపుడు మొదలెడితే ఆ కోవలో నడిచే వారంతా అదే రకమైన దంపుడు మొదలెడతారనే నానుడి ప్రస్తుతం నిజమవుతున్నది. ప్రస్తుతం ప్రభుత్వ తీరుకి వ్యతిరేకంగా ఉన్న ఉపాధ్యాయ వర్గాలు, ప్రభుత్వ ఉద్యోగులు, ఔట్ సోర్సింగ్ ఉద్యోగులు, వామపక్షాలకు ప్రభుత్వాన్ని ప్రశ్నించే వారికి మీడియా దగ్గరవుతున్నది. వారికి జరిగిన అన్యాయం, ప్రభుత్వం వ్యవహరిస్తున్న తీరును రాబోయే ఎన్నికలను దృష్టిలో ఉంచుకొని ఇప్పటికే కార్యాచరణ చేసుకుంటూ ప్రత్యేక కధనాలను వండి వార్చేస్తున్నది. అటు ప్రభుత్వం కూడా ప్రజల సంక్షేమం ముందు..ఉద్యోగుల జీతబత్యాలు తర్వాత అన్నట్టు వ్యవహరిస్తున్నదని, ఉద్యోగుల కంటే ప్రజలు అత్యధిక శాతం ఉండటంతో వారికే తొలి ప్రాధాన్యత ఇస్తున్నదని ఉద్యోగులు సైతం బహిరంగ విమర్శలు చేస్తున్నారు. ఆందోళనలు చేపడుతున్నారు. ప్రస్తుతం అవన్నీ ప్రజలందరికీ తెలియజేసేందుకు మీడియా మొత్తం ఏకమవుతున్నది. ఇప్పటికే మీడియాని  ప్రభుత్వం పూర్తిగా అనగదొక్కుతుందనే బావనలో వున్న మీడియా కూడా తన పని తాను చేసుకుంటూ పోతున్నది. పరిస్థితి ఇపుడే ఇలా ఉంటే ఎన్నికలు దగ్గరపడే సమయానికి ముదిరి పాకాన పడే అవకాశాలే సుస్పష్టంగా కనిపిస్తున్నాయనే వాదన బలంగా వినిపిస్తుంది..!

భద్రాచలంలో వైకుంఠ ఏకాదశి ఉత్సవాలు ఎప్పుడంటే

ప్రముఖ పుణ్యక్షేత్రమైన భద్రాచలం శ్రీ సీతారామచంద్ర స్వామి వారి దేవస్థానంలో లో ముక్కోటి ఏకాదశి మహోత్సవాల వైభవంగా నిర్వహించేందుకు దేవస్థాన అధికారులు అన్ని ఏర్పాట్లు చేస్తున్నారు. స్వామివారి ఏకాదశి ఉత్సవాలను డిసెంబర్ 23, 2022 నుంచి జనవరి 12, 2023 వరకు  శ్రీ వైకుంఠ ఏకాదశి సంయుక్త అధ్యాయం ఉత్సవాలు, విలాసోత్సవాలు, పగల్ పత్త్ రాపత్త్ సేవలు, విశ్వరూప సేవ నిర్వహించనున్నారు. ఉత్సవాలలో భాగంగా భద్రాద్రి శ్రీరామచంద్రమూర్తి దశ అవతారాలలో భక్తులకు దర్శన భాగ్యం కల్పించనున్నారు. 

డిసెంబర్ 23న మత్స్యావతారంలో, 24న కూర్మావతారంలో, 25న వరహావతారంలో, 26న నరసింహా వతారంలో, 27న వామనావతారంలో, 28న పరుశురామావతారంలో, 29న శ్రీరామవతారం (నిజరూప అవతారం)లో, 30న శ్రీకృష్ణా వతారంలో భక్తులకు దర్శనమివ్వనున్నారు. అదేవిధంగా 1 జనవరి 2023న శ్రీతిరుమంగై అళ్వారులు పరమపదోత్సవము, సాయంత్రం 4 గంటలకు శ్రీస్వామి వారికి గోదావరి నదిలో తెప్పోత్సవం జనవరి 2, 2023న వైకుంఠ ఏకాదశి మహోత్సవం ఉత్తర ద్వార దర్శనాన్ని నిర్వహించనున్నారు. శ్రీవైకుంఠ ఏకాదశి మహోత్సవమును తెల్లవారుజామున 5 గంటల 

నుండి ఉదయం 6 గంటల వరకు నిర్వహించి అనంతరం ఉత్తర ద్వార దర్శనం జరుగునని, తిరువీధి సేవ, 

రాత్రి 8 గంటలకు రాపత్తు ఉత్సవం ప్రారంభం  అవుతుందని తెలియజేశారు.రాపత్తు సేవలో భాగంగా భద్రాద్రి శ్రీ సీతారామచంద్ర స్వామి వారు జనవరి 02న శ్రీరామరక్షా మండపం( భద్రాచలం ఏఎస్పీ  కార్యాలయం). 

03న శ్రీహరిదాస మండపం (అంబాసత్రం), 04న శ్రీగోకుల మండపం (శ్రీకృష్ణాలయం), 5న శ్రీరామదాస మండపం (భద్రాచలం రెవెన్యూ కార్యాలయం), 06న గోవింద మండపం (తాతగుడి),  07న 

పునర్వపు మండపం, 08న శ్రీరామదూత మండపం (శ్రీఅభయాంజ నేయస్వామి వారి ఆలయం), స్వామివారు పర్యటించనున్నారు. జనవరి 09న శ్రీకల్కి అవతారం, దొంగల దోపు ఉత్సవం, విశ్రాంత మండప సేవ, 10న దమ్మక్క మండపం (పురుషోత్తపట్నం)లలో స్వామివారు రాపత్తు సేవలు నిర్వహించనున్నారు. 

ముక్కోటి ఉత్సవాలను అత్యంత ఘనంగా నిర్వహించేందుకు ఆలయ అధికారులు ఏర్పాట్లు చేస్తున్నారు.

డిసెంబర్12న శ్రీ‌వారి ఆర్జితసేవా టికెట్ల కోటావిడుదల

 తిరుమ‌ల శ్రీ‌వారి ఆర్జిత సేవా టికెట్ల కోటాను జనవరి 2023 నెల‌కు సంబంధించి డిసెంబర్ 12న మధ్యాహ్నం 3 గంట‌ల‌కు టిటిడి ఆన్‌లైన్‌లో విడుదల చేయ‌నుంది. అదేవిధంగా, 2023 జనవరి నెల‌కు సంబంధించి మ‌రికొన్ని ఆర్జిత‌సేవా టికెట్లకు ఆన్‌లైన్ ల‌క్కీడిప్ న‌మోదు ప్ర‌క్రియ డిసెంబర్ 12న ఉదయం 10 గంట‌ల‌ నుండి డిసెంబరు 14న ఉదయం 10 గంటల వరకు ఉంటుంది. ఆ తరువాత లక్కీడిప్ లో టికెట్లు కేటాయిస్తారు.   భ‌క్తులు ఈ విష‌యాల‌ను గుర్తించి శ్రీ‌వారి ఆర్జిత సేవ‌ల‌ను బుక్ చేసుకోవాల‌ని టిటిడి శ్రీవారి భక్తులను కోరుతోంది.

ఆమ్ ఆద్మీ పార్టీకి ఇక జాతీయ పార్టీ హోదా..!

ఢిల్లీలో పదేళ్ల క్రితం అన్నాహజారే ప్రారంభించిన జన్‌లోక్‌పాల్‌ ఉద్యమం ద్వారా ప్రాచుర్యం పొందిన కేజ్రీవాల్‌ స్థాపించిన ఆమ్‌ ఆద్మీ పార్టీ (ఆప్‌).. ఇప్పుడు జాతీయ పార్టీ హోదాను దక్కించుకుంది.  దేశరాజధాని న్యూఢిల్లీలో పుట్టిన ఈ రాజకీయ పార్టీ అంచెలంచెలుగా ఎదుగుతూ వివిధ రాష్ట్రాలల్లో ప్రభుత్వాలు నిర్మించేంతగా విస్తరించింది.  న్యూఢిల్లీ అసెంబ్లీ ఎన్నికల్లో వరుసగా రెండు దఫాలు ఘన విజయం సాధించింది. అంతేకాకుండా ఇటీవలే జరిగిన పంజాబ్‌ అసెంబ్లీ ఎన్నికల్లోనూ విజయం సాధించింది. తాజాగా జరిగిన గుజరాత్‌, హిమాచల్‌ప్రదేశ్‌ ఎన్నికల్లోనూ గెలిచి జాతీయస్థాయిలో భాజపాకు ప్రత్యామ్నాయంగా నిలిబడింది.

కాగా కాంగ్రెస్‌ స్థానాన్ని భర్తీ చేయాలని భావించినా..ఆశలు ఫలించలేదు.ఏదైనా పార్టీకి జాతీయహోదా రావాలంటే.. సాధారణ ఎన్నికల్లో కనీసం 4 రాష్ట్రాల్లో పోలైన ఓట్లలో 6% చొప్పున ఓట్లు పొంది ఉండాలి లేదంటే.. ఏవైనా 4 రాష్ట్రాల నుంచి 11 లోక్‌సభ సీట్లు సాధించి ఉండాలి. అయితే ఆప్ ప్రస్తుతం  న్యూఢిల్లీ పంజాబ్‌లో అధికారం దక్కించుగోగా.. గోవా అసెంబ్లీ ఎన్నికల్లో రెండు స్థానాల్లో 6%  ఓట్లను దక్కించుకుంది. ఇప్పుడు గుజరాత్‌ అసెంబ్లీ ఎన్నికల్లో 5 స్థానాల్లో గెలిచి 12% ఓట్లు సాధించి తన బలాన్ని నిరూపించుకుంది. దీంతో జాతీయపార్టీగా అవతరించేందుకు ఆప్  అర్హత సాధించినట్లయింది.

గుజరాత్‌ అసెంబ్లీ ఎన్నికల్లో సాధించిన ఓట్లతో ఆమ్‌ ఆద్మీ పార్టీకి జాతీయపార్టీ హోదా దక్కిందని ఢిల్లీ ముఖ్యమంత్రి కేజ్రీవాల్‌ వెల్లడించారు. తమ పార్టీకి ఓట్లువేసి గొప్ప అవకాశాన్ని కల్పించడంలో సహకరించిన గుజరాత్‌ ప్రజలు, ఆప్‌ కార్యకర్తలకు ఆయన ప్రత్యేకంగా కృతజ్ఞతలు చెప్పారు.  దేశంలో కొన్ని పార్టీలకే 

జాతీయపార్టీ హోదా లభిస్తుందని.. పదేళ్ల క్రితం చిన్నపార్టీగా ఉన్న ఆప్‌ ఇప్పుడు జాతీయపార్టీ అయ్యిందని హర్షం వ్యక్తంచేశారు. అయితే ఇపుడు జాతీయ పార్టీల  సరసన ఆప్ నిలవడం కూడా దేశవ్యాప్తంగా చర్చనీయాంశం అవుతుంది. అంతేకాకుండా రానున్న 2024 ఎన్నికల్లో రెండు తెలుగు రాష్ట్రాల్లోనూ ఆప్ తరపున అభ్యర్ధులు పోటీ అవకాశాలు కనిపిస్తున్నాయి. ఇప్పటికే ఈ రెండు రాష్ట్రాల్లోనూ ఆప్ పార్టీ తరపున కార్యక్రమాలు కొనసాగుతున్నాయి. ప్రస్తుతం పార్టీకి జాతీయ హోదా రావడంతో కార్యక్రమాలు విస్త్రుతి పెరిగే అవకాశాలున్నాయని విశ్లేషకులు భావిస్తున్నారు.

ఢిల్లీ మున్సిపల్ పీఠాన్ని కదిలించిన ఆప్ విజయవం

న్యూఢిల్లీలో బుధవారం వెల్లడైన మున్సిపల్‌ ఫలితాల్లో ఆప్‌( ఆమ్ ఆద్మీ పార్టీ) విజయ దుందుభి మోగించింది. మొత్తం 250 వార్డులు ఉండగా మెజార్జీ మార్క్‌(126)ను దాటి 134 స్థానాలను కైవసం చేసుకుంది. ఆప్‌ విజయంతో ఢిల్లీ మున్సిపల్‌ కార్పోరేషన్‌లో 15 ఏళ్ల బీజేపీ పాలనకు ఆమ్‌ ఆద్మీ పార్టీ గండికొట్టినట్టు అయ్యింది. దీంతో ఢిల్లీ మేయర్‌ పదవి ఆప్‌ వశమైంది. ఈ ఎన్నికల్లో బీజేపీ 104 వార్డుల్లో గెలుపొందగా.. కాంగ్రెస్‌ కేవలం 9 స్థానలకే పరిమితమైంది. మరో మూడు చోట్ల ఇతరులు విజయం సాధించారు.  ఢిల్లీ మున్సిపల్‌ ఎన్నికల ఫలితాలు ఆమ్‌ ఆద్మీ శ్రేణుల్లో ఉత్సాహాన్ని నింపాయి. రాష్ట్ర వ్యాప్తంగా పార్టీ కార్యాలయాల వద్ద ఆప్‌ నేతలు, కార్యకర్తలు  సంబరాలు చేసుకుంటున్నారు.  పూలు చల్లుతూ, స్వీట్లు పంచుకుంటూ  ఆనందంతో డ్యాన్స్‌లు చేశారు. మున్సిపల్‌ ఎన్నికల ఫలితాలపై డిల్లీ ముఖ్యమంత్రి అరవింద్ కేజ్రీవాల్‌ సంతోషం వ్యక్తం చేశారు. ఇంతటి గొప్ప విజయాన్ని అందించినందుకు ఢిల్లీ ఓటర్లకు ధన్యవాదాలు తెలిపారు. ఎంసీడీలో ఆప్‌ విజయం రాజధానిలో తొలిసారి డబుల్‌ ఇంజిన్‌ ప్రభుత్వాన్ని అందించిందన్నారు. మనమందరం కలిసి ఢిల్లీ నగరాన్ని పరిశుభ్రంగా, అందంగా తీర్చిదిద్దాలని విజ్ఞప్తి చేశారు. ఎంసీడీని అవినీతి రహితంగా మార్చేందుకు అన్ని పార్టీలు, అభ్యర్థులు కలిసి పనిచేయాలని సూచించారు.

ఢిల్లీ మున్సిపల్‌ ఎన్నికల్లో ఆమ్‌ ఆద్మీ పార్టీ ఘన విజయం సాధించిన అనంతరం కేజ్రీవాల్‌ కీలక వ్యాఖ్యలు చేశారు. ఢిల్లీ అభివృద్ధి కోసం పనిచేయడానికి బీజేపీ, కాంగ్రెస్‌ సహకారాన్ని కోరుకుంటున్నామని తెలిపారు. ఈమేరకు పంజాబ్‌ సీఎం భగవంత్‌ మాన్‌, ఢిల్లీ డిప్యూటీ సీఎం మనీష్‌ సిసోడియా, పార్టీ ముఖ్య నాయకులతో కలిసి ప్రజలను ఉద్ధేశించి మాట్లాడారు. మరోవైపు ఢిల్లీ మున్సిపల్‌ ఎన్నికల్లో ఆప్‌ విజయంపై ఉప ముఖ్యమంత్రి మనీష్‌ సిసోడియా స్పందించారు. ఆమ్‌ ఆద్మీ పార్టీపై విశ్వాసం చూపినందుకు కృతజ్ఞతలు తెలిపారు. ఇది కేవలం గెలుపు మాత్రమే కాదని.. పెద్ద బాద్యత అని వ్యాఖ్యానించారు. ప్రజలతో తీర్పుతో అతిపెద్ద పార్టీని ఓడించగలిగామని అన్నారు. 

తిరుమల శ్రీవారిని దర్శించుకున్న భారత రాష్ట్రపతి

తిరుమల శ్రీ వేంకటేశ్వరస్వామివారిని సోమవారం ఉదయం భారత రాష్ట్రపతి ద్రౌపతి ముర్ము దర్శించుకున్నారు. రాష్ట్రపతి సోమవారం ఉదయం 9.30 గంటలకు తిరుమలలోని శ్రీ పద్మావతి విశ్రాంతి భవనం నుండి బయలు దేరి తిరుమల క్షేత్ర సంప్రదాయాన్ని పాటిస్తూ శ్రీవారి పుష్కరిణిలో నీటిని ప్రోక్షణం చేసుకున్నారు. అనంతరం శ్రీ భూ వరహస్వామివారిని ద‌ర్శించుకున్నారు. అక్కడి నుంచి శ్రీవారి ఆలయానికి చేరుకున్న రాష్ట్రపతికి టిటిడి ఛైర్మ‌న్  వై.వి.సుబ్బారెడ్డి, ఈవో  ఏ.వి.ధ‌ర్మారెడ్డి సాదరంగా అహ్వానించగా, అర్చక బృందం ఆలయ మర్యాదలతో  ఇస్తికఫాల్ స్వాగతం పలికారు. ఆలయంలో ధ్వజస్తంభానికి నమస్కరించిన అనంతరం రాష్ట్రపతి శ్రీవారిని దర్శించుకున్నారు. శ్రీశ్రీశ్రీ  పెద్దజీయంగార్‌ స్వామి, శ్రీశ్రీశ్రీ  చిన్నజీయంగార్‌ స్వామి ఉన్నారు. ఈ సందర్భంగా శ్రీవారి ప్రధాన అర్చకులలో ఒకరైన  వేణుగోపాల్ దీక్షితులు శ్రీవారి ఆలయ ప్రాశస్త్యాన్ని , సన్నిధిలోని ఇతర ఆలయాల గురించి వివరించారు. 

  అనంతరం రంగనాయకుల మండపంలో రాష్ట్రపతికి వేదాశీర్వచనం చేశారు.  ఛైర్మ‌న్‌, ఈవో కలిసి శ్రీవారి శేష వస్త్రాన్ని, తీర్థప్రసాదాలను, రాష్ట్రపతి  ద్రౌపతి ముర్ముకు అందజేశారు.  ఈ కార్యక్రమంలో కేంద్ర టూరిజం శాఖ మంత్రి  కిషన్ రెడ్డి, రాష్ట్ర ఉప ముఖ్య మంత్రులు  నారాయణ స్వామి,  సత్యనారాయణ, రాష్ట్ర మంత్రి  రోజా, దేవాదాయ శాఖ ప్రిన్సిపల్  సెక్రటరీ అనిల్ కుమార్ సింఘాల్,  జిల్లా కలెక్టర్ వెంకట రమణా రెడ్డి , అదనపు డిజి   రవిశంకర్ అయ్యర్ , డిఐజి  రవిప్రకాష్ ,  సివి ఎస్వో  నరసింహ కిషోర్ , తిరుపతి ఎస్పీ  పరమేశ్వర్ రెడ్డి, చిత్తూరు ఎస్పీ రిశాంత్ రెడ్డి ఇతర అధికారులు పాల్గొన్నారు.

సప్త గో ప్రదక్షిణ మందిరాన్ని దర్శించిన రాష్ట్రపతి

భారత గౌరవ రాష్ట్రపతి  ద్రౌపది ముర్ము సోమవారం అలిపిరి వద్ద గల సప్త గో ప్రదక్షిణ మందిరాన్ని దర్శించుకున్నారు. మందిరం వద్దకు చేరుకున్న గౌరవ రాష్ట్రపతికి  టీటీడీ చైర్మన్ వైవి సుబ్బారెడ్డి, ఈవో  ఎవి ధర్మారెడ్డి, జేఈవో సదా భార్గవి, సీవీఎస్వో  నరసింహ కిషోర్ స్వాగతం పలికారు. అర్చకులు సంప్రదాయ బద్ధంగా పూర్ణకుంభ స్వాగతం పలికారు. అనంతరం  రాష్ట్రపతి శ్రీ వేణుగోపాల స్వామిని దర్శించుకున్నారు. అర్చకుల ఆశీర్వాదం అనంతరం  ఆమె గో ప్రదక్షిణ చేశారు. గోవులకు అరటిపళ్ళు, మేత తినిపించి వాటికి నూతన వస్త్రాలు సమర్పించి నమస్కరించారు. అనంతరం గో తులాభారంలో గోవును ఉంచి దాని బరువుకు సరిపడేలా 435 కిలోల సమగ్ర దాణాను విరాళంగా అందించారు. ఇందుకు సంబంధించిన రూ 6 వేల రూపాయలను  రాష్ట్రపతి గో మందిరం అధికారులకు అందజేశారు.

 ఉప ముఖ్యమంత్రులు  నారాయణ స్వామి, కొట్టు సత్యనారాయణ , కేంద్ర కిషన్ రెడ్డి, రాష్ట్ర మంత్రి 

ఆర్ కె రోజా , జిల్లా కలెక్టర్ వెంకటరమణా రెడ్డి, సప్త గో ప్రదక్షిణ మందిరం నిర్మాణ దాత, చెన్నె టీటీడీ స్థానిక సలహా మండలి చైర్మన్ శేఖర్ రెడ్డి, చీఫ్ ఇంజినీర్   నాగేశ్వర రావు, గోశాల డైరెక్టర్ డాక్టర్ హరనాథ రెడ్డి తదితరులు పాల్గొన్నారు. 

గుడ్ న్యూస్.. సైనిక్ స్కూలు దరఖాస్తుల గడువు పెంపు

సైనిక్ స్కూళ్లలో ప్రవేశాల దరఖాస్తు దారులకు ప్రభుత్వం గుడ్ న్యూస్ చెప్పింది. గత నవంబర్ 30వ తేదీనే అప్లికేషన్స్‌కి గడువు ముగియగా.. మరో ఐదు రోజుల పాటు గడువు పెంచుతూ ప్రభుత్వం నిర్ణయం తీసుకుంది. దీనితో 6, 9వ తరగతుల ప్రవేశం కోసం అభ్యర్ధులు డిసెంబర్ 5వ తేదీ  వరకు దరఖాస్తు చేసుకోవచ్చని సైనిక్ స్కూళ్ల అధికారులు ప్రకటించారు. ఈ మేరకు ఒక నోటిఫికేషన్ విడుదల చేశారు. 

కేంద్రప్రభుత్వ రక్షణ  మంత్రిత్వ శాఖ పరిధిలో నడిచే సైనిక స్కూళ్లల్లో 2023-24 విద్యా సంవత్సరానికిగానూ 6వ తరగతి, 9వ తరగతిలో ప్రవేశాలను ఆల్‌ ఇండియా సైనిక్‌ స్కూల్‌ ఎంట్రన్స్‌ ఎగ్జామినేషన్‌ (ఏఐఎస్‌ఎస్‌ఈఈ-2023) ద్వారా కల్పించడానికి అర్హులైన బాలబాలికల నుంచి దరఖాస్తులు కోరుతూ నోటిఫికేషన్‌ విడుదల చేసింది. ఈ నోటిఫికేషన్‌ ద్వారా దేశ వ్యాప్తంగా ఉన్న దాదాపు 33 సైనిక స్కూళ్లలో ప్రవేశాలు కల్పించనున్నారు. ఈ ప్రవేశ పరీక్షను సైనిక్ స్కూల్ సొసైటీ నిబంధనల ప్రకారం నేషనల్ టెస్టింగ్ ఏజెన్సీ(ఎన్టీఏ) నిర్వహిస్తోంది.

అర్హతలు ఇవే..

6వ తరగతిలో ప్రవేశాల కోసం దరఖాస్తు చేసుకునే విద్యార్ధుల వయసు మార్చి 31, 2023 నాటికి 10 నుంచి12 ఏళ్ల మధ్యలో ఉండాలి. 9వ  తరగతిలో ప్రవేశాల కోసం దరఖాస్తు చేసుకునే విద్యార్థుల వయసు మార్చి 31, 2023 నాటికి 13 నుంచి 15 ఏళ్ల మధ్యలో ఉండాలి. 2022-23  విద్యాసంవత్సరంలో ఎనిమిదో తరగతిలో ఉత్తీర్ణత సాధించి ఉండాలి. ఈ అర్హతలతోపాటు ఆసక్తికలిగిన విద్యార్ధులు ఆన్‌లైన్‌ విధానంలో డిసెంబర్  5, 2022వ తేదీలోగా దరఖాస్తు చేసుకోవల్సి ఉంటుంది. దరఖాస్తు సమయంలో జనరల్ విద్యార్థులు రూ.650లు, ఎస్సీ/ఎస్టీ విద్యార్థులు రూ.500లు అప్లికేషన్‌ ఫీజు చెల్లించవల్సి ఉంటుంది. రాత పరీక్ష ఆఫ్‌లైన్‌ మోడ్‌లో జనవరి 8, 2023వ తేదీన దేశ వ్యాప్తంగా దాదాపు 180 పరీక్ష కేంద్రాల్లో నిర్వహిస్తారు.

మొత్తం సీట్ల వివరాలు ఇవి..

6, 9 తరగతులకు కలిపి మొత్తం 4,786 సీట్లు కేటాయించారు. 6వ తరగతికి దాదాపు 4,404  సీట్లు ఉన్నాయి. వీటిల్లో ప్రభుత్వ- 2,894, ప్రైవేటు- 1,510 సీట్ల చొప్పున ఉన్నాయి తొమ్మిదో తరగతికి మొత్తం 382 సీట్లు ఉన్నాయి. సైనిక్ స్కూల్‌ ఉన్న రాష్ట్ర విద్యార్థులకు 67 శాతం, ఇతర రాష్ట్రాల వారికి 33 శాతం సీట్లు కేటాయిస్తారు. వీటిల్లో ఎస్సీ కేటగిరీకి15 శాతం, ఎస్టీ కేటగిరీకి 7.5  శాతం, ఇతరులకు 27 శాతం సీట్లు రిజర్వేషన్ ప్రకారం కేటాయిస్తారు. 50.50 శాతం సీట్లలో 25 శాతం మాజీ డిఫెన్స్ ఉద్యోగుల పిల్లలకు, 25 శాతం ఇతర రాష్ట్రాలకు చెందిన విద్యార్థులకు కేటాయిస్తారు.

తెలుగు రాష్ట్రాల్లో పరీక్ష కేంద్రాలు ఇవే..

అనంతపురం, గుంటూరు, కడప, కర్నూలు, నెల్లూరు, ఒంగోలు, రాజమహేంద్రవరం, శ్రీకాకుళం, తిరుపతి, విజయవాడ, విశాఖపట్నం, విజయనగరం, హైదరాబాద్, కరీంనగర్.

శ్రీవారిని దర్శించుకున్న గ‌జేంద్ర సింగ్ షెకావ‌త్‌

కేంద్ర జ‌ల‌శ‌క్తి మంత్రి గ‌జేంద్ర సింగ్  షెకావ‌త్ బుధవారం ఉదయం తిరుమల శ్రీవారిని దర్శించుకున్నారు. 

 టిటిడి అధికారులు సాంప్రదాయ య‌బ‌ద్ధంగా స్వాగ‌తం ప‌లికి దర్శన ఏర్పాట్లు చేశారు. దర్శనానంతరం రంగనాయకుల మండపంలో వేద పండితులు వేదాశీర్వచనం చేశారు. టిటిడి ఈఓ ఎవి.ధర్మారెడ్డి ఈ సంద‌ర్భంగా  గ‌జేంద్ర సింగ్  షెకావ‌త్‌కు  శ్రీవారి తీర్థప్రసాదాలు, చిత్రపటాన్ని, డైరీ, క్యాలెండర్ అంద‌జేశారు.  ఈ కార్యక్రమంలో రాష్ట్ర మంత్రి  అంబటి రాంబాబు, ఎంపిలు  మిథున్ రెడ్డి,  రెడ్డెప్ప, టిటిడి మాజీ బోర్డు స‌భ్యులు  భానుప్ర‌కాష్‌రెడ్డి, ఆలయ అధికారులు తదితరులు పాల్గొన్నారు.

నేషనల్ ప్రెస్ డే..!

హజ్ రాకపోకలు విజయవాడ నుంచి అనుమతించండి

అంధ్రప్రదేశ్ రాష్ట్ర హజ్ కమిటి ఆంధ్రప్రదేశ్ నుంచి హజ్ యాత్రకు వెళ్లనున్న ప్రయాణికులకోసం విజయవాడ అంతర్జాతీయ విమానాశ్రయాన్ని తిరిగి ప్రకటించాలని కమిటి చైర్మన్ బద్వేల్ షెక్ గౌసల్ ఆజామ్ కేంద్ర వ్యవహారాల శాఖా మంత్రి స్మృతి ఇరానీని కోరారు. సోమవారం ఢిల్లీలో జరిగిన మైనారిటి వ్యవహారాల మంత్రిత్వ శాఖా సమవేశంలో అన్నీ రాష్ట్రాల హజ్ కమిటీల చైర్మన్లు , అదికారులు పాల్గొన్నారు. రెండు గంటలపాటు ఈ సమవేశం లో వివిద అంశాలపై విసృత చర్చజరిగింది. ఆంద్రప్రదేశ్ నుంచి హజ్ కమిటి చైర్మన్ గౌసల్ ఆజామ్, హజ్ కమిటి సభ్యులు ఇంజనీర్ ఇషాక్ బాషా, రాష్ట్ర హజ్ కమిటి ప్రత్యెక అధికారి అబ్దుల్ ఖాదీర్ పాల్గోన్నారు. ఈ సందర్బంగా హజ్ కమిటి చైర్మన్ గౌసల్ ఆజామ్ మాట్లడుతూ విజయువాడ నుంచి అనేక అంతర్జాతీయ విమానాలు రాకపోకలు తిరిగి ప్రారంభించాయని, రానున్న హజ్ 2023 కు అంధ్రప్రదేశ్ లోని ప్రయాణికులను విజయవాడ అంతర్జాతీయ విమనశ్రయం నుంచి వెళ్ళి వచ్చేందుకు పాయింటును ప్రకటించాలన్నారు. అంధ్రప్రదేశ్ హజ్ యాత్రీకులు పవిత్ర మక్కా ,మదీనా నగరాల్లో బస చెయ్యడానికి ఇప్పటివరకు ఇస్తున్న యాత్రికుల వసతి గృహల్లో కొన్ని ఇబ్బందులు తలెత్తుతున్నాయన్నారు . పవిత్ర యాత్రకు వెళ్తున్న హాజిలు ఎమైనా ఇబ్బందులు ఎదురైనా సహనంతో భరిస్తూ వెళ్తున్న అంశాల తమ దృష్టికి వచ్చాయన్నారు. ఈ ఇబ్బందిని అధికమించేందుకు హజ్ యాత్రకు ఒక నెల ముందు హజ్ కమిటి నుంచి ఒక అధికారిక బృందం ఆయా నగరాలకు ముందువెళ్ళి వసతిగృహాలను ముందుగానే చూసుకునే అనుమతిని సౌదీ ప్రభుత్వంతో ఇప్పించాలని కోరారు. హజ్ యాత్రికులకు యాత్ర సమయంలొ ఉచిత సేవలు అందించేందుకు ఇప్పటివరకు ప్రభుత్వ ఉద్యోగులకు మత్రమే అధికారిక అనుమతి ఉందని, ఇక నుంచి హజ్ కమిటిలో సుదీర్ఘకాలంగా పనిచేస్తున్న తాత్కాలిక ఉద్యోగులను కుడా అనుమతించాలని కేంద్ర మంత్రి ఇరానీని కోరారు. ఈమేరకు కేంద్ర మంత్రి అంధ్రప్రదేశ్ అభ్యర్ధనలు పట్ల సానుకూలం స్పందించారని గౌసల్ ఆజామ్ వెళ్లడించారు.

అక్టోబ‌రు 24, 25, నవంబరు 8న బ్రేక్ ద‌ర్శ‌నాలు ర‌ద్దు

తిరుమ‌ల శ్రీ‌వారి ఆల‌యంలో అక్టోబరు 24న దీపావళి ఆస్థానం, అక్టోబ‌రు 25న సూర్యగ్ర హణం, న‌వంబరు 8న చంద్ర‌గ్ర‌హ‌ణం కార‌ణంగా ఈ మూడు రోజుల్లో బ్రేక్ ద‌ర్శనాలను టిటిడి రద్దు చేసింది. ఈ మేరకు బుధవారం మీడియాకి ప్రకటన విడుదల చేసింది అక్టోబర్ 24న దీపావళి ఆస్థానం కారణంగా బ్రేక్ దర్శనం రద్దు చేసినందున అక్టోబర్ 23న సిఫార్సు లేఖలు స్వీకరించబడవని తెలియజేసింది. అక్టోబ‌రు 25న మంగ‌ళ‌వారం సూర్యగ్రహణం రోజున ఉద‌యం 8 నుండి రాత్రి 7.30 గంట‌ల‌ వరకు దాదాపు 12 గంటలు శ్రీ‌వారి ఆల‌య తలుపులు మూసి ఉంచుతారు. ఈ కార‌ణంగా బ్రేక్ ద‌ర్శనం రద్దు చేసినందున అక్టోబర్ 24న సిఫార్సు లేఖలు స్వీకరించరని కూడా పేర్కొంది. న‌వంబ‌రు 8న చంద్ర‌గ్రహణం రోజున  ఉద‌యం 8.30 నుండి రాత్రి  దాదాపు 7.30 గంట‌ల‌ వరకు శ్రీ‌వారి ఆల‌య తలుపులు మూసి ఉంచుతారు. ఈ కార‌ణంగా బ్రేక్ ద‌ర్శనం రద్దు చేసినందున నవంబరు 7న సిఫార్సు లేఖలు స్వీకరించరని తెలియజేసింది. అక్టోబ‌రు 25న సూర్యగ్రహణం, న‌వంబ‌రు 8న చంద్ర‌గ్రహణం రోజుల్లో శ్రీ‌వాణి, రూ.300/- ప్ర‌త్యేక ప్ర‌వేశ ద‌ర్శ‌నం టికెట్లను కూడా టిటిడి రద్దు చేసింది.భ‌క్తులు ఈ విష‌యాన్ని గ‌మ‌నించి టిటిడికి స‌హ‌క‌రించాల‌ని టిటిడి మీడియాకి విడుదల చేసిన ప్రకటనలో పేర్కొంది.