ప్రజలు తమ కష్టార్జితంతో, పొదుపు చేసుకున్న డబ్బును మదుపు చేసేటప్పుడు అప్రమత్తంగా ఉండి, తగిన జాగ్రత్తలు పాటించాలని జిల్లా కలెక్టర్ ఎ.సూర్యకుమారి కోరారు. బ్యాంకులు, పోస్టాఫీసులు, రిజిష్ట‌ర్ అయిన సంస్థ‌ల్లో మాత్రమే మదుపు చేయాలని సూచించారు. జిల్లాలో 44 రిజిస్టర్ అయిన సంస్థలు ఉన్నాయని తెలిపారు. రిజిష్ట‌ర్ చిట్‌ఫండ్ కంపెనీల్లో క‌ట్టిన చిట్టీల‌కు మాత్రమే భద్రత ఉంటుంద‌ని స్పష్టం చేశారు. ప‌ప్పుల చిట్టీలు, ఇతర ప్ర‌యివేటు చిట్టీల‌వ‌ల్ల మోస‌పోయే అవ‌కాశాలే ఎక్కువ‌గా ఉంటాయ‌ని, ఇలాంటివాటిప‌ట్ల అప్రమత్తంగా ఉండాల‌ని ఒక ప్ర‌క‌ట‌న‌లో హెచ్చ‌రించారు. ఇటీవల కాలంలో జిల్లాలో ప‌ప్పుల చిట్టీవ‌ల్ల భారీగా మోస‌పోయిన విషయాన్ని ప్ర‌స్తావించారు. ఇలాంటి వారు, ప్రజలకు న‌మ్మ‌కం క‌ల్గించేందుకు కొంత‌కాలం పాటు స‌జావుగా చిట్టీ నిర్వ‌హిస్తార‌ని, అనంతరం ప‌రార‌వుతార‌ని చెప్పారు.
గ‌తంలో కూడా ఇలాంటి సంఘ‌ట‌న‌లు చోటుచేసుకున్నాయ‌ని తెలిపారు. ఇలాంటి అన‌ధికార చిట్టీలు, ప‌ప్పుల చిట్టీల పట్ల అప్రమత్తంగా ఉండి, ముందుగానే అధికారులకు, పోలీసులకు ఫిర్యాదు చేయాలని సూచించారు. ప్రభుత్వ అనుమ‌తి లేకుండా, రిజిష్ట‌ర్ చేయ‌కుండా చిట్టీల‌ను నిర్వ‌హించే అన‌ధికార వ్య‌క్తులు, సంస్థ‌ల‌పై కఠిన చ‌ర్య‌ల‌ను తీసుకోవ‌డం జ‌రుగుతుంద‌ని స్పష్టం చేశారు. ఇటువంటి అన‌ధికార సంస్థ‌ల‌పై చిట్‌ఫండ్ చ‌ట్టం 1982,లోని 76,79 నిభందల మేరకు, సెక్ష‌న్లు 4,5,8,9,11,12,13,14,19,20,22,24,30,31, సెక్ష‌న్ 33లోని స‌బ్‌సెక్ష‌న్ 4, సెక్ష‌న్ 46,47, సెక్ష‌న్ 61లోని సబ్ సెక్ష‌న్ 5 ప్ర‌కారం చర్యలు తీసుకోవ‌డం జ‌రుగుతుంద‌ని కలెక్టర్ స్పష్టం చేశారు.
